Kae ʻOua ke Tau Toe Feʻiloaki
Ko e Talanoa Fakatātā ʻo e Fuʻu Siainé
ʻI Sulī Lengikā ʻa ia ʻoku ou nofo aí ʻoku lahi ʻaupito ai e ʻulu siainé. ʻOku molū honau sinó, ʻa ia ʻoku faingofua hono tuʻusi ʻaki e helé, ka ʻoku ʻikai fakalaveaʻi ʻe ha taha e fuʻu siainé koeʻuhí he ʻoku fua lelei.
ʻI he ngaahi taʻu lahi kuohilí heʻeku kei siʻí, naʻe tō mai ha afā lahi. Hili e afaá, ne u ʻalu ki tuʻa ʻo ʻilo ne holo e fuʻu siaine ʻe taha; ne taʻaki ia ki ʻolunga pea mafesifesi hono laú. Ne u fakakaukau ko e meʻa fakafiefia ke tuʻusi hono sinó, pea ne u hū leva ki fale ke ʻomi e helé. Ka ʻi he teu ke u tuʻusí, naʻe taʻofi au heʻeku kuitangatá.
Naʻá ne talamai, “He ʻikai te ke fakalaveaʻi e fuʻu siainé.”
Ne u ʻeke ange, “Ko e hā hono ʻuhingá? ʻOku ʻikai ke toe ʻi ai hano ʻaonga, pea ʻe fakafiefia hono tuʻusí.”
Naʻe ʻikai lea mai ʻeku kuitangatá kae kamo mai ke u muimui ange kiate ia. Naʻá ne talamai ke tuʻusi ha fuʻu vaʻakau lahi. Peá ma foki mai ki he feituʻu naʻe holo ai e fuʻu siainé. Pea neongo ʻene ngali taʻeʻaongá, ka naʻá ma ngāue ke toe fokotuʻu ia ki ʻolunga. Hili ʻene tuʻu hangatonú, naʻe teketeke ʻaki leva ia e fuʻu vaʻakaú.
Naʻe talamai heʻeku kuitangatá, “ʻAnitoni, ʻoku ou loto ke ke tokangaʻi e fuʻu siaine ko ʻení he ʻaho kotoa pea fakapapauʻi ʻoku tuʻu hangatonu maʻu pē. Te ke fuʻifuʻi mo tauhi ia he ʻaho kotoa.”
ʻI he pongipongi kotoa pē ne u vakaiʻi e fuʻu siainé ke fakapapauʻi ʻoku tuʻu hangatonu pē hono sinó. Ne u fakafonu ha kane vai he ʻaho kotoa ʻo fuʻifuʻi takai hono aká. Naʻá ku faivelenga ʻi hono tauhi e fuʻu siainé ʻo hangē ko ʻene fie maʻú.
Ne taimi siʻi pē kuo kamata ke laku fua mai, pea ʻasi mai leva e ngaahi foʻi siainé. ʻI he taimi naʻe momoho aí, naʻe tufa heʻeku kui tangatá e foʻi siaine ki he mēmipa kotoa ʻo e fāmilí. Ne u fiefia heʻeku mamata atu ki heʻenau fohi e siainé ʻo kaí. Ne ʻikai toe ʻi ai ha siaine ia ʻe ifo ange ai, pea naʻe fakafiefia kiate au ke mamata ʻoku fiefia ai hoku fāmilí.
Ko ha ngaahi taʻu lahi ʻaupito ia ki muʻa peá u toki kau ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ka ko e lēsoni ne u ako mei heʻeku tauhi ʻa e fuʻu siainé ʻoku fakatatau ia ki heʻeku moʻuí he ʻahó ni. ʻI hoku uiuiʻi faka-Siasí mo ʻeku ngāue fakatoketaá, ʻoku ou faʻa ʻilo e kakai ʻoku fefaʻuhi mo e faingataʻá. Pea hangē ko e fuʻu siainé, ʻoku liʻekina e kakaí ni, mole honau fakaʻofoʻofá, pea siva e ʻamanakí—ʻi he anga ʻenau fakakaukaú. ʻI heʻeku fakakaukau ke tukuange kinautolú, ʻoku ou manatu ki he melie ʻo e fuʻu siaine ko iá peá u lototoʻa leva ke tokoniʻi kinautolu ke nau tuʻu hangatonu, ʻi hono poupouʻi, fafangaʻi, mo tokangaʻi fakaʻaho kinautolu ʻo hangē ko ia naʻe mei fai ʻe he Fakamoʻuí.
Naʻe fiefia hoku fāmilí he melie ʻa e siainé, ka naʻe talanoa e Tohi ʻa Molomoná ia ki ha faʻahinga fuaʻi ʻakau ʻe taha—ʻa ia ʻoku “melie ʻaupito ia” mo “lelei ange ia ʻi he fua kehe kotoa pē” (vakai, 1 Nīfai 8:11–12). Te tau lava ke fiefia ʻi heʻetau tokoniʻi kinautolu ʻoku faingataʻaʻiá ke ʻilo honau halá ʻi he kakapu ʻo e fakapoʻulí pea tataki kinautolu ke maʻu e fua ʻoku melie ange ʻi he meʻa kotoa peé—ko e fua ʻo e moʻui taʻengatá.
Ne hangē kuo mate e fuʻu siainé ʻi hono holoki ʻe he afaá. Ka ʻi he ʻofá, tokangá, mo hono tauhi he ʻaho kotoa peé, naʻe ʻikai ngata pē ʻi heʻene moʻuí ka naʻe toe fua foki.
Faitā ʻa e © Superstock