Nagsinina alang sa usa ka Sayaw
Paghulagway pinaagi ni SCOTT GREER
Natintal ko sa pagsunod sa kadaghanan, apan akong naamguhan nga kinahanglan diay kong mahimo nga ehemplo.
Sa tin-edyer pa ko, lisud usahay ang pagsunod sa ebanghelyo. Ang dapit nga akong gipuy-an diyutay ra ang miyembro sa Simbahan, ug ang akong mga higala nga dili mga miyembro sa Simbahan usahay maoy nagpalisud-lisud kanako sa pagpabilin sa husto nga dalan.
“Kinahanglan nga ingon niini ang imong isul-ob; mosamot kanindot ang imong mga mata,” usa sa akong higala miingon nako sa wala pa ang sayaw. Mitunol siya og sinina nga ipahulam niya nako, apan kini walay mga manggas. Mihukom ko nga isul-ob ko kini nga sapawan ra og jacket.
Sa pag-abut nako sa sayaw, walay bisan usa nga nagsul-ob og sinina nga dunay manggas, ug ingon og naulaw ko. Dihang giinitan na ko og maayo, giingnan ko sa akong mga higala nga kinahanglan nakong huboon ang akong jacket ug mas maayo pa kong tan-awon.
Diha nga hapit na ko mouyon tungod sa katarungan, akong nahinumduman ang akong patriarchal nga panalangin. Ako nahatagan og panalangin nga duna koy daghang tintasyon ug kon mabuntog nako, daghang tawo ang mosunod kanako. Didto ko nakaamgo nga gikinahanglan nakong magpabilin sa husto nga dalan—dili lamang alang sa akong kaugalingon apan sa uban nga taas og tan-aw kanako. Mihukom ko nga dili huboon ang jacket.
Usahay himoon kong kataw-anan nga wala mohimo sama sa gibuhat sa uban, apan nagpabilin kong nagmalig-on ug napanalanginan tungod niini. Nakat-unan nako sa wala madugay nga daghang tawo ang taas og pagtan-aw kanako. Pipila sa akong mga higala gani miingon kanako nga ila kong gitahud sa pagsunod sa akong mga sumbanan. Nangayo sila’g pasaylo nako sa paglisud-lisod kanako sa wala pagsunod sa gipanghimo sa tanan sa high school.
Tungod kay akong gisunod ang mga sumbanan sa Simbahan ug naningkamot nga mahimong ehemplo, nakabaton ko og misyonaryo nga kasinatian ug nakatudlo sa ebanghelyo ngadto sa uban. Dili unta ko makaimpluwensya sa uban kon wala pa ko magpadayon sa husto nga dalan.