Ang mga Center sa Young Adult Naglig-on sa Nagtubo nga Henerasyon
Ang mga center sa Simbahan alang sa mga young adult wala lamang manalipod sa nagtubo nga henerasyon gikan sa mga tintasyon sa kalibutan—nag-andam usab kini sa kasamtangan ug sa umaabut nga mga lider sa Simbahan sa pag-usab sa kalibutan.
Isip mga ekstensyon sa programa sa institute, ang mga center alang sa mga young adult—nga unang natukod sa Europe—nagtanyag og mga klase sa relihiyon ingon man usa ka dapit diin ang mga young adult magkapundok alang sa lain-laing mga kalihokan gikan sa pagpangluto og panihapon ngadto sa paghimo sa homework dayon sa pagdula og Ping-Pong ngadto sa pagpaambit sa ebanghelyo.
Pagpalambo sa Simbahan pinaagi sa mga Young Adult
Dapit sa katapusan sa tuig 2003, ang inisyatibo alang sa mga center para sa mga young adult nagsugod sa upat ka center nga giablihan didto sa Copenhagen, Denmark; ug Berlin, Hamburg, ug sa Leipzig, Germany. Si Elder L. Tom Perry sa Korum sa Napulog Duha ka mga Apostoles dugang pa nga nag-awhag sa kalamboan sa maong inisyatibo dihang si Presidente Gordon B. Hinckley (1910–2008) mitawag kaniya sa pagdumala sa Europe Central Area niadtong 2004.
Sumala ni Erik Psota, kasamtangan nga kaubang area director sa mga seminary ug institute sa Europe, nga daghan sa mga lider sa priesthood karon didto sa Europe nanag-edad og ubos sa 30 nianang panahona.
“Ang espirituhanong impresyon nga miabut kang Elder Perry nga ang kalamboan sa Simbahan sa Europe moabut pinaagi sa nanag-edad og 18 ngadto sa 30 adunay dakong epekto sa mga young adult ug sa mga lider sa priesthood sa tanang kahimtang sa Europe,” miingon si Brother Psota. Ang impresyon ni Elder Perry may kalabutan gihapon sa mga young adult karon, mipadayon siya, “tungod kay nagtabang kini kanilang makasabut sa ilang responsibilidad sa kalamboan sa Simbahan.”
Karon duna nay kapin sa 140 ka mga center sa Europe, uban sa dugang pa nga 30 nga gitrabaho pa. Kining tanan giandam sa nagtubo nga henerasyon sa pagsangyaw sa ebanghelyo sa kalibutan.
Ang Pagtukod sa Gingharian ug Panaghigalaay sa Norway
Ang center sa young adult sa Oslo, Norway, usa lang sa daghang mga center diin ang mga young adult nagkat-on kon unsaon sa pagtukod sa gingharian. Pananglitan si Mathilde Guillaumet, taga-France. Ang mga misyonaryo nagsugod sa pagtudlo kaniya didto sa usa ka center sa Paris niadtong 2009 human ang higala ni Sister Guillaumet midapit kaniya sa pagkat-on og dugang mahitungod sa ebanghelyo.
Si Sister Guillaumet gibunyagan niadtong 2010 ug dayon mibalhin sa Norway sulod sa usa ka tuig, diin ang lokal nga center alang sa mga young adult padayon nga nahimong himan sa paglambo sa iyang pagpamatuod.
“Ang center sa tinuoray usa ka panimalay nga layo sa panimalay. Mas maabi-abihon kini kay sa akong giabangan nga kwarto,” miingon si Sister Guillaumet. “Ang magtiayon nga misyonaryo sa center nahimong sama sa mga ginikanan—talagsaong mga tawo nga maadtoan alang sa kahupayan ug tambag. Didto sa Paris ug sa Oslo, nakaadto ko sa magtiayong mga misyonaryo sa paghisgot mahitungod sa ebanghelyo, nga dili nako mahimo sa amoa, sa pagkonsiderar nga ako lamang ang miyembro sa akong pamilya.”
Si Sam Basnet, nabunyagan usab niadtong 2009, mao ra usab ang miyembro sa iyang pamilya. Ang paghimo sa misyonaryo nga buhat didto sa center sa Oslo nakatabang sa iyang pagpaambit sa ebangheyo ngadto sa iyang mga ig-agaw dihang miuli siya sa pagbisita kanila sa Nepal. Iya silang gisultihan mahitungod sa priesthood ug sa Basahon ni Mormon, kay nakatabang na sa mga misyonaryo sa pagtudlo og ubang mga tawo sa mao gihapon nga mga baruganan sa Oslo.
“Ang akong pamilya gustong makabatyag sa samang pagbati nga akong nabatyagan,” miingon si Brother Basnet. “Ilang nakita ang kalainan tali ni ‘Sam kaniadto’ ug si ‘Sam human niadto.’ Kaniadto, wala akoy paglaum. Dili ako positibo. Human sa akong bunyag, mag-adtoan ko sa center ug ang mga butang mas taas kay sa kaniadto.”
Dili lang kay si Brother Basnet ra ang mibati nga nabayaw ug nadasig sa Espiritu didto sa center. Si Benjamin Kerr sa Scotland migahin sa duha niya ka summer sa pagtrabaho sa Oslo ug nakita ang center nga usa ka dapit diin nahinumdom siya kon unsa gayud ang nanghitabo.
“Ang center mao ang akong kadangpan gikan sa kalibutan,” miingon si Brother Kerr. “Dili ikalimod nga akong bation ang kalinaw, ang kasiguroan, kon tua ko didto. Sa akong pagtuo ang pipila sa pinaka-makadasig nga mga kasinatian miabut tungod kay ako nakalingkod niana nga center, ilabi na atol sa family home evening, ug sa paghisgot og mga butang nga mahitungod gayud kanamo, mga butang nga nakita namong malisud. Kini nga mga kasinatian nagpahinumdom kanako sa importansya sa yano nga mga baruganan sa ebanghelyo.”
Paglig-on sa mga Young Adult ug Umaabut nga mga Lider
Ang mga center alang sa mga young adult makahimo og daghan sa pagtabang sa kabatan-onan nga maglig-on sa ilang mga higala ug pamilya diha sa ebanghelyo. Naghimo kini og lig-on nga mga lider. Ang mga young single adult gitawag sa pagserbisyo sa mga council sa puli-puli nga pagpangulo diha sa mga center ug pagplano og lain-laing mga kalihokan ug mga klase.
Ang ingon nga kasinatian mihatag kang Barbara Matovu, lumad nga taga-Uganda apan karon lumulupyo na sa Norway, “sa oportunidad nga masinati ang gugma sa Dios alang sa Iyang tanang mga Anak,” miingon siya. “Nakalig-on kini sa akong pagpamatuod sa organisasyon sa Simbahan. Nakatudlo usab kini kanako nga ang gingharian sa Dios dili matukod nga mag-inusara, apan sa pagtinabangay, diha sa paghiusa.”
Samtang ang mga young adult nakadawat og mga training aron makaserbisyo sa umaabut nga mga calling sa Simbahan, nag-angkon usab sila og kasinatian nga makatabang nga mahimong epektibong mga kapikas ug mga ginikanan. Maandam sila aron sa pag-usab sa kalibutan dili lang sa pangpubliko nga dapit apan sa panimalay usab.
“Ang mga baruganan sa pagpangulo nga nakat-unan atol sa council sa young single adult mao gihapon nga mga baruganan ang maghimo sa mga young single adult nga maayong mga ginikanan—pailub, komunikasyon, paghatag og direksyon ug pagtugot sa mga tawo nga mogamit sa ilang kagawasan sa pagtuman sa ilang tahas, ug pagsunod sa mga pag-aghat sa Espiritu,” miingon si Gerald Sorensen, kinsa, uban sa iyang asawa, nga si Nancy, miserbisyo sa center sa Trondheim, Norway.
Ang mga center alang sa mga young adult magpadayon sa pagpakigbisog batok sa nagkadugang nga kasal-anan sa kalibutan pinaagi sa pagtrabaho aron masiguro nga ang umaabut nga mga lider sa Simbahan mas dali nga molambo.
“Ang mga young adult moadto sa center aron makakat-on sa ebanghelyo dili lamang sa teyoriya apan pinaagi usab sa paggamit sa mga baruganan sa pagpaambit sa ebanghelyo ug pagserbisyo sa ilang mga higala kinsa dili sakop sa atong tinuohan,” miingon si Brother Psota. “Ang mga center nagtabang sa bag-o ug maayong pagkaandam nga henerasyon sa pagserbisyo sa Ginoo uban sa kahinam ug mahangturon nga panglantaw.”
Ang mga center alang sa mga young adult mao ang pundukanan diin ang nagtubo nga henerasyon makaandam sa pag-impluwensya sa kalibutan pinaagi sa mensahe sa ebanghelyo.
© 2008 Robert Casey