Mga Young Women, Tindog ug Pakita
Ang tema sa Mutual karong tuiga usa ka tawag alang kaninyo nga mahimong lider. Usa kini ka tawag alang kaninyo sa pagpangulo diha sa kaputli, kaligdong, ug kabalaan. Usa kini ka tawag sa pag-usab sa kalibutan!
Sa dihang nahimo kamong kabahin sa organisasyon sa Young Women, gihatagan kamo og bulawan ug puti nga kwentas nga porma og sulo nga sul-obon isip pahinumdom sa usa ka batan-ong babaye sa Ang Simbahan ni Jesukristo sa mga Santos sa Ulahing mga Adlaw, mobarug kamo alang sa kamatuoran ug pagkamatarung ug motindog ug mopakita sa inyong kahayag ngadto sa kalibutan. Nagpasabut kana nga magmatinuoron kamo sa inyong balaanong pagkatawo isip bililhong anak nga babaye sa Dios. Nagpasabut kini nga kamo maningkamot nga mobarug nga saksi Kaniya ug sa Manluluwas “sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).
Kami naglaum nga karong tuiga inyong sul-obon ang inyong kwentas nga porma og sulo sa mapasigarbuhong paagi sa pagpahinumdom sa inyong kaugalingon nga kamo usa ka ehemplo niadtong anaa sa inyong palibut. Kamo “mopakita sa inyong kahayag” samtang kamo mag-ampo sa matag adlaw, mobasa sa Basahon ni Mormon, motuman sa mga sumbanan diha sa Alang sa Kalig-on sa mga Kabatan-onan, ug mopahiyum. Kami nasayud nga samtang kamo motuman sa mga sugo ug mosunod sa mga sumbanan nga makita diha sa Alang sa Kalig-on sa mga Kabatan-onan, inyong mapadan-ag ang hingpit nga kalipay ug mahimong sarang nga magiyahan sa Espiritu Santo. Kining giya makapahimo sa matag usa kaninyo sa pagbuhat og mga pagpili nga makatabang kaninyo nga mahimong takus nga modawat og temple recommend.
Isip kinatibuk-ang kapangulohan sa Young Women, kami mopamatuod nga samtang magbuhat kamo niini nga mga butang, ang Manluluwas maanaa aron sa pagdan-ag sa inyong agianan. Siya misaad kaninyo, “Ako usab mao ang inyong kahayag … ; ug Ako moandam og agianan alang kaninyo, kon kini mao nga kamo mohupot sa akong mga sugo; … ug kamo mahibalo nga pinaagi kanako kamo pagatultulan” (1 Nephi 17:13).