Pag-ila sa Kamot sa Dios diha sa Atong Inadlaw nga mga Panalangin
Gikan sa usa ka pakigpulong sa fireside sa Church Educational System nga gihatag niadtong Enero 9, 2011. Alang sa kompleto nga teksto sa Iningles, adto sa speeches.byu.edu.
Ang pagpangayo ug pagdawat og pagkaon sa matag adlaw sa kamot sa Dios adunay mahinungdanon kaayo nga bahin sa pagkat-on sa pagsalig Kaniya ug sa paglahutay sa mga hagit sa kinabuhi.
Si Lucas mirekord nga usa sa mga disipulo sa Ginoo nangutana Kaniya, “Ginoo, tudloi kami sa pag-ampo, maingon nga gitudloan ni Juan ang iyang mga tinun-an” (Lucas 11:1). Si Jesus mihatag dayon og usa ka sumbanan alang sa pag-ampo nga nailhan isip ang Pag-ampo sa Ginoo (tan-awa sa Lucas 11:2–4; tan-awa usab sa Mateo 6:9–13).
Nalakip diha sa Pag-ampo sa Ginoo mao ang pangamuyo nga “Hatagi kami karon sa pagkaon namo sa matag adlaw” (Mateo 6:11; tan-awa usab sa Lucas 11:3). Kitang tanan adunay mga panginahanglan sa matag adlaw diin modangup kita ngadto sa atong Langitnong Amahan. Alang sa uban, literal gayud kini nga pagkaon—nga mao, ang pagkaon nga gikinahanglan aron sa pagpatunhay sa kinabuhi nianang adlawa. Mahimo usab kini nga espirituhanon ug pisikal nga kalig-on aron makasagubang sa usa pa ka adlaw sa grabe nga sakit o sa sakit nga hinay ang pagkaayo. Sa laing mga kahimtang kini mahimong dili kaayo makita nga panginahanglan, sama sa butang nga may kalabutan sa mga obligasyon o mga kalihokan sa usa ka tawo nianang adlawa—pagtudlo og usa ka leksyon o pagkuha og eksaminasyon, pananglitan.
Si Jesus nagtudlo kanato, Iyang mga disipulo, nga kinahanglan kitang motan-aw ngadto sa Dios sa matag adlaw alang sa pagkaon—ang tabang ug pagpatunhay—nga atong gikinahanglan nianang piho nga adlaw. Ang pagdapit sa Ginoo nga magtinguha sa atong pagkaon sa matag adlaw diha sa kamot sa atong Langitnong Amahan nagpakita sa usa ka mahigugmaong Dios, nga nahibalo bisan sa gagmay, inadlaw nga mga panginahanglan sa Iyang mga anak ug matinguhaon nga moabag kanila, sa matag usa. Siya nag-ingon nga makapangayo kita diha sa hugot nga pagtuo nianang Nilalang “nga nagapanghatag ngadto sa tanang mga tawo sa madagayaon gayud, ug sa walay pagpamoyboy; ug kini igahatag” (Santiago 1:5). Kana, siyempre, hilabihan ka mapasaligon, apan adunay butang nga naglihok dinhi nga mas mahinungdanon pa kay sa tabang aron matunhay sa matag adlaw. Samtang kita magtinguha ug modawat sa balaanong pagkaon sa matag adlaw, ang atong pagtuo ug pagsalig sa Dios ug sa Iyang Anak motubo.
Pagtan-aw ngadto sa Dios sa Matag Adlaw
Human sa mahinungdanon nga pagbiya gikan sa Ehipto, ang mga tribo sa Israel migahin og 40 ka tuig sa kamingawan sa wala pa mosulod sa gisaad nga yuta. Kining hilabihan ka dakong pundok nga sobra sa usa ka milyon ka mga tawo kinahanglang pakan-on. Sigurado gayud nga kana nga gidaghanon sa usa ka lugar dili mabuhi og dugay sa pagpangayam, ug ang ilang kinabuhi nga usahay magbalhin-balhin nianang panahona dili tukma sa pagpananom o pagbuhi og hayop sa bisan unsa nga igong gidaghanon. Si Jehova misulbad sa hagit pinaagi sa milagrosong paghatag sa ilang pagkaon sa matag adlaw gikan sa langit—ang mana. Pinaagi ni Moises, ang Ginoo mimando sa mga tawo sa pagpundok og igo nga mana alang nianang adlawa, gawas sa adlaw sa dili pa ang Igpapahulay, diin kinahanglan silang mopundok og igo sulod sa duha ka adlaw.
Bisan pa man sa piho nga mga pahimangno ni Moises, ang uban misulay sa pagpundok og labaw kay sa paigo sa usa ka adlaw ug mihipos sa sobra:
“Ug si Moises miingon kanila, Walay bisan kinsa nga magasalin niana hangtud ugma sa buntag.
“Apan sila wala managtuman kang Moises; kondili nga ang uban nanagsalin niana hangtud sa pagkabuntag, ug kini giulod, ug nadunot” (Exodo 16:19–20).
Sama sa gisaad, hinoon, sa dihang mipundok sila og kaduha sa normal nga inadlaw nga gidaghanon sa mana sa ikaunom ka adlaw, wala kini madaut (tan-awa sa Exodo 16:24–26). Usab, hinoon, ang uban dili makatuo kon dili makakita, ug sila miadto aron sa pagpamunit og mana sa Igpapahulay, apan “sila wala makakaplag” (tan-awa sa Exodo 16:27–29).
Pinaagi sa paghatag og inadlaw nga pagkaon usa ka adlaw sa matag higayon, si Jehova misulay sa pagtudlo og hugot nga pagtuo sa usa ka nasud nga sobra sa 400 ka tuig nga nawad-an pag-ayo sa hugot nga pagtuo sa ilang mga amahan. Nagtudlo Siya kanila sa pagsalig Kaniya. Sa tinuod nga kahulugan, ang mga anak sa Israel kinahanglang molakaw uban Kaniya sa matag adlaw ug mosalig nga Siya mohatag og igong gidaghanon sa pagkaon alang sa sunod adlaw ug padayon pa. Niana nga paagi dili kaayo Siya mahilayo sa ilang mga hunahuna ug mga kasingkasing.
Sa dihang ang mga tribo sa Israel anaa na sa kahimtang sa pagsangkap alang sa ilang kaugalingon, sila gimandoan sa pagbuhat sa ingon. Sa samang paagi, samtang mangamuyo kita sa Dios alang sa atong pagkaon sa matag adlaw—alang sa tabang sa higayon nga dili kita makasangkap sa atong kaugalingon—kinahanglan nga aktibo kita gihapon sa pagbuhat ug pagsangkap kutob sa atong mahimo.
Pagsalig sa Ginoo
Sa wala pa ko tawga isip General Authority, nag-atubang ko og personal nga ekonomikanhong hagit nga nagpadayon sulod sa pipila ka tuig. Miminus kini ug mipadayon sa kagrabe ug kadinalian, apan wala gayud kini mawala. Usahay kini nga hagit nakahulga sa kaayohan sa akong pamilya, ug naghunahuna ko nga basin kami mag-atubang og pinansyal nga kalisud. Nag-ampo ko alang sa milagroso nga tabang aron moluwas kanamo. Bisan tuod nga mihalad ako niana nga pag-ampo sa makadaghang higayon uban sa hilabihan nga kasinsero ug tinud-anay nga tinguha, ang tubag sa katapusan kay dili. Sa katapusan, nakakat-on ko sa pag-ampo sama sa gibuhat sa Manluluwas: “Dili ang akong pagbuot maoy matuman, kondili ang imo” (Lucas 22:42). Nagtinguha ko sa tabang sa Ginoo uban sa ginagmay nga lakang paingon ngadto sa katapusang desisyon.
Adunay mga higayon sa dihang akong nahurot ang tanan nakong mga kapanguhaan, nga wala na koy maadtoan ug wala nay usa nga kadangpan alang sa tabang aron matubag ang panginahanglan nga akong giatubang. Wala nay laing paagi, dili lang kausa nga miluhod ko sa atubangan sa akong Langitnong Amahan, nangaliyupo nga naghilak alang sa Iyang tabang. Ug mitabang Siya. Usahay usa lamang kini ka pagbati sa kalinaw, usa ka pagbati sa kasiguroan nga ang mga butang mamaayo ra. Tingali wala nako makita kon sa unsang paagi o unsa ang mahimong dalan, apan mihatag Siya kanako aron masayud nga, direkta man o dili, Siya mohatag og paagi. Ang mga kahimtang mahimong mausab, usa ka bag-o ug makatabang nga ideya mahimong mosantup sa hunahuna, pipila ka wala paabuta nga kinitaan o laing kapanguhaan mahimong motunga sa sakto gayud nga panahon. Hinoon adunay kasulbaran.
Bisan tuod nga nag-antus ko nianang higayuna, mapasalamaton ko karon nga walay dali nga solusyon sa akong problema. Ang kamatuoran nga napugos ko sa pagdangup sa Dios alang sa tabang sa hapit matag adlaw sulod sa taas-taas nga mga katuigan nagtudlo kanako kon unsaon pag-ampo sa tinuoray nga paagi ug pag-angkon og mga tubag sa pag-ampo ug nagtudlo kanako sa praktikal nga paagi sa pagbaton og hugot nga pagtuo sa Dios. Akong nailhan ang akong Manluluwas ug ang akong Langitnong Amahan sa paagi ug sa matang nga wala unta mahitabo sa laing paagi o dugay-dugay pa gayud untang mahitabo kanako. Akong nakat-unan nga ang pagkaon sa matag adlaw usa ka bililhong butang. Akong nakat-unan nga ang mana karon mahimong tinuod sama sa pisikal nga mana sa kasaysayan sa biblia. Nakat-on ko sa pagsalig sa Ginoo sa tibuok nakong kasingkasing. Nakat-on ko sa paglakaw uban Kaniya sa matag adlaw.
Pagtrabaho pinaagi sa mga Problema
Ang pagpangayo sa Dios alang sa atong pagkaon sa matag adlaw imbis nga pagkaon sa matag semana, bulan, o tuig usa usab ka paagi alang kanato aron maka-focus sa mas gagmay, mas madumala nga mga tipik sa usa ka problema. Aron makasagubang sa dako nga butang, tingali kita kinahanglang magtrabaho niini sa ginagmay, inadlaw nga mga paagi. Usahay ang mahimo lamang nato mao ang usa ka adlaw—o bisan kabahin lang sa usa ka adlaw—sa usa ka higayon.
Niadtong mga 1950 ang akong inahan naluwas sa kinahanglanon nga operasyon sa kanser, nga gisundan sa dinosena nga sakit kaayo nga mga pagtambal pinaagi sa radiation. Nakahinumdom siya nga ang iyang inahan mitudlo kaniya og butang atol nianang panahona nga nakatabang kaniya sukad niana:
“Grabe kaayo ang akong sakit ug maluyahon, ug gisultihan nako siya usa ka adlaw, ‘O, Mama, dili na nako maagwanta ang dugang 16 pa nga mga pagtambal.’
“Miingon siya, ‘Makaadto ka ba karon?’
“‘Oo.’
“‘Ga, mao lang kana ang kinahanglan nimong buhaton karon.’
“Nakatabang kini kanako sa daghang mga higayon kon akong mahinumduman ang paglahutay sa usa ka adlaw o usa ka butang sa usa ka higayon.”
Ang Espiritu makagiya kanato kon kanus-a kita motan-aw sa unahan ug kon kanus-a kita kinahanglang molahutay niining usa lamang ka adlaw, niining usa ka higayon.
Pagkab-ot sa Atong Potensyal
Ang pagpangayo ug pagdawat og pagkaon sa matag adlaw sa kamot sa Dios adunay mahinungdanon kaayo nga bahin sa pagkat-on sa pagsalig Kaniya ug sa paglahutay sa mga hagit sa kinabuhi. Nagkinahanglan usab kita og inadlaw nga bahin sa balaanong pagkaon aron mahimo kon unsay kinahanglan nga kita mahimo. Ang paghinulsol, paglambo, ug sa katapusan ang pagkab-ot “sa sukod sa gidak-on sa kahupnganan ni Kristo” (Mga Taga-Efeso 4:13) usa ka sunod-sunod nga proseso. Ang paglambigit sa bag-o ug maayo nga mga naandang buhaton ngadto sa atong kinaiya o pagbuntog sa dili maayo nga mga naandang buhaton o pagkaadik sa kasagaran nagpasabut nga usa ka paningkamot karon nga pagasundan sa lain pagkaugma ug dayon sa lain, tingali sulod sa daghang mga adlaw, gani mga bulan ug mga tuig, hangtud maangkon nato ang kadaugan. Apan ato kining mabuhat tungod kay makapangamuyo kita sa Dios alang sa atong pagkaon sa matag adlaw, alang sa tabang nga gikinahanglan nato sa matag adlaw.
Si Presidente N. Eldon Tanner (1898–1982), Unang Magtatambag sa Unang Kapangulohan, miingon: “Samtang mamalandong kita sa hiyas sa pagdesisyon nga mobuhat og mas maayo pa, atong tinoon ang pagdisiplina sa atong kaugalingon sa pagpili og maayo sa mga desisyon nga atong himoon, sa pagkonsiderar sa katuyoan sa paghimo niini, ug sa katapusan sa paghimo og mga pasalig sa pagtuman niini ug dili motugot sa bisan unsang mga babag nga mopahunong kanato. Atong pahinumduman ang atong kaugalingon sa pagsugod sa matag adlaw nga makahimo kita og desisyon alang lamang nianang adlawa.”1
Si Elder David A. Bednar sa Korum sa Napulog Duha ka mga Apostoles bag-ohay lang nga nagtudlo nga ang pagpadayon sa yano nga inadlaw nga naandang buhaton sama sa pag-ampo sa pamilya, pagtuon sa kasulatan, ug home evening mahinungdanon sa pag-ugmad og malampusong mga pamilya. “Ang atong pagkamakanunayon sa paghimo og daw gagmay nga mga butang,” miingon siya, “modala ngadto sa mahinungdanong mga sangputanan nga espiritwal.”2
Si Presidente Ezra Taft Benson (1899–1994), namulong mahitungod sa paghinulsol, mihatag niini nga tambag: “Kinahanglan mag-amping kita, samtang magtinguha kita nga mahimong mas mahisama gayud [kang Kristo], nga dili kita mawad-an sa kadasig ug mawad-an sa paglaum. Ang pagkahimong sama kang Kristo usa ka tibuok kinabuhi nga paningkamot ug sa kasagaran gayud nag-apil sa pagtubo ug kausaban nga hinay, nga hapit dili mabantayan.”3
Pagtinguha sa Tabang sa Ginoo diha sa Pagserbisyo
Hinumdumi nga kinahanglang dili lamang kita magtan-aw sa kaugalingon kon magtinguha kita og inadlaw nga sukod sa balaanong pagkaon. Kon gusto kita nga mahimong mas mahisama sa Manluluwas, Siya miabut “dili aron pagaalagaron, kondili sa pag-alagad” (Marcos 10:45), magtinguha kita sa Iyang tabang nga anaa sa pagserbisyo sa uban matag adlaw.
Si Presidente Thomas S. Monson nagsunod niini nga baruganan sa mas maayo nga paagi kay ni bisan kinsa nga akong nailhan. Anaa gayud kanunay sa iyang kasingkasing ang usa ka pag-ampo nga ang Dios mopadayag sa mga panginahanglan ug mga paagi aron siya makaabag niadtong anaa sa iyang palibut sa bisan unsa nga adlaw o gutlo nianang adlawa. Usa ka ehemplo gikan sa iyang panahon isip bishop naghulagway sa kamatuoran nga usahay bisan gamay nga paningkamot mahimo nga, inubanan sa mga pamaagi sa Espiritu, mosangput sa talagsaon nga bunga.
“Usa sa gitabangan ni [Presidente Monson] mao si Harold Gallacher. Ang iyang asawa ug mga anak aktibo sa Simbahan, apan si Harold dili. Ang iyang anak nga babaye nga si Sharon mihangyo kang Bishop Monson kon siya ‘mohimo og butang’ aron mobalik sa pagkaaktibo ang iyang amahan. Isip bishop, mibati siya sa pagtawag ni Harold. Init kadto nga adlaw sa summer sa dihang nanuktok siya sa screen nga pultahan ni Harold. Ang bishop makakita kang Harold nga naglingkod sa iyang lingkuranan, nanigarilyo ug nagbasa og newspaper. ‘Kinsa ‘na?’ Nangutana si Harold nga adunay kasuko, nga wala mohangad.
“‘Ang imong bishop,’ mitubag si Tom. ‘Mianhi ko aron magkaila ‘ta ug moawhag sa imong pagtambong kauban sa imong pamilya sa atong mga miting.’
“‘Dili, busy kaayo ko,’ miabut ang dili maayo nga tubag. Wala gayud siya mohangad. Mipasalamat si Tom kaniya alang sa pagpaminaw ug mibiya. Ang pamilya namalhin nga wala gayud si Harold makatambong sa mga service.
“Mga tuig ang milabay … si Brother Gallacher mitawag sa opisina ni Elder Thomas S. Monson ug mihangyo nga makigkita kaniya.
“… Sa dihang ang duha naghimamat usa ka higayon human niana, naghinangpanay sila. Si Harold miingon, ‘Mianhi ko aron mangayo og pasaylo sa wala pagbarug ug pagpasulod nimo nianang adlaw sa summer dugay nang mga katuigan ang milabay.’ Si Elder Monson nangutana niya kon siya [nahimong] aktibo ba sa Simbahan. Uban sa pinangislo nga pahiyum, si Harold mitubag: ‘Ako karon second counselor sa akong ward bishopric. Ang imong pagdapit nga moadto sa simbahan, ug ang akong negatibong tubag, hilabihan nga mihasul kanako nga nakahukom ko nga mobuhat og butang kalabut niini.’”4
Paghimo og Inadlaw nga mga Pagpili
Ang paghunahuna sa atong pagkaon sa matag adlaw mopahinumdom kanato mahitungod sa mga detalye sa atong kinabuhi, sa kamahinungdanon sa gagmay nga mga butang nga nakapuno sa atong mga adlaw. Ang kasinatian nagtudlo nga sa kaminyoon, pananglitan, ang padayon nga pagdagayday sa yano nga pagkamabination, tabang, ug pagtagad mas dako og mahimo aron magpabiling buhi ang gugma ug maamumahan ang usa ka relasyon kay sa bongga o mahal nga gasa nga panagsa ra.
Sa samang paagi, sa inadlaw nga mga pagpili mahimong atong mapugngan ang piho nga makalingla nga mga impluwensya sa pagsulod sa atong kinabuhi ug mahimong kabahin kon kinsa kita. Sa usa ka dili pormal nga panaghisgutan nako ug ni Elder Neal A. Maxwell (1926–2004) mga pipila na ka tuig ang milabay, among naobserbahan nga ang usa ka tawo makalikay sa kadaghanan sa pornograpiya ug mga imahe sa pornograpiya pinaagi lamang sa paghimo og maayo nga mga pagpili. Sa kadaghanang bahin kinahanglan lamang niini ang pagdisiplina sa kaugalingon nga dili moadto diin posibleng makita ang pornograpiya—sa pisikal o elektronik nga paagi. Among giangkon, hinoon, nga tungod kay kini ingon ka makalingla sa makalilisang nga paagi, ang pornograpiya makaataki sa tawo nga nag-atiman lang sa iyang kaugalingong binuhatan diha sa kalit nga paagi. “Oo,” nakaobserbar si Elder Maxwell, “apan siya daling makasalikway niini. Dili siya kinahanglang modapit niini aron makasulod ug motanyag niini og lingkuranan aron makalingkod.”
Ingon usab niana ang ubang makadaut nga mga impluwensya ug mga naandang binuhatan. Ang atong pagtagad matag adlaw sa paglikay sa mga sinugdanan gayud sa ingon nga mga butang makapanalipod kanato sa pagkahigmata sa umaabut nga adlaw diha sa pagkaamgo nga tungod sa kawalay pagtagad, ang dautan o kahuyang nakagamot na sa atong kalag.
Sa pagkatinuod, pipila ra ang mga butang sa usa ka adlaw nga dili gayud mahinungdanon. Bisan ang ordinaryo ug balik-balik nga mga kalihokan mahimong gamay ra apan mahinungdanong mga pundasyon nga sa dili madugay makaestablisar sa disiplina ug kinaiya ug kahapsay nga gikinahanglan aron makab-ot ang atong mga plano ug mga damgo. Busa, samtang kamo mangayo diha sa pag-ampo alang sa inyong pagkaon sa matag adlaw, hunahunaa og maayo ang inyong mga panginahanglan—ang unsay kulang ninyo ug unsay kinahanglan ninyong bantayan. Sa inyong paghigda, hunahunaa ang mga kalampusan ug mga kapakyasan sa adlaw ug unsay makapahimo sa sunod adlaw nga mas maayo og gamay. Ug pasalamati ang inyong Langitnong Amahan alang sa mana nga Iyang gibutang sa inyong agianan nga nakapatunhay kaninyo sa tibuok adlaw. Ang inyong mga pamalandong mopalambo sa inyong pagtuo Kaniya samtang inyong makita ang Iyang kamot nga nagtabang kaninyo sa paglahutay sa pipila ka mga butang ug pag-usab sa uban. Makahimo kamo sa pagmaya sa usa pa ka adlaw, usa pa ka lakang paingon sa kinabuhing dayon.
Paghinumdom sa Tinapay sa Kinabuhi
Labaw sa tanan, hinumdumi nga kauban nato Siya kansang mana usa ka pahisama ug simbolo, ang Manunubos.
“Ako mao ang tinapay nga nagahatag og kinabuhi.
“Ang inyong mga ginikanan nanagkaon sa mana didto sa kamingawan, ngani nangamatay sila.
“Ania kining tinapay nga nanaug gikan sa langit, aron ang tawo makakaon niini ug dili mamatay.
“Ako mao ang buhing tinapay nga nanaug gikan sa langit: bisan kinsa nga mokaon niining maong tinapay, siya mabuhi sa dayon: ug ang tinapay nga akong igahatag alang sa kinabuhi sa kalibutan mao ang akong unod” (Juan 6:48–51).
Ako mohatag sa akong pagsaksi sa buhing kamatuoran sa Tinapay sa Kinabuhi, si Jesukristo, ug mahitungod sa walay kinutuban nga gahum ug maabut sa Iyang Pag-ula. Sa katapusan, ang Iyang Pag-ula ug ang Iyang grasya mao ang atong pagkaon sa matag adlaw. Kinahanglan kitang magtinguha Kaniya sa matag adlaw, sa pagbuhat sa Iyang kabubut-on sa matag adlaw, nga mahimong usa uban Kaniya maingon nga Siya usa uban sa Amahan (tan-awa sa Juan 17:20–23). Sa pagbuhat nato sa ingon, unta ang atong Langitnong Amahan mohatag kanato sa atong pagkaon sa matag adlaw.
Mga paghulagway pinaagi ni Diane Hayden