Bakit Kailangan ang Seminary?

Ano ang masasabi ninyong pinakamahalagang bagay na matatamo ng estudyante mula sa seminary at institute?

Ano ang masasabi ninyong pinakamahalagang bagay na matatamo ng estudyante mula sa seminary at institute? Nang itanong din ito ng grupo ng mga estudyante ng seminary sa Commissioner ng Church Educational System na si Elder Paul V. Johnson ng Pitumpu, sinabi niya na ang pinakamahalagang bagay na iyong matatamo ay ang “tunay na patotoo na si Jesus ang Cristo. Ang pagkaunawa na ang tunay na kaalaman ay ang espirituwal na kaalaman. Ito ang ipinararating ng Espiritu Santo sa bawat isa sa atin. Iyan ang pinakamakapangyarihang katotohanan, ang pinakamagandang bagay na maidudulot ng seminary at institute. Hindi lamang nito binabago ang nalalaman mo; binabago nito kung sino ka, at binabago nito ang pananaw mo sa mundo. At ang ganyang mataas na uri ng pag-aaral ang pumupuno sa iba pa ninyong pag-aaral” (“A Higher Education,” New Era, Abr. 2009, 15).

Si Elder Johnson ay isa sa maraming General Authority na nagsalita tungkol sa pinakamagagandang pagpapalang nagmumula sa pagdalo sa seminary at institute. Kaya kung itinatanong ninyo kung bakit kailangan ninyong pumunta sa seminary, heto pa ang ilang mabubuting dahilan mula sa mga propeta at apostol.

Makibahagi sa Seminary

“Tutulungan kayo ng seminary na makaunawa at umasa sa mga turo at Pagbabayad-sala ni Jesucristo. Madarama ninyo ang Espiritu ng Panginoon habang natututuhan ninyong mahalin ang mga banal na kasulatan. Ihahanda ninyo ang inyong sarili para sa templo at sa gawaing misyonero.

“Mga kabataan, hinihiling ko sa inyo na makibahagi sa seminary. Pag-aralan ang inyong mga banal na kasulatan araw-araw. Makinig na mabuti sa inyong mga guro. Mapanalanging ipamuhay ang inyong natututuhan.”

Pangulong Thomas S. Monson, “Participate in Seminary,” seminary.lds.org.

Tuklasin ang Tatlong Bagay na Magagawa ng Seminary

“May tatlong mabibisang bagay na nagagawa ang seminary. Una, tinitipon nito ang mga kabataang iisa ang pinahahalagahan. Gustong makisama ng mga kabataan sa iba na katulad nila ang pananampalataya at nagmamahal sa mga banal na kasulatan. Ikalawa, tinitipon nito ang mga kabataan kasama ang gurong may patotoo, at nadarama nila ang pag-aalab nito kapag ibinabahagi ito. Ikatlo, itinutuon ng seminary ang mga kabataan sa mga banal na kasulatan.”

Pangulong Henry B. Eyring, Unang Tagapayo sa Unang Panguluhan, “Isang Talakayan Tungkol sa Pag-aaral ng Banal na Kasulatan,” Liahona, Hulyo 2005, 11.

Unahin Ito

“Mga estudyante, kung alam ninyo ang inyong pinahahalagahan, hindi kayo mag-aalinlangang ipagpaliban ang pag-aaral ng isang elective class na nakasisiya kapalit ng pag-aaral na makapagpapatibay sa pinakapundasyon nito. At kapag naka-enrol na, pumasok, mag-aral, at matuto. Hikayatin ang inyong mga kaibigan na gawin din ang gayon. Hindi ninyo ito pagsisisihan kailanman; ipinapangako ko iyan.”

Pangulong Boyd K. Packer, Pangulo ng Korum ng Labindalawang Apostol, “Agency and Control,” Ensign, Mayo 1983, 67.

Magtatag ng Pundasyon para sa Kaligayahan at Tagumpay

“Tutulungan kayo ng mga programa sa seminary bilang kabataan na magtatag ng pundasyon para lumigaya at magtagumpay sa buhay.”

Elder Richard G. Scott ng Korum ng Labindalawang Apostol, “Panahon Na para Magmisyon!” Liahona, Mayo 2006, 88.

Anyayahan ang mga Pagpapala sa Inyong Buhay

“Nagpapasalamat ako sa sistema ng seminary sa Simbahan at sa programa ng institute ng Simbahan. Gusto kong hikayatin ang bawat estudyante sa high school na samantalahin ang programa ng seminary. Higit na pagpapalain ang inyong buhay kung gagawin ninyo ito”

Pangulong Gordon B. Hinckley (1910–2008), “Excerpts from Recent Addresses of President Gordon B. Hinckley,” Ensign, Dis. 1995, 67.

Magtapos sa Seminary

“Regular na dumalo sa seminary at magtapos sa seminary. Ang pag-aral sa seminary ay isa sa mga pinakamahalagang espirituwal na karanasang matatamo ng kabataang lalaki [at babae].”

Pangulong Ezra Taft Benson (1899–1994), “To the ‘Youth of the Noble Birthright,’” Ensign, Mayo 1986, 44; “To the Young Women of the Church,” Ensign, Nob. 1986, 82.

Pag-aralan ang mga Katotohanan ng Ebanghelyo

“Nais kong makadalo ang bawat bata sa seminary, dahil doon nila matututuhan ang maraming mahahalagang katotohanan ng ebanghelyo. Sa seminary masasagot ang mga tanong sa isipan nila tungkol sa kanilang dapat gawin, at sila ay mangaglilingkod sa misyon.”

Pangulong Spencer W. Kimball (1895–1985), “President Kimball Speaks Out on Being a Missionary,” New Era, Mayo 1981, 49.

Larawan ni Spencer W. Kimball sa kagandahang-loob ng LDS Church Archives