Pagpangita og mga Tubag diha sa Basahon ni Mormon
Ang atong panaw dinhi sa yuta mahimong mahagiton, apan ang atong mahigugmaong Langitnong Amahan wala mopadala kanato dinhi aron sa pag-atubang sa mga kalisdanan sa kinabuhi nga mag-inusara. Usa sa labing dakong mga tabang nga Iyang gihatag kanato mao ang Basahon ni Mormon. Wala lamang kini magtudlo sa kahingpitan sa ebanghelyo apan naggiya usab kanato sa pagsugakod sa mga problema nga atong masugatan. Samtang magsiksik kita sa Basahon ni Mormon, ang Espiritu motabang kanato sa pagpangita og mga tubag sa atong mga problema ug mga pangutana.
Si Elder M. Russell Ballard sa Korum sa Napulog Duha ka mga Apostoles mipamatuod:
“Ang Basahon ni Mormon, labaw sa tanang mga basahon nga akong nailhan, mao ang labing mahinungdanon nga kapanguhaan nga anaa kanato alang sa mga tubag sa tinuod nga mga problema sa kinabuhi. …
“Pila ka mga higayon nga ang kalinaw miabut sa kinabuhi niadtong kinsa nanlimbasug sa tinuod nga mga problema sa dihang nagbasa sila sa Basahon ni Mormon! Ang mga ehemplo sa espirituhanong paggiya nga nagagikan sa basahon dili maihap.”1
Sa mosunod nga mga asoy, ang mga miyembro nagpakigbahin kon sa unsang paagi nga ilang nakit-an diha sa Basahon ni Mormon ang mga tubag nga ilang gipangita.
Pagsinati og Kausaban sa Kasingkasing
Bisan pa kon siya nakat-on sa ebanghelyo samtang bata pa, si Greg Larsen (ang pangalan giusab) sa California, USA, sa kadugayan nawala sa simbahan. Nalambigit siya sa mga drugas ug krimen ug wala madugay nakita na lamang niya ang iyang kaugalingon diha sa prisohan. Gusto niyang bag-ohon ang iyang kinabuhi apan dili sigurado kon unsaon.
“Ang mga kalalakin-an sa lokal nga ward mitudlo og Sunday School didto sa prisohan,” misulat si Greg. “Usa kanila miingon kanako nga mas monindot ang akong kinabuhi kon magbasa ko sa Basahon ni Mormon. Ug mao kana ang akong gihimo.
“Sa dihang migawas na ko sa prisohan, mibalik ko sa simbahan, apan anaa gihapon nako ang gana nga mobalik sa akong karaang naandan nga mga binuhatan. Samtang nagpadayon ko sa pagbasa sa Basahon ni Mormon, akong nahibaloan ang katawhan ni Haring Lamoni diha sa Alma 19:33, kansang ‘mga kasingkasing nausab; nga sila wala nay tinguha sa pagbuhat og dautan.’ Misugod ko sa pag-ampo alang niining kausaban sa kasingkasing.”
Nakit-an ni Greg ang tubag sa iyang pag-ampo diha sa Helaman 15:7, nga nagtudlo nga “ang hugot nga pagtuo ug paghinulsol nga nagdala og kausaban sa kasingkasing.”
“Samtang nagbasa ko niadto nga mga pulong, ang mga luha midagayday sa akong aping. Ang Espiritu mipamatuod nga ang akong Langitnong Amahan nahigugma kanako ug motabang kanako. Gibati nako nga kon ako adunay igong hugot nga pagtuo nga makig-istorya sa akong bishop, igo na kini. Sa dihang akong gitugyan ang akong mga sala sa tiilan sa Manluluwas, nakadawat ko og tinuod nga kausaban sa kasingkasing.”
Pagkaplag sa Iyang Dalan
Si Laura Swenson sa Idaho, USA, mipauli sa balay usa ka adlaw niana nga nasagmuyo ug naghilak. Wala pa siya naminyo, ug ang iyang mga plano alang sa kolehiyo ug ang trabaho nga iyang gipangandoy napakyas. “Naghunahuna ko kon aduna pa ba kaha koy mapadulngan,” misulat siya.
“Naaghat ko sa pagdangup ngadto sa Basahon ni Mormon. Sa unang upat ka mga bersikulo sa 1 Nephi 18, akong nakit-an ang tubag sa akong mga problema. Kini nga mga bersikulo naghulagway sa barko nga gihimo ni Nephi aron sakyan sa iyang pamilya padulong sa gisaad nga yuta. Kini ‘talagsaon nga pagkahimo’ ug wala gihimo ‘subay sa paagi sa mga tawo’; apan, kini gihimo ‘sumala sa paagi diin gipakita sa Ginoo’ (mga bersikulo 1–2). Si Nephi kanunay nga nangayo og tambag sa Ginoo samtang naghimo sa barko. Sa dihang nahuman na ang barko, ‘kini maayo, ug … ang pagkahimo niini hilabihan ka maayo kaayo’ (bersikulo 4).
“Akong naamgohan nga ang akong kaugalingong panaw ‘talagsaon nga pagkahimo.’ Wala kini mahaum sa mga sumbanan sa mga tawo apan modala kanako kon asa ko kinahanglan nga moadto kon mangayo ko og giya sa Ginoo. Kini nga mga bersikulo usa ka lamdag sa kahayag diha sa mangitngit nga panahon. Ang akong mga problema wala matapos sa usa ka gabii, apan akong nakaplagan ang panglantaw nga akong gikinahanglan. Ako anaa na karon sa nindot kaayo nga trabaho nga wala gayud nako planoha.”
Pagdiskubre sa Laing Tugon
Isip usa ka batan-ong lalaki, si Adrián Paz Zambrano sa Honduras nahibulong kon ngano nga ang Biblia naghisgut man lang sa dapit libut sa Jerusalem ug naghunahuna kon si Jesukristo mibisita ba sa uban nga mga nasud.
“Mga katuigan ang milabay duha ka mga misyonaryo sa Ang Simbahan ni Jesukristo sa mga Santos sa Ulahing mga Adlaw miabut sa akong panimalay,” misulat si Adrián. “Sila mipakita kanako sa Basahon ni Mormon ug midapit kanako sa pagbasa sa 3 Nephi, nga naghisgut mahitungod sa pagbisita ni Kristo sa Amerika.
“Samtang nagbasa ko, akong nahinumduman ang akong mga pangutana sa dihang batan-on pa ko. Akong nakit-an ang mga tubag. Tungod sa Basahon ni Mormon, akong nahibaloan nga si Jesukristo mibisita sa Amerika human sa Iyang Pagkabanhaw. Napuno ko sa kalipay tungod kay akong nasayran nga ang Dios nahigugma sa tanan Niya nga mga anak dili igsapayan ang nahimutangan o kahimtang.”
Si Adrián ug ang iyang asawa nagdungan og ampo aron masayud kon ang Simbahan tinuod ba, ug ang duha nakadawat og pagpamatuod. Nabunyagan sila ug nakumpirmahan, ug usa ka tuig ang milabay ang ilang pamilya nabugkos didto sa templo.
Pagsangkap sa Iyang Pamilya
Sa edad nga 30, si Eric James sa New Mexico, USA, nahibaloan nga adunay sakit sa kidney. Isip usa ka batan-ong amahan, naguol kaayo siya ug naghunahuna kon makasangkap pa ba siya sa iyang pamilya.
Nabasahan niya sa Basahon ni Mormon nga si Nephi naghunahuna sa samang butang sa dihang nabali niya ang iyang gapasan nga hinimo sa nindot nga asero. Human sa paghimo og usa ka gapasan nga gikan sa kahoy, si Nephi nakapakaon na usab sa iyang pamilya. (Tan-awa sa 1 Nephi 16:18–23, 30–32.)
“Ang istorya ni Nephi milukop sa akong kalag sama sa usa ka silaw nga kahayag,” miingon si Eric. “Ang kahimsog nga akong gitagamtam hangtud nianang higayuna susama sa asero nga gapasan ni Nephi. Sa dihang ang akong kahimsog nadaut, daw sama kini nga ang akong gapasan nabali. Apan akong naamgohan nga ang Ginoo mipanalangin kanako og kahoy nga gapasan pinaagi sa usa ka kidney transplant. Ang transplant makahatag kanako og kalig-on sa pag-amuma sa akong pamilya. Kini nakahatag kanako og paglaum. Hapit 10 ka tuig ang milabay, nagpadayon ko sa pagsangkap sa akong pamilya ug pagserbisyo sa Ginoo kutob sa akong mahimo.”
Pagtudlo sa mga Bata og Pagkamasulundon
Sa dihang ang iyang mga anak mga bata pa, si Juan Jose Resanovich sa Argentina mopakli sa Basahon ni Mormon kon siya adunay mga pangutana kon unsaon pagtudlo ug pagpadako sa iyang mga anak. “Ang akong asawa ug ako misiksik sa mga pahina niini alang sa pagdasig nga magamit alang sa among mga anak, ug kami sa kanunay nakakita og mga tubag,” siya misulat.
Ang mga Resanovich mitudlo sa ilang mga anak og pagkamasulundon pinaagi sa pagpunting kanila ngadto sa ehemplo ni Nephi diha sa 1 Nephi 3:5–6:
“Ang imong igsoon nga mga lalaki nagbagulbol, nag-ingon nga kini usa ka malisud nga butang nga ako mipabuhat kanila; apan tan-awa ako wala magsugo niini ngadto kanila, apan kini sugo sa Ginoo.
“Busa lakaw, akong anak, ug ikaw pagabuligan sa Ginoo, kay ikaw wala magbagulbol.”
“Gitudloan namo ang among mga anak nga si Nephi mitahud sa iyang yutan-on nga mga ginikanan ug sa mga butang sa Dios,” misulat si Juan. “Kami mihimo og tumong nga isip usa ka pamilya among batunan ang kinaiya ni Nephi sa pagtahud ug pagkamasulundon.
“Matag usa sa among mga anak miserbisyo og misyon. Wala na kinahanglana nga kami modani kanila sa pagserbisyo. Nahimo silang buotan nga mga estudyante, buotan nga mga higala, ug buotan nga mga anak. Ang among pamilya adunay daghan pa nga angayang palamboon, apan ang Basahon ni Mormon dako kaayong tabang sa pagkab-ot sa among mga tumong.”
Paglingkawas sa mga Pisi sa Pagkaadik
Samtang nakigbatok sa pagkaadik sa pagkaon, si Susan Lunt sa Utah, USA, nag-ampo alang sa tabang. Midangup siya sa Basahon Mormon ug nabasa nga si Nephi nakalingkawas gikan sa mga pisi nga gigapos sa iyang mga igsoon sa iyang mga kamot ug mga tiil:
“O Ginoo, sumala sa akong hugot nga pagtuo diha kanimo, luwasa ako … ; oo, gani hatagan mo ako sa kusog nga ako makabugto niini nga mga pisi diin ako gigapos.
“Ug nahinabo nga … ang mga pisi nahubad” (1 Nephi 7:17–18).
“Kini nga kasulatan tukma nga naghulagway sa unsay akong gibati—nagapos sa mga pisi sa pagkaadik,” si Susan misulat. “Ang makita nga mga pisi diha ni Nephi dali nga nahubad sa dihang nangamuyo siya alang sa kaluwasan. Ang akong mga pisi dili makita ug wala nako mabuntog ang akong pagkaadik sa usa ka higayon, apan samtang nagbasa ko niadto nga mga pulong, mibati ko nga adunay nausab sulod kanako. Akong gibati nga daw ang mga pisi nga nakahigot sa akong kasingkasing, hunahuna, ug lawas nahubad, ug ako nasayud nga makabuntog ko sa akong pagkaadik.”
Si Susan nakahimo og dakong kalamboan ug, tungod sa pagdasig nga iyang nakita diha sa Basahon ni Mormon, nakahimo sa pagputol sa uban nga naandang mga kinaiya nga migapos kaniya, lakip na ang kasuko, kahakog, ug garbo. “Ako nasayud nga ang Basahon ni Mormon pulong sa Dios,” siya mipasabut, “ug nga ang tubag sa bisan unsa nga mga pangutana sa kinabuhi mahimong makit-an diha sa mga pahina niana nga basahon.”
Mga paghulagway sa litrato pinaagi ni Welden C. Andersen
Sa tuo: gilitratohan ni Christina Smith