Mga Bateriya ug Bugnaw Kaayo nga mga Hangin
C. Lee Bendixsen, Idaho, USA
Usa ka adlaw human sa akong shift sa Idaho Falls Idaho Temple, miboluntaryo ko sa paghatud sa duha ka mga kaigsoonang lalaki ngadto sa ilang sakyanan, nga natanggong sa highway sa habagatan sa Idaho Falls, Idaho, USA. Usa ka buotan nga magtiayon ang mihunong atol nianang grabe ka bugnaw nga adlaw sa Disyembre ug mihatud nilang Brother Thompson ug Brother Clark sa nahabiling distansya ngadto sa templo.
Si Brother Thompson nakumbinser nga ang iyang sakyanan nagkinahanglan og bag-ong bateriya. Gidala nako siya aron mopalit og bateriya sa duol nga automotive shop, ug tungod kay duna man koy mga himan sa akong sakyanan, miuyon ko nga moilis niini.
Maayo gani kay nakadala ko og bag-ong parisan sa mga gwantis ug akong jacket para sa tingtugnaw. Pag-abli sa tabon sa makina, nangandam ko sa pagtangtang sa patay nga bateriya ug moilis niini sa bag-o.
Aron mailisan ang bateriya, kinahanglan nakong tangtangon ug balhinon ang pipila ka mga parte sa sakyanan, lakip na ang butangan sa tubig alang sa windshield washer. Wala madugay akong nabantayan nga ang akong mga himan dili mohaum sa tanang mga metric-sized nga bolt ug ang pipila ka mga screw dili gani maliso. Migamit ko og lain-laing mga himan ug misulay sa lain-laing mga posisyon, apan walay nalihok. Ang temperatura sa gawas mga 5 degrees Fahrenheit (-15°C), ug ang gagmayng mga trak nga mangagi nakamugna og hangin nga grabe gayud katugnaw. Mibati ako og katugnaw, makasagmuyo nga kahimtang nga wala nay mahimo.
Midangup ko sa bugtong tabang nga anaa. Kinasingkasing akong nag-ampo, mipasabut sa akong panginahanglan ngadto sa Langitnong Amahan ug nangayo kon Iya bang paluagan ang mga bolt ug mga screw o motabang kanako nga makakita og paagi sa pagbuhat niini. Sa paghuman sa akong pag-ampo, akong gikuha og usab ang parisan sa pliers ug milubag sa gahi kaayo nga screw. Luag na kini! Sa hilum ug sa tinud-anay nga pagpahayag sa pasalamat, akong gitangtang ang screw ug mipadayon.
Sa wala madugay akong nakita ang makapasagmuyo, hugot kaayo nga bolt sa ilawom gayud sa sakyanan. Usab, hingpit nga nababagan, nag-ampo ko og mas kinasingkasing alang sa tabang, nagbuhat sa ingon inubanan sa nagtubo nga pagsalig. Niining higayuna mibati ko nga gimandoan sa pagtangtang og pipila ka mas lawom pa nga mga bolt ug dayon sa pagliso sa pugong sa bateriya, nga akong gihimo. Ang hugot kaayo nga bolt daling naliso. Sa pipila ka gutlo ako nang natangtang ang daang bateriya.
Akong gipasok ang bag-ong bateriya ug uban sa nanggahi sa katugnaw nga mga tudlo mitaud pag-usab sa tanang mga bahin kutob sa akong mahimo. Ako dayong gipangbalik og taud ang elektrikal nga mga kable. Si Brother Thompson miliso sa yawe ug mipahiyum og dako samtang ang makina miandar na. Mapasalamaton akong misira sa tabon. Diha ko sa gawas mga usa na ka oras, ug ang akong mga bitiis ug mga tiil nanggahi sa katugnaw samtang naglisud ko og sakay sa akong sakyanan.
Akong gisundan sila si Brother Thompson ug Brother Clark sa pagpauli aron masiguro nga luwas sila sa pag-abut. Samtang nagdrayb ko, ang heater sa akong sakyanan nindot kaayo pamation, ug ang akong mga bitiis ug mga tiil hinay-hinay nga nainitan. Nagpasalamat ko og dako sa Langitnong Amahan sa Iyang tabang. Sa laing bahin nadasig ko sa pagkasayud nga Iyang gitubag ang pag-ampo niining mga kaigsoonan pinaagi sa pagpadala kanako isip Iyang sulugoon. Sa Iyang talagsaong paagi mihatag Siya sa ilang panginahanglan ug mipanghimatuod og usab sa akong hugot nga pagtuo.