Hangad
Usa ka hagit alang kanatong tanan nga dili molingi sa isigka kilid aron masayud kon unsa ang panglantaw sa uban sa atong kinabuhi apan sa paghangad aron masayud kon unsa ang panglantaw sa Langitnong Amahan ngari kanato.
Isip usa ka batan-ong lalaki gitawag ko sa pagserbisyo og misyon sa Hamburg, Germany. Sa Language Training Mission—gipulihan sa missionary training center karon—nanlimbasug ko sa pagkat-on sa pinulongan. Sa una ug dayon sa ikaduha nga semana, nakabantay ko nga ang kauban nako sa akong district mas milambo kay kanako. Samtang sila naglambo sa mas komplikado nga mga konsepto, ang akong dies, ders, ug dases bati pa kaayo.
Nagsugod na ako og kabalaka—ug nawad-an og kadasig. Unsaon nako sa pagserbisyo og malampuson nga misyon kon ako dili makapasabut sa mga tawo nga akong tudloan?
Nag-ampo ko og tabang ug nangayo og panalangin sa priesthood, nga nakahatag og kasiguradoan. Apan ako nagpadayon sa pagsiksik ug panlimbasug, ug usa ka adlaw mibati ko nga mas nakuyawan ug nabalaka. Samtang ang akong kompanyon ug ako nanglakaw paingon sa hawanan, mihunong ko sa gamayng kwarto sa tiglimpyo. Mihangyo ko sa akong kompanyon nga paabuton ko og kadiyot. Misulod ko nianang gamay nga kwarto ug miluhod sa may mop. Misugod ko sa paghangyo og kahupayan sa Langitnong Amahan.
Ang Ginoo mitubag nianang pag-ampo. Kini akong nahunahuna: “Wala Ko ikaw gitawag nga mahimong batid sa pinulongan nga German. Gitawag Ko ikaw aron sa pagserbisyo uban sa imong tibuok kasingkasing, hunahuna, ug kusog.”
Diha-diha dayon ako nakahunahuna, “Makahimo ko niana. Makaserbisyo ko uban sa akong tibuok kasingkasing, hunahuna, ug kusog. Kon kana mao ang gitawag kanako sa Ginoo nga buhaton, Makahimo ko niana.” Mibarug ko nga nahupay pag-ayo.
Sukad nianang higayona, ang akong sukdanan sa paglambo nausab. Wala na nako sukda ang akong kalamboan ug kalampusan basi sa akong kompanyon ug sa ubang mga miyembro sa akong district. Hinoon, akong gihatagan og pagtagad kon unsa ang bation sa Ginoo sa akong gibuhat. Imbis nga motan-aw sa kilid aron sa pagkompara sa akong kaugalingon ngadto sa uban, misugod ko sa paghangad, sa giingon pa, aron masayud kon unsa ang Iyang hunahuna sa akong mga paningkamot.
Wala ko makabantay kon mas paspas o mas maayo ko nga nakat-on sa pinulongan sukad niadto, apan wala na nako mabati ang sama nga kabalaka. Nasayud ko kon unsay gustong ipabuhat sa Ginoo kanako, ug anaa kadto sa akong gahum sa pagbuhat niini.
Pagka buntag misugod ko sa pagpakigtambag sa Langitnong Amahan, nagsulti Kaniya nga wala ko masayud kon unsay mahitabo karong adlawa apan akong buhaton ang akong pinakamaayo. “Bisan unsa man ang akong angayan nga makat-unan, tuguti ko sa pagkat-on niini,” nag-ampo ko, “apan bisan unsa pa man, akong ihatag Kanimo ang akong pinakamaayo karong adlawa.”
Inig ka gabii mag-ampo ko pag-usab sa pagpahibalo unsa ang akong gitun-an ug ang akong nahimo. Gipakigbahin nako sa akong Langitnong Amahan ang akong mga panlimbasug ug ingon man ang akong mga kalampusan. Misugod ko sa pagsalig Kaniya—dili sa uban o gani sa akong kaugalingon—sa pagkumpirmar sa akong kalamboan.
Kana nga leksyon nga akong nakat-unan diha sa gamay nga kwarto sa mga silhig sobra na sa 35 ka tuig ang milabay nagpabilin kanako sa akong tibuok kinabuhi, ngadto sa daghang mga calling ug mga buluhaton. Kon ako sugoon sa pagbuhat og usa ka butang diin ang ekspektasyon ingon og labaw pa kaysa akong abilidad, akong hinumduman kadto nga kasinatian ug moingon sa akong kaugalingon, “Huwat sa. Kinsa ang nagtawag kanimo? Si kinsa ang imong giserbisyohan? Si kinsa ang imong gipaningkamutan nga mahimuot?
Ang kalibutan nga atong gipuy-an karon anaa sa tanang matang sa sukdanan—kadaghanan niini kalibutanon. Sa akong hunahuna ang ingon nga mga sukdanan mahimong lisud sa mga young adult. Moeskwela kamo ug magraduhan, apan kana wala gayud maglakip sa uban pa ninyong mga kasinatian sa lain pa ninyong mga klase o sa inyong pamilya o sa sitwasyon sa inyong kinabuhi. Usahay kita gihukman sa atong hitsura o sa awto nga atong gidrayban. Mahimong atong gibasi ang atong bili sa kaugalingon sa kon pila ka buok mga higala ang nagsulat kanato diha sa mga site sa social networking. Kita mabalaka sa unsay gihunahuna sa uban kabahin sa tawo nga atong gi-date o unsa ang hunahunaon sa mga tawo kon kita magminyo sa dili pa mahuman og eskwela. Dali ra kitang madala sa pagpaningkamot aron mahimuot ang uban, apan dili kita makasalig nianang pisikal nga mga sukdanan; ang kalibutan mahimong dali kaayo nga modayeg ug mosaway.
Sa akong hunahuna ang hagit alang kanatong tanan—tingali ilabi na ngadto sa mga young adult—mao nga dili molingi sa isigka kilid aron masayud kon unsa ang panglantaw sa uban sa atong kinabuhi apan sa paghangad aron masayud kon unsa ang panglantaw sa Langitnong Amahan ngari kanato. Dili Siya motan-aw sa atong hitsura sa gawas apan sa kasingkasing (tan-awa sa 1 Samuel 16:7). Ug Siya nasayud, labaw pa ni bisan kinsa, unsa ang atong gikinahanglan.
Busa sa unsang paagi kita “mohangad”? Ania ang pipila ka mga baruganan nga makatabang.
Gamita ang Espiritwal nga Gahum
Kita makagamit sa espiritwal nga gahum nga atong gikinahanglan sa pagdesisyon pinaagi sa pagsugod sa matag adlaw sa personal nga pag-ampo ug pagtuon sa kasulatan. Kana nga pag-ampo maglakip sa pagpangamuyo nga andam nga modawat sa plano sa Dios alang kanato. Bisan tuod dili nato makita ang tibuok plano, kita makahangyo nga mahimong andam nga modawat sa bahin nianang plano nga mahitabo nianang adlawa. Kon kita andam nga modawat, kita makakita sa mga bunga sa atong mga pagpili sa pagsunod Kaniya. Kita makasunod sa mga impresyon nga atong madawat. Ug kita makahimo sa pagbuhat sa lisud nga mga butang ug sa pagbuhat, alang sa sakto nga mga rason, bisan unsa pa man ang gikinahanglan.
Magpabiling Matinud-anon sa Giya nga Inyong Madawat
Kita “makahangad” pinaagi sa pagpabiling matinud-anon ngadto sa giya nga atong nadawat gikan sa usa ka mahigugmaong Langitnong Amahan pinaagi sa personal nga pagpadayag. Usahay ang uban mopugong kanato sa pagbuhat unsa ang atong nadawat, ug bisan kon sila adunay maayo nga intensyon, kinahanglan kitang magmatinud-anon ngadto sa atong gibati.
Ang akong asawa ug ako adunay anak nga babaye nga nagserbisyo og full-time nga misyon sa Spain. Kini nga anak nga babaye nag-high-school sa New Zealand, samtang ako nagserbisyo isip presidente sa misyon. Sa dihang nag-21 anyos na siya, siya miingon, “Pa, Ma, sa akong hunahuna kinahanglan ko nga moserbisyo og misyon.” Siyempre, nalipay kami niining matarung nga desisyon, apan nasayud nga nahimong sakripisyo alang kaniya nga malayo sa iyang mga higala ug pamilya panahon sa iyang pagkatin-edyer, ako miingon kaniya, “Nakaserbisyo naman ka og misyon.”
Siya mipahiyum ug miingon, “Wala pa, Pa, ikaw hinoon. Karon ganahan ko nga moserbisyo sa Ginoo.”
“OK,” mipahiyum ko. “Magmisyon ka. Sundon nimo kanang aghat nga moserbisyo.”
Karon ako nalipay kaayo nga wala lamang siya moserbisyo sa iyang Langitnong Amahan ug sa Iyang mga anak sa Spain apan siya usab misunod sa impresyon nga iyang gibati. Wala gani ko niya tuguti—usa ka ginikanan nga maayo og katuyoan—sa pagkombinser kaniya sa pagbuhat og lain pang mga butang gawas lang sa iyang gibati nga husto alang sa iyang kinabuhi ug sa plano sa Langitnong Amahan alang kaniya.
Ayaw Kahadlok sa Pagbuhat
Ingon man kaimportante nga makat-on sa plano sa Langitnong Amahan alang sa atong kinabuhi, usahay kita nasobrahan sa pag-focus nga masayran ang matag detalye, gikan sa sinugdanan ngadto sa katapusan, nga kita mahadlok na nga mobuhat. Ayaw pagpadala niini nga lit-ag. Paghimo og maayong mga pagpili pinaagi sa paggamit sa inyong labing maayo nga paghukom ug padayon sa inyong kinabuhi. Kita mapanalanginan samtang kita mohimo og mga desisyon. Ayaw kahadlok sa paghimo og mga pagpili tungod kay kamo mahadlok nga masayop. Ayaw kahadlok sa pagsulay og bag-ong mga butang. Sa pagbuhat niini, kamo makakaplag og hingpit nga kalipay sa inyong panaw.
Magpabilin sa Inyong Gibarugan
Sa dihang ang among pamilya nagpuyo sa New Zealand, usahay kami masanapan sa daghang mga hagit nga nasinati sa mga investigator, bag-ong mga kinabig, mga misyonaryo, ug sa uban. Kanunay namong nakaplagan ang among kaugalingon nga nag-ampo alang sa mga tubag—ug nagpaabut nga dalingmakadawat niini!
Kitang tanan nanginahanglan og tabang. Ug usahay ang mga solusyon nga atong gitinguha moabut dayon. Apan usahay kini moabut sa mga paagi nga wala nato damha. O usahay kini moabut nga dugay pa kaysa atong gihunahuna. Ug usahay, ingon og, dili gayud kini moabut.
Sa ingon nga mga sitwasyon, sunda ang batasan nga “magpabilin sa inyong gibarugan” hangtud ang Ginoo mopadala og tabang, bisan unsa man kini kadugay. Apan ang pagpabilin sa inyong gibarugan wala magpasabut nga dili maglihok. Sama sa akong giingon, ayaw kahadlok sa pagbuhat. Padayon sa pagbuhat og maayong mga butang. Padayon sa pagsunod sa mga sugo. Padayon sa pag-ampo ug pagtuon ug pagbuhat sa inyong labing maayo hangtud nga inyong madawat ang dugang nga giya. Ayaw biyai ang inyong gibarugan. Sa Iyang panahon ang Ginoo motugot sa tanang mga butang nga alang sa inyong kaayohan.
Ang “Paghangad” nakapanalangin sa akong kinabuhi kadaghan sukad sa akong kasinatian sa Language Training Mission. Sama sa gipasabut ni Mormon sa Helaman 3:27, “Ang Ginoo maloloy-on ngadto sa tanan kinsa, diha sa katim-os sa ilang mga kasingkasing, motawag nganha sa iyang balaan nga ngalan.” Nabati ug nasinati nako ang Iyang kalooy ug gugma. Nasayud ko nga ang Iyang kalooy moabut kanatong tanan samtang kita motuo ug mosangpit sa Iyang pangalan.
Mga paghulagway sa litrato pinaagi ni Matthew Reier