Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening.Ang mosunod mao ang pipila ka mga ehemplo.

“Pag-ila sa Kamot sa Dios sa Atong Inadlaw-adlaw nga mga Panalangin,” pahina 24: Ikonsiderar ang pagbasa sa Pag-ampo sa Ginoo (tan-awa sa Mateo 6:9–13) ug sa pagpangutana sa inyong pamilya kon sa ilang hunahuna unsay ipasabut sa “hatagi kami karon sa pagkaon namo sa matag-adlaw.” Dayon i-summarize ang una nga seksyon sa artikulo, diin gihisgutan ni Elder Christofferson ang “pagkaon sa matag adlaw.” Ikonsiderar ang pagdugang sa inyong pagpamatuod nga si Jesukristo mao ang Tinapay sa Kinabuhi.

“George Albert Smith: Siya Nagpakabuhi sumala sa Iyang Gitudlo,” pahina 32: Si Presidente George Albert Smith “nagtuo nga kon kita adunay tinuoray nga pagpamatuod sa ebanghelyo ni Jesukristo, kini makita sa atong mga kinabuhi.” Ribyuha ang artikulo uban sa inyong pamilya. Tingali mangutana dayon kamo sa mga sakop sa pamilya kon unsay ilang nakat-unan gikan sa ehemplo ni Presidente Smith nga ang uban tagdon uban sa kamabination. Pangutan-a kon unsaon nila sa pagpakita og dugang nga kamabination.

“Hangad,” pahina 42: Ikonsiderar ang pagpaambit sa kasinatian ni Elder Cook isip usa ka batan-ong misyonaryo ug dayon i-summarize ang nahibilin nga seksyon sa artikulo. Pangutan-a ang sakop sa pamilya kon unsaon nila sa pag-focus kon unsa kaha ang hunahuna sa Langitnong Amahan kanila kay sa unsay hunahuna sa uban diha kanila. Mahimo ninyong tapuson pinaagi sa pagbasa sa 1 Samuel 16:7.

“Paghupot sa mga Pakigsaad,” pahina 48: Kon ang usa sa inyong pamilya nangandam sa pag-adto og misyon, tingali manghinaut ka sa pagbasa sa artikulo sa kinatibuk-an niini ug pag-andam og lista sa importanting mga punto nga gihimo ni Elder Holland. Ipasabut og maayo ang pamahayag nga “Ang yawe niini nga buhat anaa sa paghupot sa mga pakigsaad.” Ribyuha kon unsay ipasabut sa pakigsaad ug pangutan-a ang mga bata kon unsaon nila sa pag-andam karon sa paghimo og mga pakigsaad.

“Anaa Siya,” pahina 69: Ikonsiderar ang pagkanta sa “A Child’s Prayer” (Children’s Songbook, 12). Basaha ang mahitungod sa kasinatian ni Sister Wixom uban sa pag-ampo, ug awhaga ang mga sakop sa pamilya sa pagpaambit sa kaugalingon nilang mga kasinatian uban sa personal nga pag-ampo. Mahimo kamong mangutana, “Makahunahuna ba kamo og panahon diin gihupay kamo pinaagi sa pag-ampo?” Tapusa pinaagi sa inyong pagpamatuod kabahin sa pag-ampo.

Makalingaw nga Kalihokan, Mahangturon nga Mensahe

Isip usa ka tin-edyer nagpanuko ako nga mitambong og family home evening. Naghunahuna ko nga duna koy mas maayo pa nga buhaton.

Usa ka Lunes sa gabii, human sa pipila ka lisud nga mga FHE, gitrapohan sa akong mama ang lamesa sa kusina ug mibutang og gamay nga cherry pie sa atubangan namong duha. Mahinamon kong nangita og mga tinidor sa palibut—apan wala! Mipasabut si mama nga kami dunay kontest sa pagkaon og pie, apan kami walay gamiton bisan among kamot. Ang mananaog may katungod sa pagpanghambog.

Nangaon kami paspas kutob sa among mahimo. Sa wala madugay nabulit sa cherry pie ang tibuok lamesa, among tibuok nawong, ug bisan ang among mga buhok. Wala ko kahinumdom kinsay nakadaog, apan nahinumdom ko sa among walay pugong nga pagpangatawa ug sa tinuoray nalingaw sa akong pamilya. Wala nako mamatikdi sa hingpit nianang gabhiona, apan karon akong nakita kon unsa ka nindot kadto nga makabaton og luwas ug mahigugmaong dapit nga gitawag og panimalay ug adunay mga tawo nga nagbantay kanako.

Sigurado ako nga may gikanta kami ug may leksyon nianang gabhiona, ug ang akong mama dugay nga nakahuman sa pagpangandam ug sa pagpanglimpyo. Apan mapasalamaton ako tungod sa usa ka kalingawan nga nagtudlo og mensahe mahitungod sa importansya sa pamilya nga akong gikinahanglan—kaniadto ug sukad niadto.

Heather Mockler Teuscher, California, USA