Gihatagan og Bili nga Kabtangan
Rafael Barrios, Santa Fe, Argentina
Sa una nagtrabaho ko sa usa ka customer service nga call center diin imposible alang sa mga katrabaho sa pagpakig-uban pag-ayo sa usag usa. Usa ka Sabado ang among supervisor mihukom sa pag-organisar og paniudto uban ang tibuok grupo aron adunay kahigayunan nga makaila-ila ang usag usa. Siya mihatag og instruksyon kanamong tanan sa pagdala og butang nga bililhon alang kanamo ug sa pagpasabut nganong importante kini.
Samtang naghunahuna ko sa iyang hangyo, nakaamgo ko nga kini mahimong oportunidad sa pagtudlo sa akong mga katrabaho kabahin sa ebanghelyo. Tungod kay ang relihiyon usa ka sensitibo nga hilisgutan, nasayud ko nga kinahanglan kong mabinantayon kabahin sa butang nga akong dalhon ug sa paagi sa pagpasabut sa bili niini ngari kanako.
Sa dihang miabut na ang adlaw sa paniudto, kaming tanan nalingaw nga maila-ila ang usag usa. Human sa paniudto ang among supervisor misugod sa among kalihokan pinaagi sa pagpresentar sa iyang bililhon nga butang—usa ka album sa pamilya. Siya mihisgut kanamo sa mga kalisud nga iyang nasinati sa dihang gibulagan siya sa iyang bana, nahimong usa ka single mother, ug pagsugod og bag-ong kinabuhi.
Human sa pipila ka mga paghisgut sa uban, ako na usab nga turno. Miingon ko sa akong mga katrabaho nga ang akong butang mao kanang gidala nako matag adlaw. Ang akong singsing nga PAM [CTR]. Miingon ako kanila nga ang mga letra nagpasabut nga “Pilia ang Matarung” ug ang singsing nagpahinumdom kanako nga kanunayng mosunod sa mga sugo sa Dios. Pipila ka mga tawo nangutana kabahin sa Simbahan ug sa mga pagtuo sa mga Santos sa Ulahing mga Adlaw, nga naghatag kanako og oportunidad sa paghisgut kanila kabahin sa kamahinungdanon sa mga pamilya sa plano sa Langitnong Amahan alang sa Iyang mga anak, nga ang pamilya mahimong mahangturon, ug nga kita adunay Manluluwas kinsa mitugyan sa Iyang kinabuhi alang kanato. Mipakigbahin usab ko sa pipila ka mga kasinatian sa akong misyon. Samtang nagsulti ko, nabati nako ang Espiritu, ingon man ang akong mga katrabaho.
Pagkasunod adlaw adunay pipila nga nangutana kabahin sa ebanghelyo, ug ako midapit pipila kanila sa simbahan. Sa kaulahian mibalhin ko og trabaho ug wala masayud kon aduna bay usa kanila nga nainteresadong masayud pa og daghan, apan mibati ko og maayo nga nasayud nga nahisgutan nako sila kabahin sa tinuod nga Simbahan ni Jesukristo dinhi sa yuta ug ang Langitnong Amahan adunay plano sa kalipay alang sa Iyang mga anak.
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, kita adunay responsibilidad sa pagpakigbahin sa ebanghelyo. Pinaagi sa gagmay ug yano nga mga butang sama sa singsing nga PAM, kita makatudlo og talagsaong mga leksyon nga mahimong makatabang sa kaluwasan sa atong mga kaigsoonan.