Ngaahi Fehuʻi & Talí
“Ko e hā e tali ʻoku totonu ke u fai ʻi he taimi ʻoku pehē ai ʻe hoku ngaahi kaungāmeʻá ʻoku ʻikai lava ha tangata ʻo mamata ki he ʻOtuá?”
Mahalo pē kuo lau ho ngaahi kaungāmeʻá mei he ngaahi veesi he Tohi Tapú ʻoku pehē ai he ʻikai lava ha tangata ʻo mamata ki he ʻOtuá (vakai, ʻEkesōtosi 33:20; Sione 1:18; 1 Tīmote 6:14–16; 1 Sione 4:12). Hangē ʻoku fepaki e ngaahi veesi ko ʻení mo e ngaahi veesi kehe he Tohi Tapú ʻoku nau tala ai naʻe mamata ki he ʻOtuá ha kau tangata—hangē ko Sēkope, ʻĒpalahame, Mōsese, mo ʻĪsaia (vakai, Sēnesi 18:1; 32:30; ʻEkesōtosi 33:11; ʻĪsaia 6:1).
Meʻamālié, ʻoku tau maʻu e Liliu ʻa Siosefa Sāmita ʻo e Tohi Tapú, ʻa ia ʻokú ne fakamaʻalaʻala mai e ngaahi folofola ko ia ʻe fā ʻoku nau tala he ʻikai lava ke mamata e tangatá ki he ʻOtuá. ʻOku fakamatalaʻi ʻe he ngaahi liliu fakalangi ʻa e Palōfitá ʻoku ʻuhinga e ngaahi vēsí ia ko e kakai angahalá he ʻikai ke nau lava ʻo mamata ki he ʻOtuá—ka ko kinautolu pē ʻoku tuí. Pea naʻa mo ha taha angatonu kuo pau ke hoko ki ai ha liliu—sino liliu—kae mamata ki he ʻOtuá (vakai T&F 67:11). ʻOku fakamatalaʻi ʻe he Mataʻitofe Mahuʻingá ʻa e mamata ʻa Mōsese ki he ʻOtuá, pea naʻe fakamatalaʻi ʻe Mōsese, naʻe ʻikai ko hono mata fakanatulá, ka ko e mata fakalaumālié naʻe mamata ʻaki ki he ʻOtuá (vakai, Mōsese 1:11).
Te ke lava ʻo ʻai ke ʻilo ho ngaahi kaungāmeʻá ʻoku “mau tui ko e Tohi Tapú ko e folofola ia ʻa e ʻOtuá ʻi he ngaahi meʻa kotoa pē ʻoku liliu totonú” (Ngaahi Tefito ʻo e Tuí 1:8). Te ke lava foki ʻo fakamoʻoni kau kia Siosefa Sāmita pea mo e folofola ʻo e ngaahi ʻaho kimui ní, ʻa ia ʻoku tokoni ke mahino kiate kitautolu “ko e loto maʻá … te nau mamata ki he ʻOtuá” (Mātiu 5:8).
Mamata Fakalaumālie Kiate Ia
Naʻe akoʻi mai ʻe ʻAlamā ʻoku fakamoʻoniʻi ʻe he meʻa kotoa pē ʻi natula ʻoku ʻi ai ha Tupuʻanga Fungani māʻolunga koeʻuhí ko e taʻefakangatangata hono natulá mo e fengāueʻakí (vakai, ʻAlamā 30:44). Ko ha faingamālie lelei ʻeni kiate koe ke fakamoʻoni ki ho ngaahi kaungāmeʻá ʻokú ke ongoʻi ʻEne ʻi hoʻo moʻuí ʻi he ʻaho kotoa pē ʻo fou mai he Laumālie Māʻoniʻoní. Te ke lava foki ʻo fakamatalaʻi ʻoku ʻikai fie maʻu ia ke tau mamata ki he ʻOtuá ka tau toki tui ʻokú Ne ʻi ai. Ko hono ʻuhinga ia ʻoku tau maʻu ai ʻa e tuí. Kapau naʻa tau mamata kiate Ia, ta he ʻikai toe fuʻu fie maʻu ha ngāue ia kae toki tui mo muimui kiate Ia he kotoa ʻetau moʻuí. ʻE ʻi ai ha taimi te tau toki mamata ai kiate Ia he tafaʻaki ʻe taha ʻo e veilí. Ka ʻi he teʻeki ai ke hoko e taimi ko iá, ʻoku feʻunga pē hoʻo tuí ke ke mamata fakalaumālie ai ki Hono toʻukupú ʻi hoʻo moʻuí.
Sanele E., taʻu 18, Uāsingatoni, USA
ʻOku ʻOfa ʻa e ʻOtuá ʻIate Au
Ne ʻeke mai ʻe ha taha ʻokú ma loki fakataha pe ʻoku founga fēfē haʻaku tui ki ha meʻa ʻoku ʻikai ke u lava ʻo sio ki ai. Naʻá ku tali ange koeʻuhí he ʻoku ou ongoʻi ʻa e Laumālie Māʻoniʻoní, ʻa ia ʻokú ne fakamoʻoni ʻoku ʻafioʻi au ʻe he ʻOtuá, pea ʻoku tupulaki ai ʻeku tuí mo ne ʻomi e nongá ki hoku lotó. ʻOku ʻikai ke u lava ʻo mamata kiate Ia, ka ʻoku ou ʻiloʻi ʻokú Ne ʻofa ʻiate au koeʻuhí he ʻoku ou maʻu ʻa e tuí pea ongoʻi Hono Laumālié.
Samuela P., taʻu 18, Lala, Venesuela
Fakaava Hotau Lotó
Naʻe tokosiʻi pē ʻa e kakai naʻe mamata ki he ʻOtuá ʻi heʻenau kei ʻi māmaní, ka naʻe uesia kotoa ai kitautolu. ʻOku tau mamata he meʻa kotoa naʻá Ne fakatupú, ngaahi tāpuaki kotoa naʻá Ne ʻomí, pea ʻoku lava ke tau ongoʻi kotoa ʻEne ʻofá. ʻOku ongoʻi taha ia ʻi he taimi ʻoku fai ai ʻeku fakamoʻoní. Kapau pē ʻe fakaava hotau matá mo e lotó, te tau mamata ki he ʻOtuá ʻi he meʻa kotoa pē hotau ʻātakaí, pea ʻi he toko taha kotoa pē, ʻo ʻEne fānaú.
Katalina E., taʻu 16, Kalefōnia, USA
Te Tau Tuʻu ʻi Hono ʻAó
ʻI he taimi ʻoku ʻeke mai ai ʻe hoku kaungāakó pe ko e hā ʻoku ou tui ai ki ha ʻOtua ʻoku teʻeki ai ke u mamata kiate Iá, naʻá ku fakamatalaʻi ange ʻoku teʻeki ai ke tau mamata ki he ʻOtuá koeʻuhí he ʻoku teʻeki ai taimi ke tau mamata kiate Ia. Hili ʻetau toetuʻú, te tau tuʻu ʻi Hono ʻaó ke fakamāuʻi kitautolu (vakai, T&F 137:9). Ne u fai leva ʻeku fakamoʻoní pea fakamatalaʻi ko hono maʻu e tuí ʻoku ʻuhinga ia ki he tui pea maʻu mo e ʻamanaki lelei. Kapau te nau tui, te nau mamata ki he ʻOtuá ʻo hangē ko ʻeku vakai kiate Iá—ʻaki e mata ʻo hoku lotó.
Taiana V., taʻu 18, Sanitā Kulusi, ʻĀsenitina
Naʻá Ne ʻIloʻi ʻOku Moʻoni
Naʻe ʻi ai ha ʻaho ʻe taha ne u akoʻi ai mo hoku hoá ha ongomātuʻa, pea fakamatalaʻi ange naʻe mamata ʻa Siosefa Sāmita ki he Tamaí mo e ʻAló ko e tali ki heʻene lotú. Naʻe pehē mai ʻe he tangatá he ʻikai lava ha tangata ʻo mamata ki he ʻOtuá. Naʻe tatangi hake he taimi ko iá hoku uasí, ke fakamahino mai kuo taimi ke ma foki ki ʻapi. Naʻá ma mavahe mei hona ʻapí he ʻaho ko iá ʻoku teʻeki ke ma ʻoatu ha tali.
ʻI he ʻaho hono hokó ne u lau ha potufolofola mei he Tohi Tapú naʻe pehē, “Kapau ʻoku ʻiate kimoutolu ha taha ʻoku kikite, Ko au ko [e ʻEikí] te u fakahā au kiate ia ʻi he meʻa hā mai” (Nōmipa 12:6). Ne u ʻilo ʻe lava ʻe he potufolofola ko ʻení ʻo tokoniʻi e tangatá ni ke tui.
ʻI heʻema ʻaʻahi hokó, ne ma talanoa ai ʻo kau ki he kau palōfitá. Naʻá ku fakahā kiate ia ʻa e potufolofolá ni, pea kamata ke liliu hono fofongá. Naʻá ne loʻimataʻia, peá ne pehē mai, “ʻOku moʻoni ia. ʻOku ʻi ai ha kakai kuo teuteuʻi ke mamata ki he ʻOtuá.” Naʻá ma akoʻi ange kiate ia ʻa e kau palōfita he Tohi ʻa Molomoná naʻa nau mamata ki he ʻOtuá, pea naʻá ne ʻiloʻi naʻe moʻoni ia.
ʻEletā Taiasi, taʻu 25, Misiona Mekisikou Melitá
Tui ʻOku Moʻui ʻa e ʻOtuá
ʻI he angamahení ʻoku ʻikai ke tau mamata ki he ʻOtuá, ka te ke lava ke ongoʻi Hono Laumālié. ʻOku Ne finangalo ke ke ʻiloʻi Ia ʻaki hono lau e folofolá pea tui kiate Ia. Kapau te ke tui kiate Ia, he ʻikai ke ke tali ke toki mamata kiate Ia ka ke toki ʻiloʻi pe ko hai Ia pea ʻiloʻi ʻokú Ne moʻui. Naʻe pau ke liliu e kau palōfita hangē ko Mōsese mo Siosefa Sāmitá, ʻa ia naʻa nau mamata tonu ki he ʻOtuá, kae toki lava ke nau mamata kiate Ia.
ʻĒlone F., taʻu 12, ʻOlikoni, USA
Fai ha Fakamoʻoni
Ne ʻeke mai ʻe haku kaungāmeʻa ʻa e fehuʻi ko ʻení, pea ne u talaange pe naʻá ne maʻu mei fē ʻa e fakakaukau ko iá. Naʻá ne talamai naʻe fakahā ange ia ʻe ha tangata mei he Tohi Tapú. Naʻá ku manatuʻi leva ʻa e Sione 1:18, ʻa ia ʻoku pehē ai he ʻikai lava ha taha ʻo mamata ki he ʻOtuá. Pea ʻi he tokoni mai ʻa e kalasi seminelí, ne u manatuʻi mo ha ngaahi folofola kehe mei he Tohi Tapú ʻoku fakahā mai ai naʻe fonu ʻa Mōsese mo Sēkope, he Laumālie Māʻoniʻoní, peá na mamata ki he ʻOtuá. Pea naʻá ku lava leva ke tali fakapapauʻi ange e fehuʻi hoku kaungāmeʻá pea fai mo ʻeku fakamoʻoní.
Luisi M., taʻu 17, Mato Koloso, Palāsila