Mensahe sa Unang Kapangulohan
Pagpuyo og Abunda nga Kinabuhi
Sa pagsugod sa bag-ong tuig, akong hagiton ang mga Santos sa Ulahing mga Adlaw bisan asa nga mohimo og personal, makugihon, makahuluganong pagpangita alang niining akong gitawag og abunda nga kinabuhi—usa ka kinabuhi nga puno og kaabunda sa kalampusan, kaayohan, ug mga panalangin. Sama nga kita nagkat-on og ABC sa eskwelahan, ako motanyag og akong kaugalingong ABC sa pagtabang kanatong tanan nga makaangkon og abunda nga kinabuhi.
Pagbaton og Positibo nga Kinaiya
Ang A sa akong ABC nagpasabut sa attitude [kinaiya]. Si William James, usa ka pioneering nga Amerikanong psychologist ug philosopher, misulat, “Ang dakong rebolusyon sa atong henerasyon mao ang pagkadiskobre nga ang mga tawo, pinaagi sa pag-usab sa kinaiya nga anaa sa kinahiladman sa ilang hunahuna, makapausab sa panggawas nga mga aspeto sa ilang kinabuhi.”1
Daghan kaayong butang sa kinabuhi nag-agad sa atong kinaiya. Ang paagi nga kita mopili sa paglantaw sa mga butang ug sa pagtubag sa uban makahimo sa tanang kalainan. Sa pagbuhat sa atong labing maayo ug dayon sa pagpili nga magmalipayon kabahin sa atong mga kahimtang, bisan unsa pa man kini, makahatag og kalinaw ug katagbawan.
Si Charles Swindoll—tigsulat, magtutudlo, ug Kristiyano nga pastor—miingon: “Ang kinaiya, alang kanako, labaw pa ka importante kay sa … nangagi, … kay sa kwarta, kay sa kahimtang, kay sa mga kapakyasan, kay sa mga kalampusan, kay sa unsa ang gihunahuna, o gisulti, o gibuhat sa ubang mga tawo. Mas importante kini kay sa panagway, pagbaton og talento, o kahanas. Kini makahimo o makaguba og usa ka kompaniya, usa ka simbahan, usa ka panimalay. Ang labing nindot nga butang mao nga kita adunay kapilian matag adlaw kon unsa nga kinaiya ang atong huptan niana nga adlaw.”2
Dili nato makontrol ang hangin, apan atong mapahiangay ang mga layag. Alang sa tumang kalipay, kalinaw, ug katagbawan, kita unta mopili og usa ka positibo nga kinaiya.
Tuhoi ang Inyong Kaugalingon
Ang B alang sa believe [pagtuo]—sa inyong kaugalingon, niadtong nagpalibut kaninyo, ug sa mahangturong mga baruganan.
Pagmatinuoron sa inyong kaugalingon, sa uban, ug sa inyong Langitnong Amahan. Usa ka tawo nga dili matinuoron ngadto sa Dios hangtud nga naulahi na ang tanan mao si Cardinal Wolsey kinsa, sumala ni Shakespeare, nagserbisyo sulod sa dugay nga panahon ngadto sa tulo ka mga hari ug nagpahimulos sa kaadunahan ug gahum. Sa katapusan, siya gikuhaan sa iyang gahum ug mga katigayunan sa usa ka walay pailub nga hari. Si Cardinal Wolsey mituaw:
Kon giserbisyohan lang unta nako ang akong Dios bisan gamay
kaysa akong hari, Sa akong katigulangon
Wala unta ko Niya biyai nga hubo ngadto sa akong mga kaaway.3
Si Thomas Fuller, usa ka English nga pari ug magsusulat sa kasaysayan nga nabuhi niadtong ika-17 nga siglo, misulat niining kamatuoran: “Siya nga wala magsunod sumala sa iyang pagtuo wala gayud motuo.”4
Ayaw limitahi ang inyong kaugalingon ug ayaw tuguti ang uban sa pagkombinser kaninyo nga kamo limitado sa unsay inyong mahimo. Tuohi ang inyong kaugalingon ug dayon magpuyo aron makab-ut ang unsay mahimo ninyong kab-uton.
Inyong makab-ut ang inyong gituohan nga inyong mahimo. Salig ug tuo ug pagbaton og hugot nga pagtuo.
Atubanga ang mga Hagit Uban sa Kaisug
Ang C alang sa courage [kaisug]. Ang kaisug mahimong usa ka maayo ug makahuluganong hiyas kon kini isipon nga dili lang uyon nga mamatay apan usa ka determinasyon sa pagpuyo nga maligdong.
Miingon ang Amerikano nga essayist ug mambabalak nga si Ralph Waldo Emerson: “Bisan unsa ang inyong buhaton, nagkinahanglan kamo og kaisug. Bisan unsa nga inyong gihukman nga padulngan, kanunay adunay mosulti kaninyo nga kamo nasayop. Kanunay adunay mga kalisud nga motumaw aron sa pagtintal kaninyo sa pagtuo nga ang inyong mga kritiko husto. Sa paghimo og usa ka plano nga buhaton [course of action] ug sa pagtuman niini hangtud sa katapusan nagkinahanglan kini og samang kaisug nga gikinahanglan sa usa ka sundalo. Ang kalinaw adunay iyang mga kadaugan, apan kini nagkinahanglan og isug nga mga lalaki ug babaye aron sa pagdaug niini.”5
Adunay mga panahon nga kamo mahadlok ug mawad-an og kadasig. Kamo mahimong mobati nga kamo napildi. Ang purohan nga makab-ut ang kadaugan mora og gamay kaayo. Usahay kamo mobati nga sama ni David nga naningkamot sa pagpakig-away ni Goliat. Apan hinumdumi—si David nakadaog!
Ang kaisug gikinahanglan aron sa paghimo sa unang lakang paingon sa gitinguha nga tumong, apan mas dakong kaisug ang gikinahanglan kon ang usa ka tawo madagma ug kinahanglang mohimo og ikaduhang paningkamot aron sa pagkab-ut niini.
Pagbaton og determinasyon sa pagpaningkamot, sa pag-focus sa pagbuhat sa usa ka takus nga tumong, ug sa kaisug dili lamang sa pag-atubang sa mga hagit nga dili kapugngang moabut apan sa pagbuhat usab sa ikaduhang paningkamot, kon kini gikinahanglan. “Usahay ang kaisug mao ang hinay nga tingog sa pagtapos sa adlaw nga nag-ingon, ‘Akong sulayan og usab ugma.’”6
Unta kita makahinumdom niining mga ABC samtang kita magsugod sa atong panaw ngadto sa bag-ong tuig, magpalambo og positibong kinaiya, usa ka pagtuo nga atong makab-ut ang atong mga tumong ug mga resolusyon, ug ang kaisug sa pag-atubang sa bisan unsang hagit nga moabut kanato. Dayon ang abunda nga kinabuhi atong maangkon.
Pagtudlo gikan Niini nga Mensahe
Ikonsiderar ang pagdapit sa mga sakop sa pamilya sa pagpakigbahin og personal nga mga kasinatian sa dihang ang positibo nga kinaiya, pagtuo sa ilang kaugalingon, o kaisug nakatabang kanila. O dapita sila sa pagpangita og mga ehemplo niining tulo ka mga baruganan diha sa mga kasulatan. Mahimo nga kamo mangandam sa pagtudlo pinaagi sa mainampoon nga paghunahuna og mga kasulatan ug inyong kaugalingong mga kasinatian.
Mga paghulagway pinaagi ni Steve Kropp