Pagtuman sa mga Pakigsaad
Usa ka Mensahe alang Niadtong Moserbisyo og Misyon
Gikan sa usa ka sa sibya sa satellite sa pamulong kabahin sa misyonaryo nga gihatag niadtong Abril 25, 1997.
Ang yawe niini nga buhat anaa sa pagtuman sa mga pakigsaad. Walay lain nga paagi nga atong maangkon ug mapakita ang mga gahum sa pagkadiosnon.
Ako mamulong kaninyo kabahin sa kamahinungdanon kaayo sa pagtuman sa mga pakigsaad—ako magtuman sa akoa ug kamo magtuman sa inyoha. Kini usa ka hilisgutan nga mas lapad pa kaysa diskusyon sa pagkamasulundon, bisan tuod ang pagkamasulundon siguradong kabahin niini. Ug kini hilabihan ka personal nga hilisgutan.
Sa ingon usa ka mahinungdanon kaayo nga butang nga kita makahisgut diha sa plano sa ebanghelyo, tungod kay ang mihimo ug mituman lamang sa mga pakigsaad mao ang makaangkon sa talagsaong mga panalangin sa celestial nga gingharian. Oo, kon kita maghisgut kabahin sa pagtuman sa mga pakigsaad, kita naghisgut kabahin sa kasingkasing ug kalag sa atong katuyoan sa pagkamortal.
Ang Pagtukod sa Gingharian Usa ka Pakigsaad matag Higayon
Ang pagkigsaad usa ka kinahanglanon nga espirituhanong kontrata, usa ka sagrado nga saad ngadto sa Dios atong Amahan nga kita magpakabuhi ug maghunahuna ug maglihok sa usa ka piho nga paagi—ang paagi sa Iyang Anak, ang Ginoong Jesukristo. Isip ganti, ang Amahan, ang Anak, ug ang Espiritu Santo nagsaad kanato sa talagsaong kanindot sa kinabuhing dayon.
Kini nakapainteres kanako nga ang mga pakigsaad gihimo sa personal, indibidwal nga paagi. Adunay pakigsaad panahon sa bunyag ug kumpirma, nga nakapasugod kanato diha sa dalan sa kinabuhing dayon. Kini nga mga ordinansa ipahigayon alang sa matag indibidwal, tagsa-tagsa, dili igsapayan kon pila ang modawat niini sa katapusan.
Adunay pakigsaad sa higayon nga ang lalaki modawat sa priesthood. Kanang pagtugyan kanunay gihatag sa usa ka indibidwal matag higayon.
Ang labing taas nga mga pakigsaad nga mahimo natong buhaton anaa sa templo. Didto kita mohimo sa atong labing sagrado nga mga saad ngadto sa atong Amahan sa Langit ug diin Siya mopadayag kanato sa tinuoray nga kahulugan sa Iyang mga saad ngari kanato. Usab, kini mga indibidwal nga mga kasinatian, bisan kon kita moadto sa templo aron mabugkos ngadto sa laing mga indibidwal.
Mao kana ang paagi nga ang gingharian sa Dios natukod—usa ka tawo matag higayon, usa ka pakigsaad matag higayon, ang tanang dalan sa mortal nga panaw paingon ngadto sa labing taas nga mga pakigsaad sa balaang templo.
Ang Bahin [Role] sa mga Pakigsaad sa Templo
Importante gayud alang kaninyo nga makasabut nga ang pag-adto sa templo alang sa inyong kaugalingon nga endowment, lakip ang talagsaong mga ordinansa nga nag-andam kaninyo alang nianang endowment, mga mahinungdanon nga mga bahin sa inyong pag-andam ug pasalig sa inyong misyon.
Kon kamo moadto sa templo, kamo mosugod sa pagsabut sa kamahinungdanon niadtong mga pakigsaad sa templo, ang dili mabadbad nga sumpay tali sa inyong endowment ug sa inyong kalampusan isip misyonaryo.
Sa tinuod, ang pulong gayud nga endowment nagpasabut sa kahulugan nianang mahinungdanon nga sumpay. Ang endowment usa ka gasa. Kini adunay sama sa ugat sa pinulongan nga dowry, nga usa ka espesyal nga gasa sa bag-ong managtiayon diha sa ilang kaminyoon. Sa dihang presidente pa ako sa Brigham Young University, migahin ko og panahon sa pagpaningkamot sa pagtukod sa endowment sa unibersidad, ang tipiganan sa mga gasa gikan sa manggihatagong mga donor.
Kini mao ang gibuhat sa Dios alang kanato sa matag higayon nga kita mohimo og pakigsaad ngadto Kaniya. Siya nag-endow kanato. Kita nagsaad sa pagbuhat og piho nga mga butang, depende sa ordinansa, ug Siya nagsaad og espesyal nga gasa isip ganti—talagsaong mga gasa, dili mahulagway nga mga gasa, hapit dili matukib nga mga gasa. Busa ako mosulti nganha kaninyo ingon usab sa akong kaugalingon—kon kita gusto gayud nga magmalampuson sa atong mga calling, kon gusto nato ang access sa matag tabang ug matag kaayo ug matag panalangin gikan sa Amahan, kon kita gusto nga ang pultahan sa langit bukas kaayo alang kanato aron kita makadawat sa gahum sa pagkadiosnon, kita kinahanglang motuman sa atong mga pakigsaad!
Kamo nasayud nga dili kini ninyo mahimo nga kamo lang. Nagkinahangkan kita sa tabang sa langit; nagkinahanglan kita sa mga gasa sa Dios. Siya mitudlo niini sa sinugdanan gayud sa buhat niining dispensasyon. Sa pagtudlo “sa pagluwas sa Zion,” ang Ginoo miingon:
“Aron sila unta sa ilang mga kaugalingon makaandam, ug aron ang akong mga katawhan matudloan unta sa labaw nga hingpit, ug makabaton og kasinatian, ug masayud sa labaw nga hingpit mahitungod sa ilang katungdanan, ug sa mga butang diin Ako nagkinahanglan diha sa ilang mga kamot.
“Ug dili kini mahitabo hangtud ang akong mga anciano matugahan sa gahum gikan sa kahitas-an.
“Kay tan-awa, Ako nag-andam og usa ka mahinungdanon nga pagtuga ug panalangin nga ibu-bu diha kanila, kon sila magmatinud-anon ug mopadayon diha sa pagkamapainubsanon diha sa akong atubangan” (D&P 105:10–12).
Kini nga buhat seryoso kaayo ug ang pagbatok sa kaaway niini hilabihan gayud nga kita nagkinahanglan sa matag balaanong gahum sa pagpalambo sa atong paningkamot ug sa pagpalig-on sa Simbahan. Ang yawe niana alang kanato isip mga indibidwal mao ang pakigsaad nga atong gihimo sa templo—ang atong saad sa pagsunod ug pagsakripisyo, sa pagpahinungod ngadto sa Amahan, ug sa Iyang saad sa paghatag kanato sa “usa ka talagsaon nga endowment.”
Mga Pakigsaad ug ang Buhat sa Ginoo
Kini ba makatabang kanimo nga makakita kon unsa gayud kamahinungdanon sa atong personal, indibidwal nga mga saad sa tibuok bahin ug kaanindot sa buhat? Sama sa ubang mga butang diha sa plano sa kaluwasan, ang kalampusan sa tanang mga elder ug sister sa tibuok kalibutan gitino sa usa ka misyonaryo matag higayon.
Kita dili mohimo og mga pakigsaad isip tibuok ward o stake. Dili, kita mohimo og mga pakigsaad sama nila ni Brother Brown o Brother Burns, Sister Jones o Sister Jensen. Ang yawe niini nga buhat mao ang pagtuman sa mga pakigsaad sa matag indibidwal.
Wala ko masayud kon asa nga misyon kamo nagserbisyo, apan dili ko motuo nga ang atong Amahan sa Langit naghimo og piho nga saad sa inyong misyon isip tibuok misyon. Nasayud ako nga Siya mihimo og talagsaong mga saad nganha kaninyo sa personal nga paagi.
Kon ang tibuok misyon nagkahiusa pinaagi sa kalig-on sa integridad sa matag misyonaryo, sa personal nga pagtuman sa mga pakigsaad sa matag misyonaryo, kita makabalhin og mga bukid. Kon adunay ingon nga panaghiusa ug gahum, ang endowment gikan sa langit, moabut sa matag indibidwal diha sa misyon, walay “makapugong sa buhat sa paglambo.” Sa mao nga paagi ang “kamatuoran mopadayon nga maisugon, mahalangdon, ug gawasnon.”1
Kita masaligon kon walay huyang nga sumpay diha sa kadena, kon walay talandugon nga liki sa taming. Ang gubat batok sa yawa ug sayop mao ang paagi nga ang matag kalampusan sa ebanghelyo makab-ut—usa ka pakigsaad matag higayon, usa ka indibidwal matag higayon, usa ka misyonaryo matag higayon.
Mao kana ang rason nganong ang Ginoo miingon ngadto sa unang mga lider sa Simbahan, “Maghiusa sa inyong mga kaugalingon sa pagbuhat sa tanan nga pagkabalaan diha sa akong atubangan—nga tungod kay kamo nagbuhat niini, ang himaya idugang ngadto sa gingharian nga inyo nang nadawat” (D&P 43:9–10).
Kana nga pinulongan nagpasabut sa pakigsaad. Kana mao gayud ang rason nganong kita moadto sa templo sa pagbuhat—sa pagbugkos sa atong kaugalingon ngadto sa Ginoo ug sa usag usa ug uban niana nga kalig-on sa “pagbuhat sa tanan nga pagkabalaan.” Isip ganti, ang gahum ug himaya moabut kanato ug sa atong buhat. Kini mao gayud nga kahulugan sa pagtuman og pakigsaad nga ang Ginoo miingon, “Ako, ang Ginoo, mapugos sa pagtuman kon kamo mobuhat sa unsa nga Ako misulti; apan kon kamo dili mobuhat sa unsa nga Ako misulti, kamo dili makaangkon og saad” (D&P 82:10).
Salig kanako. Ang yawe niini nga buhat anaa sa pagtuman sa mga pakigsaad. Walay lain nga paagi nga atong maangkon ug mapakita ang mga gahum sa pagkadiosnon. Kamo aduna sa pulong sa Ginoo kabahin niini nga hilisgutan.
Moadto kamo sa templo aron sa pag-andam alang sa inyong misyon. Tumana ang mga saad nga inyong gihimo didto, ang matag usa niini. Kini personal kaayo, sagrado kaayo nga mga saad nga ang matag usa kanato naghimo uban sa atong Amahan sa Langit.
Usa ka Pakigsaad sa Pagsaksi
Samtang naghangyo ko ninyo niini, gusto nakong ipahibalo kaninyo nga buhaton usab ni nako. Motuman usab ko sa mga pakigsaad. Usa nianang mga pakigsaad mao ang mahimong, isip sakop sa Korum sa Napulog Duha ka mga Apostoles, linain nga saksi “sa ngalan ni Kristo sa tibuok kalibutan” (D&P 107:23). Sa pagtuman sa akong mga pakigsaad, wala lang ko mopamatuod kaninyo karon ni Ginoong Jesukristo ug sa Iyang paglansang, apan ako ingon nga saksi—gitawag, gi-orden, gisangunan sa pagpakigbahin niana nga pagpamatuod ngadto sa kalibutan. Malipayon ko nga makig-uban kaninyo niana nga pagpangalangad, akong pinalanggang batan-ong mga higala.
Nasayud ko ang Dios buhi, nga Siya ang atong literal nga Amahan sa Langit, ug Siya motuman sa Iyang mga pakigsaad ngari kanato sa kahangturan. Nasayud ko nga si Jesus mao ang Kristo, ang Bugtong Anak sa Amahan sa unod, ug ang Manluluwas sa kalibutan. Nasayud ko nga Siya miantus, mipaagas og dugo, ug namatay aron kita makaangkon og kinabuhing dayon.
Nasayud ko nga ang Amahan ug Anak nagpakita ngadto sa batang propeta nga si Joseph Smith, ang talagsaong propeta nga mipasiugda niining dispensayon, kinsa mipaagas usab sa iyang dugo isip pagpamatuod sa iyang calling, ang talagsaong simbolo sa kamaunongon ngadto sa iyang mga pakigsaad. Nasayud ko nga ang propetikanhon nga mga yawe napasa sa dili maputol nga kadena ngadto sa laing 15 pa ka mga lalaki hangtud niining panahona anaa sa pagtuman ug sa propetikanhon nga pagpangalagad ni Presidente Thomas S. Monson, ang tigdumalang high priest sa Dios dinhi sa yuta karon.
Kini nga buhat tinuod. Kining mga deklarasyon tinuod. Nasayud ko niini dili tungod ni bisan kinsang mortal nga lalaki o babaye nga nabuhi. Nasayud ko niini pinaagi sa mga pagdasig sa Espiritu Santo, nga naghatag og giya sa akong kinabuhi ug kahulugan sa akong pagpamatuod ug nagpadala kanako—ngari kaninyo—nga mahimong linain nga saksi sa Manunubos sa kalibutan.
MGA PAGHULAGWAY SA LITRATO PINAAGI NILA NI Matthew Reier UG Christina Smith