Pagserbisyo diha sa Simbahan
Pagpangulo sa Pamaagi sa Ginoo
Sa atong pagserbisyo ug pagdumala diha sa pamaagi nga gimando sa Ginoo, bisan unsa pa man ang atong calling, kita makapanalangin ug mapanalanginan.
Sa dihang si Brother Jones ug ang iyang anak nga lalaki gi-assign sa pag-home teach sa pamilya nga Williams, misugod sila sa paghimo og binuwan nga mga pagbisita. Tungod niadto nga mga pagbisita, si Kim, ang anak nga babaye sa pamilya, nahibalo nga sila nagpakabana kaniya. Daghan siya og mga pangutana kabahin sa ebanghelyo ug nalingaw sa pagpakig-istorya uban kanila.
Usa ka panahon sa ting-init dihang si Kim nanlimbasug nga masayud kon siya aduna bay usa ka pagpamatuod, si Brother Jones, uban sa laing naghupot og Melchizedek Priesthood, gihangyo sa pagtambong sa Young Women camp. Wala madugay si Kim misulti kon unsa ka mahinungdanon ngadto kaniya nga didto ang iyang home teacher. Giingnan niya ang iyang pamilya nga nakabaton siya og pagpamatuod sa gugma sa Manluluwas alang kaniya sa dihang si Brother Jones ug ang laing naghupot sa priesthood, sa iyang hangyo, mihatag kaniya og usa ka panalangin sa priesthood didto sa camp.
Ang iyang mga home teacher, sa pagkatinuod, mga higala sa pamilya nga Williams. Ang ilang impluwensya mahinungdanon ngadto ni Kim ug sa iyang mga ginikanan—ug ngadto sa Ginoo.
Pagpangulo ug mga Calling
Sa kalibutan karon, sagad nga sukdon ang kalamboan sa usa ka tawo pinaagi sa nagkadako nga mga posisyon sa katungdanan diha sa gitrabahoan o pinaagi sa mga umento sa sweldo nga nagtimaan sa nag-uswag nga personal nga kalampusan. Kasagaran magtan-aw kita sa makita nga mga posisyon sa katungdanan isip usa ka timailhan nga ang usa ka tawo usa ka mahinungdanong tigtampo. Dili na ikatingala nga daghang mga tawo ang nanlimbasug nga masayud unsaon gayud pagsukod ang ilang pag-uswag diha sa espirituhanon nga mga butang.
Nakadungog ko og daghang mga Santos sa Ulahing mga Adlaw nga nagduhaduha sa ilang kaugalingong kahimtang tungod kay wala gayud sila matawag sa mga posisyon sa pagpangulo diha sa Simbahan. Apan ang atong kalamboan masukod ba gayud pinaagi sa mga calling sa pagpangulo?
Sa pagkatinuod, ang pagpangulo wala magkinahanglan og usa ka calling. Ang uban nga mga tawo nga naghimo sa makadasig ug makaawhag nga impluwensya nga nagpakita og tinuoray nga pagpangulo nagbuhat sa ingon nga walay calling o posisyon. Ang Doktrina ug mga Pakigsaad 121 nagtudlo og pipila ka importante nga mga leksyon kalabut sa pagpangulo:
“Kita nakakat-on pinaagi sa makapasubo nga kasinatian nga kini mao ang kinaiyahan ug pamaagi sa hapit tanan nga mga tawo, sa diha nga sila makakuha og gamay nga pagtugot, ingon sa ilang gituohan, sila dayon mosugod sa paghimo og dili matarung nga kamandoan.
“Tungod niini daghan ang gitawag, apan pipila lamang ang mga gipili.
“Walay gahum o impluwensya nga makahimo o angay gayud nga magpadayon pinaagi sa hiyas sa pagkapari, gawas lamang sa pagdani, sa pagka-mainantuson, sa kalumo ug kaaghup, ug sa tiunay nga paghigugma;
“Pinaagi sa pagkamabination, ug putli nga kahibalo, diin makapadugang sa hilabihan sa kalag nga walay pagpakaaron-ingnon, ug walay pagpanglimbong” (mga bersikulo 39–42).
Sagad nga masaypan nga ang pagpangulo mao ang pagsulti sa mga tawo kon unsay buhaton. Kana ang makamugna og dili matarung nga kamandoan. Dili angay nga moingon, “Kinahanglan gayud ninyong buhaton ang akong gisulti tungod kay ako (kinsa naghupot sa priesthood o gitawag sa priesthood) nagsulti niini.” Usa ka importante nga leksyon sa seksyon 121 mao nga ang tinuod nga lider dili mohatag og mando ug magdahum nga sundon kini tungod lamang sa posisyon. Apan, ang priesthood nga pagpangulo mao ang mahitungod sa pagdapit. Ang usa ka mabination nga pagdapit, pinasikad sa putli nga kahibalo ug tiunay nga gugma, sa kanunay mao ang mas maayo nga pag-awhag kay sa “Tungod kay ako nagsulti niini.”
Tinuod kini nga ang mga lider kinsa hilig sa paghatag og mga mando daghan og mahimo. Apan wala sila nagdumala sa pamaagi nga gipadayag sa Ginoo. Ug wala nila palamboa ang kaugalingnon nga abilidad ug pagsalig nga kinahanglang maanaa niadtong ilang gidumala.
Tinuod nga Pagpangulo
Timan-i nga ang usa ka calling o posisyon sa awtoridad wala gisulat diha sa mga bersikulo 41 o 42 isip usa sa saktong mga paagi sa paggamit sa gahum o impluwensya. Hinoon, ang gahum ug impluwensya sa usa ka tinuod nga lider gamiton pinaagi sa pagdani, sa pagka-mainantuson, sa kalumo, kaaghup, tiunay nga gugma, pagkamabination, ug putli nga kahibalo. Kini nga mga kinaiya sa tinuod nga pagpangulo mahimong mapakita sa tanan, bisan unsa pa man ang calling o posisyon.
Ang mga calling sa pagpangulo susama gayud sa mga ligid sa pagbansay diha sa usa ka bisikleta. Ang mga ligid sa pagbansay nagtugot sa usa ka bata sa pagkat-on unsaon pagbalanse ug pagsakay nga may pagsalig. Ang usa ka calling sa pagpangulo nagbutang sa mga tawo diha sa usa ka kahimtang nga makat-on unsaon sa paghigugma, pagpailub, ug pagdani pinaagi sa putli nga kahibalo ug pagkamabination. Sila mahimo usab nga makat-on nga ang bisan unsa nga pagsulay sa pagpugos sa kinaiya pagaubanan sa pagkawala sa Espiritu ug pagkunhod sa pagka-epektibo.
Human sa atong pagka-release, atong masayran kon kita milambo ug nakat-on ba samtang diha pa sa atong calling. Nakat-on ba kita sa paghigugma ug pagserbisyo sa uban nga dili lang tungod sa calling? Nakat-on ba kita sa pagserbisyo uban sa gahum isip impluwensya alang sa kaayohan tungod lamang sa unsay nahitabo kanato?
Ang Ginoo balik-balik nga motawag kanato sa tibuok natong kinabuhi. Nasayud Siya sa atong kasingkasing. Siya motawag kanato kon Siya magkinahanglan sa atong piho nga mga kahanas, kahibalo, o kasensitibo ngadto sa Espiritu. Siya motawag kanato sumala sa atong kaandam sa pagpaminaw sa Iyang tingog ug sa paghigugma sama sa Iyang paghigugma.
Kon kita makat-on nga mahimong impluwensya alang sa kaayohan diha sa pamaagi sa Ginoo, kita mamahimong mga tawo kinsa modasig sa uban tungod lamang kay ingon kita niana. Ang mga calling dili mao ang nag-unang rason sa atong maayong impluwensya. Apan, kon hangyoon, moserbisyo kita og maayo kon asa kita ma-assign diha sa Simbahan.
Bisan kon kita nagserbisyo diha sa Sunday School o diha sa mga programa sa mga kabatan-onan, isip home teacher o visiting teacher, o bisan bishop o presidente sa Relief Society, ang atong serbisyo ngadto sa uban mao ang usa ka pagpahayag sa atong gugma sa Manluluwas. Samtang kita nagserbisyo ug nagdumala sa pamaagi nga Iyang gimando, bisan unsa pa man ang atong calling, kita makapanalangin ug mapanalanginan.
Paghulagway sa litrato dili mahimong pakopyahan