Magmahimong usa ka Hayag nga Ehemplo
Mga batan-ong lalaki sa Simbahan—mga deacon, mga teacher, ug mga priest sa talagsaon nga Aaronic Priesthood—inyong gidala nganha kaninyo ang pangalan sa Manluluwas; naghupot kamo sa Iyang balaan nga priesthood; gitawag kamo sa paghimo sa Iyang buhat ug sa pagpanalangin sa tanan nga nakaila kaninyo. Karon ang panahon nga inyong tumanon ang inyong mga katungdanan sa priesthood ug “mopakita sa inyong kahayag” isip “sukaranan alang sa tanan nga mga nasud” (D&P 115:5).
Karon ang panahon nga “pasigaa ninyo ang inyong kahayag sa atubangan sa mga tawo, aron makita nila ang inyong mga maayong buhat, ug dayegon nila ang ang inyong Amahan nga anaa sa langit” (Mateo 5:16). Si Jesukristo mao ang hingpit nga ehemplo. Paningkamot nga makaila Kaniya, mosunod Kaniya, ug mahimong mas mahisama Kaniya pinaagi sa pagsunod sa Iyang mga sugo ug pagtuman sa mga sumbanan sa Simbahan nga gihulagway diha sa Alang sa Kalig-on sa mga Kabatan-onan. Sa inyong pagbuhat, mahimo kamong hayag nga pwersa sa espirituhanong kalig-on niadtong anaa sa inyong palibut.
Ang Ginoo miingon, “Paglimpyo kamo nga nagdala sa mga sudlanan sa Ginoo” (D&P 133:5). Ang inyong moral nga kalimpyo motugot kaninyo sa pagpakita sa inyong kahayag uban sa espesyal nga kahayag sa inyong mga sakop sa ward o branch samtang kamo takus nga nagrepresentar sa Manluluwas sa pagpangalagad sa sagrado nga sakrament ngadto kanila matag Dominggo.
Pagbantay ug pahimusli ang mga oportunidad matag adlaw sa pagserbisyo sa inyong pamilya, mga higala, mga sakop sa korum, ug sa uban. Mahimo kamong malipayon nga tigdumala sa kahayag ngadto kanila ug niadtong kinsa hilum nga nag-obserbar kaninyo.
Pakita sa inyong kahayag uban sa sinsero nga pakighigala ug pagkamabination sa tanan. Ipakigbahin ang talagsaong mga panalangin sa mga kalihokan sa Simbahan ug mga pagtulun-an sa ebanghelyo ngadto sa inyong mga higala. Magmaisugon ug dapita sila nga moduol ngadto sa Kahayag ug Kinabuhi sa Kalibutan—nga mao si Jesukristo.
Kami nahigugma kaninyo. Kami nag-ampo alang kaninyo. Kami mohatag sa pagpamatuod nga ang Ginoo nahigugma kaninyo ug nagkinahanglan kaninyo sa pagtabang sa pagtukod sa Iyang gingharian. Karon ang panahon alang kaninyo nga “motindog ug mopakita sa inyong kahayag” isip naghupot sa Iyang balaang priesthood. Sa inyong pagpalambo niining priesthood ug sa pagtuman sa inyong katungdanan ngadto sa Dios, ang inyong kahayag mahimong “usa ka sukaranan alang sa tanan nga mga nasud.”