Alang sa Kalig-on sa mga Kabatan-onan
Sinina ug Panagway: “Pagiyaha ang Espiritu”
© Busath Photography
Isip mga representante ni Kristo, atong gipakita ang pagtahud sa atong mga lawas “sa tanan nga mga panahon, ug sa tanan nga mga butang, ug sa tanan nga mga dapit” pinaagi sa pagsunod sa piho nga mga sumbanan.
Si Kim kanunay magsul-ob og tarung nga sinina. Sa miaging adlaw nangayo ko og opinyon sa unsay iyang gikonsiderar nga tarung nga sinina, tarung nga blouse, ug tarung nga swimsuit. Imbis maghisgot sa eksaktong mga sukod sa mga kilid ug sa liog, among gihisgutan ang mga baruganan nga naglangkob sa tarung nga sininaan ug sa hagit sa pagpangita og tarung nga sinina nga madanihon tan-awon. Nalingaw mi sa paghunahuna og mga paagi unsaon pagpanindot ug pagpataas og usa ka skirt. Sa katapusan miingon si Kim, “Kon sa una nakong pagsul-ob dili ko komportabe, kasagaran nagpasabut kini nga kini dili tarung ug dili ko komportable nga magsul-ob niini. Nakakat-on ko sa dili gayud pagpalit niini. Ibalik ko kini sa sab-itanan.”
Samtang naningkamot si Kim sa pagpakabuhi nga takus, ang Espiritu Santo makagiya kaniya sa iyang mga pagpili og sinina. Gisunod gayud niya ang sumbanan sa tarung nga sininaan ug walay tinguha sa pag-usab sa balaod sa sinina ug panagway. Nakasabut siya nga ang iyang lawas usa ka templo (tan-awa sa 1 Mga Taga-Corinto 3:16) ug siya dunay responsibilidad sa pag-atiman, pagpanalipod, ug pagsinina og tarung niini.
Sama sa pagtukod og templo, labihan nga pag-amping ang gihimo sa pagsiguro nga mapanalipdan kini ug matahum ang pagka-adorno, sa sulod ug sa gawas. Ang importanting paagi sa pagplano sa mga templo mao ang pagsabut nga ang templo nagrepresentar sa Ginoo—Iya kini nga balay. Kita mitahud sa mga templo isip sagradong mga estraktura diin ang mga takus lamang ang makasulod. Kita may balaang pagtahud sa mga templo tungod kay ang sagradong mga ordinansa ug pakigsaad nga atong giapilan naghimong posible nga kita makabalik sa atong Langitnong Amahan.
Ang inyong lawas mas bililhon kay sa kinanindutang templo sa yuta. Hinigugma kamo nga mga anak sa Dios! Kining sama nga mga baruganan—representasyon, pagtahud, ug balaang pagtahud—magamit labaw pa kay sa pag-atiman ug pagpanalipod nga inyong gihimo sa inyong lawas.
Representasyon
Matag semana samtang moambit kita sa sakrament, atong gidala sa atong kaugalingon ang pangalan sa Manluluwas. Kita Iyang mga representante sa yuta. Usa sa mga sumbanan diha sa Alang sa Kalig-on sa mga Kabatan-onan nag-ingon: “Pinaagi sa inyong sinina og panagway, kamo makapakita [sa Ginoo] nga kamo nakahibalo unsa ka bililhon ang inyong lawas. Kamo makapakita nga kamo tinun-an ni Jesukristo ug nga kamo nahigugma Kaniya.”1
Dihang ang usa ka batan-ong babaye nakabasa niini nga pahayag, nakahukom siya nga dili siya magpaduol sa pagkadili tarung nga sininaan. Diha-diha dayon iyang gipanangtang ang tanan nga diha sa iyang wardrobe nga dili haum sa pagkarepresentante sa Manluluwas. Miingon siya, “Magmaalamon ako; dili gani ko mosulay bisan unsa diha sa mga tindahan nga akong nahibaloan nga dili nako angayang isul-ob. Nganong magpatintal man?” Ang baruganan sa representasyon nakatabang niya sa paghimo og lig-on nga desisyon.
Paghulagway sa litrato pinaagi ni Cody Bell
Pagtahud
Isip mga representante ni Kristo, atong gipakita ang pagtahud sa atong mga lawas “sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9) pinaagi sa pagsunod sa piho nga mga sumbanan. Gikinahanglan sa Ginoo nga kadtong mga limpyo lamang ang makasulod sa iyang templo. Ang inyong pagpili sa pagkamahiyason makita sa inyong pagtahud sa Ginoo ug sa inyong pisikal nga lawas.
Kinahanglan nga atong ipakita ang pagtahud sa lawas sa uban ug tabangan silang magpuyo og mahiyason nga kinabuhi. Si Elder M. Russell Ballard sa Korum sa Napulog Duha ka mga Apostoles miingon: “[Ang batan-ong mga babaye] kinahanglan nga makasabut nga kon sila magsul-ob og sinina nga hugot ra kaayo, mubo ra kaayo, o mubo ra kaayo og tabas dili lamang makapadala sila og sayop nga mensahe ngadto sa batan-ong mga lalaki nga ilang ikauban, apan makasilsil sa ilang kaugalingong hunahuna sa sayop nga pagtuo nga ang bili sa usa ka babaye magdepende lamang sa iyang pisikal nga panagway. Wala gayud kini sukad malakip sa matarung nga paghulagway sa usa ka matinud-anon nga anak nga babaye sa Dios.”2
Batan-ong mga babaye, tahura ang inyong lawas ug tabangi ang uban, ilabi na ang mga batan-ong lalaki, pagmentinar og mahiyasong mga hunahuna ug mga lihok. Tahura ang inyong lawas, sa kahibalo nga ang inadlaw-adlawng matarung nga pagpakabuhi maghatag kaninyo og mahangturon nga bili.
Balaan nga Pagtahud
Si Elder Robert D. Hales sa Korum sa Napulog Duha ka mga Apostoles mitudlo kanato: “Ingon nga ang mga nataran sa templo naghulagway sa kasagrado ug balaang pagtahud alang sa unsay nahitabo sulod sa templo, ang atong sinina naghulagway sa katahum ug kaputli sa sulod sa atong mga kaugalingon. Unsay atong sininaan naghulagway kon kita ba adunay hustong pagtahud … sa mga ordinansa sa templo ug sa mahangturong mga pakigsaad ug kon kita ba nangandam sa atong mga kaugalingon sa pagdawat niini.”3
Ipakita ang inyong balaang pagtahud sa maulaong sakripisyo sa atong Manluluwas pinaagi sa pagsul-ob sa inyong “Pangsimba nga sinina” sa pagtambong sa ordinansa sa sakrament. “Ang batan-ong mga lalaki kinahanglang ligdong nga magsinina kon mopahigayon sa ordinansa sa sakrament.”4 Ang mga batan-ong babaye magsinina og tarung.
Barug! Pagmahimo nga ehemplo sa tarung nga sininaan diha sa panimalay, sa eskwela, sa dagat, sa mga sayaw, kon magdula og sports. Sunda ang ehemplo ni Kim kon magpili sa inyong isul-ob, tuguti ang Espiritu Santo nga mogiya sa inyong mga desisyon. “Pangutan-a ang inyong kaugalingon, ‘Mobati ba ako nga komportable sa akong panagway kon ako anaa sa atubangan sa Ginoo?’”5
Kon sundon ninyo kining tulo ka baruganan—pagrepresentar, pagrespeto, ug pagtahud—kon magpili sa inyong isul-ob, kamo “mopakita” (Doktrina ug mga Pakigsaad 115:5) isip hinigugma nga mga representante sa Manluluwas.