Atong mga Panimalay, Atong mga Pamilya
Pagtabang nga Ganahan Pag-ayo ang mga Bata sa Basahon ni Mormon
Among nakaplagan nga kining mga himan makatabang sa pagtudlo sa atong mga bata gikan sa Basahon ni Mormon.
Samtang ang akong asawa ug ako nag-amuma sa among pamilya, kami matinguhaon gayud nga isilsil sa among lima ka mga anak nga sila ganahan pag-ayo sa Basahon ni Mormon. Sama sa mga karpentero, among nakat-unan nga ang lain-laing mga himan dili lamang makatabang apan mahinungdanon usab sa pagtudlo sa among mga anak nga sila ganahan pag-ayo sa mga kasulatan. Kami usab nakaamgo nga ang pagka-anaa sa himan o mga pamaagi sa pagtudlo sa among mga anak usa ka butang ug ang pagkahibalo sa paggamit niini lain usab.
Agi og dugang, kami nasayud nga kinahanglan namong makat-on unsaon sa pagtudlo sa among mga anak sa pag-apply sa Basahon ni Mormon sa ilang kinabuhi ug makita ang kalabutan niini sa kalibutan nga ilang gipuy-an. Ang atong abilidad sa paggamit sa nagkalain-laing mga pamaagi sa pagtabang sa atong mga anak nag-agad una sa tanan ug ilabi na gayud sa atong personal nga pagsabut sa mga kasulatan, atong mga pagpamatuod sa katinuod niini, ug ang atong kahinam alang niini.
Pagtudlo sa Mas Gagmay nga mga Bata
Tungod kay ang pinulongan diha sa kasulatan ingon og dili komon ug ang bokabularyo sa bata limitado, mahimong hagit ang pagtudlo nga ganahan pag-ayo ang mga bata sa Basahon ni Mormon. Sa dihang ang among anak gagmay pa, ang gidugayan sa ilang atensyon mubo lamang ug mao usab ang among panahon sa pagtuon sa kasulatan. Kami kanunay mogamit sa gihulagway nga mga giya sa kasulatan alang sa pagtuon sa kasulatan sa pamilya.
Sa paghatag og gibug-aton sa mga baruganan nga nabasa ug nakat-unan sa among mga anak sa pagtuon sa kasulatan, kanunay nakong gigamit ang mga istorya sa kasulatan isip mga istorya para pangkatulog. Sa mga tuig nga milabay ang akong anak nga babaye mipakigbahin kon usa kini kaimpluwensyal. Siya miingon, “Sa akong hunahuna ang mga istorya nga gibalik-balik og saysay nahimo namong paborito. Ikaw motapad kanamo sa among higdaanan ug mopakigbahin sa mga istorya gikan sa mga kasulatan. Kami ganahan kaayo niini ug mohangyo nga maminaw niini makadaghan tungod kay bisan bata pa kami among nabati ang diwa sa mensahe nga anaa niini ug nasayud nga ang mga tawo nga inyong giistorya kanamo mga maisug ug matinud-anon. Ganahan kami nga mahisama kanila.”
Pagpahaum sa mga Leksyon sumala sa mga Panginahanglan sa Atong Pamilya
Siyempre, samtang ang among mga anak nagkahamtong, direkta na kaming mobasa sa Basahon ni Mormon ug sa uban pang mga kasulatan. Kami naningkamot nga matinud-anong mobasa gikan sa mga kasulatan matag buntag, bisan tuod ang pipila sa among mga bata nagbukot pa sa ilang mga habol ug sila katulgon pa. Hinoon, sila karon misulti nga sila nanimaw, naghinumdom, ug nagtanom og mga liso para sa umaabut.
Gihatagan usab namo og gibug-aton ang mga kasulatan sa among family home evening. Sama pananglit, kanunay kaming adunay mga kalihokan sama sa mga pagtag-an sa kasulatan: mga sakop sa pamilya modrama-drama sa istorya gikan sa mga kasulatan, ug ang ubang mga sakop sa pamilya motag-an sa istorya. Ang among mga anak ganahan usab pag-ayo nga modula og “Si Kinsa Ko”—usa ka dula diin amo silang hatagan og sumpay-sumpay nga mga timaan hangtud ilang matag-anan ang indibidwal gikan sa Basahon ni Mormon nga among ipatag-an. Samtang ang among mga bata nanagko, miapil sila sa pagpangandam ug pagpresentar og mga leksyon.
Samtang among gipahaum ang among mga home evening sumala sa panginahanglan sa among pamilya karon, among gigamit ang mga istorya ug ideya gikan sa Basahon ni Mormon sa pagtabang og tudlo sa mga baruganan. Sama pananglit, kami mokuha og mga leksyon kabahin sa moralidad ug paglikay sa pornograpiya gikan sa tambag ni Alma ngadto sa iyang anak nga lalaki nga si Corianton sa Alma 39. Nindot nga leksyon sa paglikay sa pagmarka og mga patik sa atong mga lawas napasiugdahan gikan sa mga istorya sa mga Amlicite sa Alma 3.
Ako nangandam og mga leksyon sa eksaktong pagdumala sa panagsungi sa igsoon base sa mga kinabuhi nila ni Nephi (tan-awa sa 1 Nephi 7:20–21; 16:4–5), ni Jacob (tan-awa sa 2 Nephi 2:1–3), ug ni Corianton (tan-awa sa Alma 39:1, 10). Ang maligdong nga asoy nila ni Alma ug Amulek sa Alma 14:12–28 nagtudlo kabahin sa pagkamapailubon diha sa pagsulay. Usa ka importante nga baruganan nga among nakat-unan niini ug sa uban pang daghan nga mga isyu mao ang pagsiguro ang amo na kining nahisgutan ngadto sa among mga anak sa wala pa kini mahimong tinuoray nga isyu o problema sa ilang kinabuhi.
Pagpangutana
Agi og dugang sa pagbasa sa mga kasulatan uban sa among mga anak, kami nakaamgo nga importante ang pagpangutana nga makatabang sa among mga anak nga makakita sa kamahinungdanon sa ilang gibasa. Ang kakomplekado niining mga pangutana managlahi sumala sa ilang mga edad, apan ang punto mao ang pagtudlo kanila sa pagpangita og mga ideya ug paggamit ug sa pagtabang kanila nga makaamgo nga adunay daghan nga madiskobre diha sa Basahon ni Mormon.
Sama pananglit, ako mangutana kanila ngano kaha si Nephi miingon nga siya “nakasinati sa daghan nga mga kasakit sa [iyang] panahon” ug sa sunod gayud nga linya mabasa nga mora og nagkasumpaki: nga siya “gipangga sa Ginoo” (1 Nephi 1:1). Pinaagi sa among diskusyon, ang among mga anak nakadiskobre nga bisan ang Ginoo miluwas ni Nephi gikan sa iyang mga kasakit, gihatagan usab Niya si Nephi og dako nga kasayuran sa Iyang mga misteryo (tan-awa sa 1 Nephi 1:1, 20).
Ang mga bata ug batan-on makakat-on pag-ayo kon kita motabang kanila nga sila mismo ang modiskobre sa mga kamatuoran. Samtang ila kining buhaton, sila mobati nga madasigon nga ganahan pag-ayo ug mogamit sa Basahon ni Mormon sa tibuok nilang kinabuhi ug mobati nga andam sa pagtabang sa uban nga mobuhat usab niini.
Ang among mga anak nakakat-on nga kami nasayud nga ang Basahon ni Mormon adunay tinuod nga mga istorya sa tinuod nga mga tawo. Ilang nakita kon unsa ang among nakita, ilang nahibaloan unsa ang among nahibaloan, ug nabati kon unsa ang among gibati kabahin sa Basahon ni Mormon. Kini nakapalig-on sa ilang mga pagpamatuod, nakatabang kanila nga ganahan pag-ayo sa Basahon ni Mormon, ug naggiya kanila sa pagpaningkamot sa pagbuhat usab niini ngadto sa ilang mga anak.
Kanunay namong gigamit ang mga istorya sa Basahon ni Mormon isip mga istorya para pangkatulog.
Paghulagway pinaagi ni Beth M. Whittaker