Gikan sa Natad sa Misyon
AngDios Mitubag sa Duha ka mga Pag-ampo
Samtang nagserbisyo ko isip misyonaryo sa Durango, Mexico, ang among presidente sa misyon mihagit sa among misyon sa pagsulay og usa ka “semana sa pagsakripisyo.” Iya kaming gihangyo nga mohatag og dugang pa nga paningkamot kay sa naandan pinaagi sa pagtrabaho og maayo ug paghimo og piho nga mga tumong nianang semana. Ang akong kompanyon ug ako adunay hugot nga pagtuo nga kon mosakripisyo kami niining paagiha, ang Ginoo mopanalangin kanamo ug makakita kami og daghang mga tawo nga matudloan.
Bisan pa man niana, atol sa semana sa pagsakripisyo, wala kaayo kami makaangkon og kalampusan. Wala kami makakita og bisan unsa nga mga pamilya aron matudloan, ug kami nasagmuyo.
Usa ka buntag human niana nga semana, ang akong kompanyon ug ako mitan-aw sa mapa sa among area. Ang among area dako kaayo, apan among gibati nga kinahanglan kaming moadto sa bahin nga pinakalayo.
Human kami nakaabut didto, nag-ampo kami ug nangutana sa Langitnong Amahan kon asa nga dalan ug asa nga balay kami moadto. Sa dihang nahuman na kami, milingi-lingi kami aron motan-aw sa tanang mga dalan. Nakakita kami og usa ka koral sa duol ug mitan-aw sa ibabaw niini. Nakakita kami og usa ka babaye nga naglingkod nga nagpiyong sa iyang mga mata, nga adunay silhig nga gikuptan.
Ang akong kompanyon miingon, “Hello!” ug sa dihang ang babaye nakadungog kanamo, mibarug siya ug nagpadayon og panilhig nga morag wala ray nahitabo. Dayon gisultihan namo siya nga mga misyonaryo kami sa Simbahan ni Jesukristo ug nga kami adunay mensahe alang kaniya. Iya kaming gipasulod sa iyang panimalay, ug kami adunay espirituhanon kaayo nga panaghisgutan. Amo siyang gisultihan kalabut ni Joseph Smith ug sa unsa nga paagi nga miadto siya sa pundok sa kakahoyan sa pag-ampo aron makakaplag sa kamatuoran, ug agig tubag sa iyang pag-ampo, gibisitahan siya sa Dios nga Amahan ug ni Jesukristo.
Misagbat siya kanamo ug miingon, “Tinuod kana. Ako nasayud nga ang Dios motubag sa atong mga pag-ampo. Sa dihang nakig-istorya kamo kanako, nag-ampo ko ug nangayo sa Ginoo sa pagpadala og tawo nga makagiya kanako ngadto sa Iyang dalan, ug dali kamong miabut.”
Gibati namo ang Espiritu, ug mipamatuod kami nga ang Dios mipadala kanamo ngadto kaniya ug nga kami usab nag-ampo niana gayung higayuna aron masayud kon kinsa sa Iyang mga anak ang nagkinahanglan sa among tabang. Sa wala madugay si Sister Rufina nabunyagan. Sa mga semana nga misunod, ang iyang mga anak, mga apo, ug gani ang pipila sa iyang mga silingan nabunyagan—mikabat og 20 ka mga kinabig nianang bahina sa among area. Ang Ginoo migiya kanamo ngadto kang Sister Rufina, ug siya ang pultahan sa pagpakigbahin sa ebanghelyo ngadto sa iyang pamilya ug mga silingan.
Ako nasayud nga ang Langitnong Amahan mopanalangin kanato kon kita mangayo Kaniya, apan mahitabo lamang kana human nga Iyang masulayan ang atong pagtuo. Mapasalamaton ako nga ang akong kompanyon ug ako nahimong mga instrumento sa mga kamot sa Ginoo ug nakakaplag sa mga tawo kinsa andam nga maminaw sa mensahe sa ebanghelyo. Ako nasayud nga ang Dios nahigugma kanato ug mogiya kanato kon kita mangayo.
paghulagway pinaagi ni Dilleen Marsh