Hangtud Kita Magkita Pag-usab
Pagkat-on gikan sa usa ka Eksperto
Isip usa ka estudyante nga surgeon, adunay usa ka tawo nga mas hanas diha sa akong tupad kanunay. Isip usa ka anak sa Dios, ako adunay sama nga oportunidad.
Isip usa ka surgeon kanunay kong gipangutana kon sa unsang paagi nga naangkon nako ang akong mga kahanas. Ang uban nagtuo nga usa ka tawo nag-eskwela, nagtan-aw og operasyon, ug dayon andam na sa pagpahigayon og operasyon. Gani adunay kataw-anan nga sinultihan sa pagbansay: tan-aw og usa, buhat og usa, tudlo og usa. Hinoon, wala nay mas layo pa sa kamatuoran.
Naangkon nako ang akong propesyonal nga kahanas ug kahibalo ubos sa giya sa daghang batid ug mapailubon nga mga doktor. Nagsugod ko pinaagi sa pagtan-aw nga anaa sa likod ug dayon mas duol. Human sa usa ka tuig nga pag-obserbar, nahatagan ko og gamay nga mga buluhaton, pagtabang sa surgeon ug iyang “unang luyo-luyo”—ang luyo-luyo nga surgeon.
Human sa usa ka tuig gitugutan ko nga motabang sa pagpaghigayon og operasyon ug molihok isip unang luyo-luyo sa yanong mga operasyon. Human sa usa o duha ka tuig, gitugutan nga mahimong unang luyo-luyo sa mas komplikadong mga operasyon. Dayon misugod ko sa pagpahigayon sa labing sayon nga mga operasyon, sama sa pag-ayo og hernia, samtang ang sinati nga surgeon milihok isip akong unang luyo-luyo.
Sa akong katapusang tuig sa pagbansay—pito ka tuig human ko migradwar sa medisina—gitugutan ko sa pagpahigayon og komplikadong mga operasyon samtang ang surgeon milihok isip unang luyo-luyo. Nadiskobrehan nako nga ang labing maayo nga magtutudlo makahimo sa operasyon nga mas hapsay pinaagi sa ilang tabang tungod kay ilang mapakita kanako unsa ang kinahanglang buhaton sa klaro ug yano nga mga pamaagi—mga pamaagi nga ilang nakat-unan sa samang proseso sa pag-mentor.
Wala nako madayeg sa hingpit ang giya niining talagsaon ug eksperto nga mga surgeon kinsa akong mga unang luyo-luyo hangtud akong nahuman ang akong pagbansay ug nagkinaugalingon. Hinoon, gani 30 ka tuig ang milabay, ang akong mga magtutudlo akong mahinumduman sa matag adlaw nga akong gigamit ang akong kahanas nga ilang gitudlo, gipakita, ug gikorihian pag-ayo.
Ang pagkat-on sa mga baruganan sa ebanghelyo walay kalainan. Kita gitudloan pagtulun-an human sa usa ka pagtulun-an pinaagi sa kasinatian—sa usa ka mapailubon nga Magtutudlo. Kita molantaw Kaniya, mosunod sa Iyang ehemplo, mohangyo og inspirasyon, ug ang atong Langitnong Amahan mopanalangin kanato og giya—sa kanunay madawat pinaagi sa Espiritu Santo, mga pulong sa buhing mga propeta, mga kasulatan, ug sa uban kinsa naghigugma ug nagserbisyo. Ang atong Giya nagbarug sa simbolikanhong paagi diha sa atong kiliran samtang kita nag-angkon og pagsalig, naghapsay sa atong dalan, naghatag sa gikinahanglang koreksyon, nagtubag sa mga pangutana, ug mas nagsalig samtang kita nagpamatuod nga takus alang niini.
Pipila sa mga estudyante nga surgeon naghinam-hinam nga magkinaugalingon, sa pagbuhat sa mga butang sumala sa ilang pamaagi. Susama usab, kita usahay molihok nga wala ang atong eksperto nga Giya. Hinoon, nakakat-on ko, sa daghang tuig isip usa ka surgeon nga gani bisan karon ako kanunay nangandoy ug naghandum og unang luyo-luyo nga mas nakahibalo pa kay kanako—ilabi na kon ang mga kinabuhi ug kalag duol na sa kamatayon!
Ang atong paglambo sa ebanghelyo nagsugod sa kinabuhi sa wala pa dinhi sa yuta, nagpadayon dinhi, ug sa walay pagduha-duha magpadayon human sa atong mortal nga kinabuhi. Apan sa tanang mga bahin sa atong kasinatian, ang atong Manluluwas nag-una na kanato, nagpakita sa gikinahanglang kahanas aron molampus. Ug Siya sa tanan midapit sa pagsalig Kaniya ug sa Iyang kaeksperto.
Litrato © iStockphoto