Anaa sa mga Balita
Ang Internet Moabut na sa mga Meetinghouse sa Tibuok Kalibutan
Ang Simbahan nagplano nga maghimo og kusog nga Internet, uban sa opsyonal nga wireless access, nga magamit sa 85 porsyento nga mga meetinghouse sa tibuok kalibutan.
Ang mga miyembro makagamit sa Church’s employment site ug makaapil sa buhat sa family history gikan sa ilang mga meetinghouse; Ang mga lider sa Simbahan makahimo sa pagdumala sa mga rekord, mosumiter sa mga aplikasyon sa misyonaryo, ug moapil sa mga leadership training broadcast; ug ang mga magtutudlo makagamit sa hinimo sa Simbahan nga mga media diha sa internet aron ikasuplementar sa ilang mga leksyon.
Ang Simbahan Mitanyag og Tabang sa Kagutom sa East Africa
Uban sa kapin sa 11.5 ka milyon ka tawo sa Eastern Africa nga dinaliang nanginahanglan og tabang taliwala sa kanihit sa pagkaon, ang Simbahan nakigtambayayong sa lain-laing mga organisasyon aron pagtanyag og kahupayan sa gipanggutom pinaagi sa paghatag og pagkaon, medisina, mga suplay nga panglimpyo sa lawas, ug mga pangtabil.
Ang mga miyembro nga nagtinguha sa pagtabang sa paningkamot makahatag og donasyon ngadto sa humanitarian fund.
Bag-ong In-field Training sa mga Misyonaryo Nakadugang og Kasinatian sa MTC
Ang paningkamot nga gisugdan niadtong Agosto 2011 nagdugang og 12 ka semana nga training sa mga misyonaryo nga bag-o lang mibiya sa missionary training center.
Si Richard Heaton, direktor sa Provo MTC, mipasabut nga ang in-field training dili bag-o nga programa, apan hinoon usa ka ektensyon sa training nga nadawat sa mga misyonaryo sulod sa MTC.
“Ang Unang 12 ka Semana nga manwal nagtudlo sa mga trainer ug sa ilang bag-ong misyonaryo nga kompanyon ngadto sa kapanguhaan diha sa Isangyaw ang Akong Ebanghelyo nga ila kaayong gikinahanglan sa unang 12 ka semana,” miingon siya. “Usa kini ka mapa kon unsaon sa … pagkahimong hingpit nga mapuslanon isip mga sinugo sa Ginoo nga mas dali kutob sa mahimo.”
Ang mga mission president magsugod dayon sa pag-implementar sa in-field training nga mga materyal alang sa mga misyonaryo—nga maglakip sa tulo ka pang-training nga mga dokumento ug bag-ong segment sa video alang sa kompanyon nga pagtuon diha-diha dayon.