Kaisug sa Pagbarug nga Mag-inusara

Presidente Thomas S. Monson, “Magmaisugon sa Pagbarug nga Mag-inusara,” Liahona, Nob. 2011, 61–62.

“Nagtuo ko nga ang akong unang kasinatian sa pagbaton og kaisug sa pagpakabuhi sumala sa akong gituohan nahitabo dihang nagserbisyo ko sa Navy sa Estados Unidos sa hapit na mahuman ang Ikaduhang Gubat sa Kalibutan. …

“Kanunay gayud nakong mahinumduman dihang miabut ang Dominggo human sa unang semana [sa boot camp]. Nakadawat mi og malipayong balita gikan sa chief petty officer. Nagbarug sa bansayanan sa bugnaw nga hangin sa California, nadungog namo kini nga mando: ‘Karon ang tanan manimba—ang tanan, gawas nako. Magrelaks ra ko!’ Dayon misiyagit siya, ‘Tanan kamong mga Katoliko, magpundok mo sa Camp Decatur—ug ayaw og balik hangtud alas tres. Forward, march!’ Dakong pundok sa mga tawo ang milakaw. Dayon misiyagit sa iyang ikaduhang mando: ‘Kadtong mga Judeo, pundok mo sa Camp Henry—ug ayaw og balik hangtud alas tres. Forward, march!’ Gamay ra nga mga tawo ang mimartsa. Dayon miingon siya, ‘Kamong nahabilin nga mga Protestante, magpundok mo sa mga teyatro sa Camp Farragut—ug ayaw og balik hangtud alas tres. Forward, march!’

“Diha-diha dunay misantup sa akong hunahuna, ‘Monson, dili ka Katoliko; dili ka Judeo; dili ka Protestante. Ikaw usa ka Mormon, busa barug lang diha!’ Makapaniguro ko ninyo nga mibati ko nga hingpit nga nag-inusara. Maisugon ug determinado, oo—apan nag-inusara.

“Ug dayon nadungog nako ang labing matam-is nga mga pulong nga akong nadungog sukad nga gisulti nianang chief petty officer. Mitan-aw siya sa akong direksyon ug nangutana, ‘Ug kamo mga ondo unsay itawag sa inyong mga kaugalingon?’ Hangtud nianang panahona wala ko kamatikod nga duna bay nagbarug sa akong tapad o sa luyo sa bansayanan. Hapit magdungan, matag usa namo mitubag, ‘mga Mormon!’ Lisud ihulagway ang kalipay nga mipuno sa akong kasingkasing sa akong paglingi ug nakita ang pipila ka mga marino.

“Nangutkot sa ulo ang chief petty officer sa katingala apan sa katapusan miingon, ‘Nan, pangita mo og lugar nga kapundukan. Ug ayaw og balik hangtud alas tres. Forward, march!’ …

“Bisan tuod nga ang kasinatian lahi sa unsay akong gipaabut, andam ko nga mobarug nga mag-inusara, kon kadto gikinahanglan.

“Sukad nianang adlawa, adunay mga higayon nga walay usa nga nagbarug sa akong likod ug busa ako mibarug nga nag-inusara. Mapasalamaton kaayo ko nga nakahimo sa desisyon kaniadto pa nga magpabiling lig-on ug matinuoron, kanunayng andam ug andam nga mopanalipod sa akong relihiyon.”

Mga pangutana nga angayang palandungon:

Unsay epekto sa atong lig-ong pagbarug ngadto sa uban?
Makahinumdom ba kamo og higayon sa dihang gisulayan ang inyong kaisug ug kombiksyon? Giunsa ninyo pagtubag?
Unsay atong mahimo aron maandam ang atong kaugalingon nga lig-ong mobarug?

Ikonsiderar sa pagsulat sa inyong panghunahuna sa journal o hisguti kini ngadto sa uban.