Pagmatinud-anon
Sa dihang mga 20 anyos pa ko, kinahanglan kong mokuha og lisud kaayo nga eksamin aron makasulod sa usa ka ilado nga eskwelahan sa patigayon didto sa France. Nagtuon ko og taas nga mga oras matag adlaw sulod sa duha ka tuig. Apan kanunay akong moadto sa simbahan ug sa institute ug mituman sa akong mga responsibilidad sa Simbahan.
Ang labing importante nga bahin sa eksamin mao ang interbyu. Aduna koy interbyu sa usa ka eskwelahan, ug sa dihang ilang nahibaloan nga usa ko ka miyembro sa Simbahan, dili maayo ang nahitabo.
Dayon mikuha ko sa eksamin sa eskwelahan nga ganahan kaayo nako nga adtoan. Human sa pila ka gutlo sa interbyu, ang mga nanginterbyu misugod sa pagpangutana kon unsay akong gibuhat gawas sa akong mga oras sa pagtuon. Nasayud ko nga pangutana kini nga maoy motino kon madawat ba ko o dili. Apan nakahukom dayon ko nga magmatinud-anon ko sa akong mga baruganan.
Miingon ko, “Miyembro ko sa Ang Simbahan ni Jesukristo sa mga Santos sa Ulahing mga Adlaw,” ug dayon migahin ko og 15 minutos sa pagpasabut kon unsay akong gibuhat sa Simbahan.
Ang direktor sa eskwelahan miingon, “Kahibalo ka, malipayon ko nga misulti ka niini. Sa dihang estudyante pa ko, nag-eskwela ko sa Estados Unidos, ug usa sa akong pinakasuod nga higala usa ka Mormon. Maayo siya nga tawo, mabination kaayo nga tawo. Akong gikonsiderar ang mga Mormon nga maayo kaayo nga mga tawo.”
Pagkahayahay sa akong gibati! Usa ko sa unang mga kandidato nianang tuiga nga gidawat niini nga eskwelahan.
Adunay duha ka mga leksyon niini nga istorya. Una, kinahanglang dili nato baliwalaon ang atong impluwensya ngadto sa uban. Ikaduha, kinahanglang kanunay kita nga magmatinud-anon sa atong mga baruganan. Himoa ang inyong pinakamaayong paningkamot, ug ang Ginoo motabang kaninyo sa uban.
Paghulagway sa litrato pinaagi ni David Stoker