Ang Sapatos ni Papa
Priscilla Costa Xavier, São Paulo, Brazil
Mga pipila ka tuig ang milabay samtang ang akong mga ginikanan nagtabang sa Relief Society sa pag-organisar sa pipila ka mga sinina, sapatos ug uban pang mga gamit nga gidonar alang sa mga nanginahanglan, ang akong amahan nakabantay og usa ka nindot kaayo nga parisan sa sapatos sa tunga-tunga sa nagpatung-patong nga mga butang. Nianang higayona mibati siya og kusog nga impresyon nga hipuson ang sapatos.
Ang akong inahan mikatawa ug miingon, “Kining parisan sa sapatos gamay ra kaayo para nimo. Dili gani kini paigo!”
Apan, ang akong amahan, miinsister gayud. Human sa mga komedya sa mga sister, sila sa katapusan mitugot kaniya sa paghipos sa sapatos.
Sa pag-abut gyud niya sa balay, iya kining gilimpyohan, gipaskan og newspaper, ug gibutang kini sa usa ka kahon diha sa ibabaw sa iyang kabinet. Kami nakadawat og instruksyon nga dili hilabtan ang kahon. Sulod sa lima ka tuig kini anaa ra gihapon sa samang lugar.
Usa ka adlaw usa ka bag-ong pamilya ang mibalhin sa pikas balay. Sila adunay duha ka gagmay nga bata ug unom ka bulan nga masuso. Ang akong igsoon nga babaye ug ako diha-diha dayon nahimong amiga sa duha ka mga batang babaye, kinsa among mga kaedad. Kami mipakigbahin sa among bag-ong mga amiga unsa ang among nakat-unan sa simbahan, ug amo silang giimbitar sa Primary. Sila naghinam-himan nga makat-on og daghan pa sa among gipakigbahin kanila.
Sa pag-abot sa balay gikan sa Primary, sila wala mohunong sa paghisgut kabahin sa Simbahan ngadto sa ilang mga ginikanan. Dayon ang among mga ginikanan midapit sa tibuok pamilya sa pagpamaninaw sa mga leksyon sa misyonaryo ug sa pagsimba. Sila malipayong misugot. Sila naganahan kaayo sa mga leksyon, ug kami naghinam-hinam sa pagsimba uban kanila.
Apan pagka-Sabado, ang ilang mga anak nga babaye ingon og nawad-on og kadasig. Sa dihang nangutana kami kon unsa ang problema, sila miingon nga ang ilang mga ginikanan dili na ganahan mosimba.
Kami nasagmuyo ug mihangyo ni Papa nga istoryahan ang ilang mga ginikanan. Sa dihang iya nga gisultihan sila sa mga panalangin sa pagsimba, ang amahan mitubag, “O, kabalo ko nianang tanan. Ang problema kay wala na ko magsul-ob og bisan unsang klase nga sapatos gawas lang sa akong sneakers sa dugay nang panahon, ug nasayud ko nga kita motambong sa mga miting sa Simbahan nga magsinina og tarung.
Nianang higayona ang akong amahan mitan-aw kang mama. Siya nasayud kon unsa gyud ang angay nga buhaton. Ang sapatos diha sa kahon sa may ibabaw sa kabinet ni Papa maigo gayud sa amahan sa among higala, ug ang tibuok pamilya misimba. Kadto usa ka talagsaon nga Dominggo alang kanila ug kanamo. Sa wala madugay sila namiyembro sa Simbahan, ug karon sila maanindot nga mahangturong pamilya.
Nasayud ko nga ang akong amahan midawat og giya gikan sa Espiritu Santo sa paghipos niadtong sapatos. Isip resulta, kanunay kong magtinguha sa Iyang giya sa pagpangita og mga pamilya nga andam maminaw sa ebanghelyo. Nasayud ko nga Siya nag-andam og mga pamilya, ug nasayud ko nga kita kinahanglang mangita kanila ug dad-on sila balik kang Kristo.