Pagsugat sa Bag-ong Panahon sa Kinabuhi
Nagpuyo ba kamo sa dapit diin ang kolor sa mga kahoy mausab agi og pangandam sa tingtugnaw? Kining upat ka managhigala nagpuyo niana. Si Noah B., Dylan L., Patrick M., ug Ben M. tanan nagpuyo sa Prince Edward Island sa layo nga baybayon sa sidlakan sa Canada. Sama sa mga kahoy, kining mga bataa nangandam alang sa bag-ong panahon sa kinabuhi. Sila mag-12 anyos na sa sunod nga tuig, ug nagpasabut kana sa pagpanamilit sa Primary ug hello sa Young Men. Kini ang ilang ikasulti mahitungod sa pagtubo ug pagbalhin.
Pabilin kon Unsa Kamo
Dihang mibalhin si Noah dinhi, gitabangan siya sa bag-o niyang mga higala nga maanad sa kinabuhi dinhi sa isla. Karon isip kinamagulangan sa grupo, nagtabang siya kanila nga maanad sa kinabuhi sa Young Men. “Nabalaka ko kon maayo ba ang pagdawat kanako ug sa pakig-ilaila sa uban,” miingon si Noah sa pagsugod niya sa Young Men. “Ang pagkuyog sa mga kalihokan nakatabang gayud.” Ang paboritong kanta ni Noah sa Primary mao ang mahitungod sa sundalo ni Helaman, ug mao kana ang iyang pagtan-aw sa korum sa priesthood—nga nagkahiusa.
Ang iyang tambag? “Pabilin kon unsa kamo.”
Tahura ang Priesthood
Alang kang Patrick, ang pagkadawat sa priesthood dili mahitungod sa pagtubo sa edad. Mahitungod kini sa katakus ug kaandam. “Dili nimo madawat ang priesthood tungod lang 12 anyos ka na,” miingon si Patrick. “Kinahanglan nga andam ka.”
Nasabtan ni Dylan kon unsa ka importante ang pagpangandam. Naningkamot siyang makaadto sa simbahan og sayo aron espirituhanong maandam sa pag-apud-apod sa sakrament. “Nakaapud-apod ko sa sakrament tulo o upat ka higayon, ug sa matag higayon ang Espiritu motandog sa akong kasingkasing. Wala ko magtuo nga maanad ba diay ko niini,” mingon siya.
Miingon si Ben nga ang pag-apud-apod sa sakrament nagpahinumdom kaniya sa Katapusang Panihapon: “Si Jesus nagbarug dinhi. Nagbarug kita sa dapit nga gibarugan ni Jesus, ug gusto Siya nga tua sab kita.”
Tan-aw ngadto sa Templo
Naningkamot si Ben nga makaangkon sa iyang Ganti sa Hugot nga Pagtuo ug nagpaabut nga siya makahimo na sa pagpabunyag alang sa mga patay sa unang higayon. “Wala pa ko kasulod sa templo, apan ang ubang tawo kanunay nga naghatag og mga pagpamatuod kabahin sa mainiton ug sa nindot nilang pagbati human sila nangadto,” miingon si Ben.
Nahimo ni Noah ang una niyang pagbisita sa templo bag-o lang. Miingon siya nga ang batan-ong mga lalaki sa iyang korum mitagad kaniya sama sa pamilya. “Tingali kuyawan ka, apan dunay mga tawo didto nga motabang kanimo,” miingon siya. “Mobati ka nga gi-welcome.”
Noah
Dylan
Patrick
Ben
Gilitratohan pinaagi ni Marissa Widdison