Pagtudlo og Pagkamatarung diha sa Panimalay

Ni Elder Delbert L. Stapley (1896–1978)

Sa Korum sa Napulog Duha ka mga Apostoles

Si Delbert L. Stapley natawo niadtong Disyembre 11, 1896, sa Arizona, USA. Siya gi-set apart isip sakop sa Napulog Duha ka mga Apostoles niadtong Oktubre 5, 1950, ug nagserbisyo sa korum hangtud siya namatay niadtong Agosto 19, 1978. Kining pakigpulong sa debosyonal gihatag sa Brigham Young University niadtong Pebrero 1, 1977. Ang kompleto nga teksto niining pakigpulong sa Iningles makita sa speeches.byu.edu.

Responsibilidad ug panalangin kini sa mga ginikanan sa pagtudlo ug pagbansay sa ilang mga anak nga magpuyo sa matarung nga paagi.

Ang mga ginikanan adunay oportunidad sa pagtudlo ug pagporma sa mga kinaiya sa ilang mga anak samtang wala pay gahum si Satanas sa pagtintal kanila ug sa dili pa sila mag-otso anyos, kon moabut na sila niini nga edad sila responsable sa atubangan sa Dios. … Ang Ginoo naghatag niining bililhong mga tuig ngadto sa mga ginikanan, ang unang tuig sa kinabuhi sa bata, sa dihang ang mga bata wala pay tulubagon sa ilang gipangsulti ug gibuhat. Kini responsibilidad ug panalangin sa mga ginikanan sa pagtudlo ug pagbansay sa ilang mga anak nga magpuyo sa matarung nga paagi.

Ang labing epektibo nga paagi sa pagtudlo sa pagkamatarung ug relihiyon diha sa panimalay mao ang ehemplo. Unta, ang mga ginikanan magbaton og maayo ug limpyo nga kinabuhi ug maggamit gyud niini isip ehemplo sa pagtudlo ug pagbansay sa ilang mga anak. [Si Presidente David O. McKay (1873–1970) mitudlo:] “Kon gusto ninyong motudlo og hugot nga pagtuo ngadto sa Dios, ipakita mismo ang inyong hugot nga pagtuo ngadto Kaniya; kon gusto ninyong motudlo og pag-ampo, kamo mismo mag-ampo; … kon gusto ninyo nga sila dili daling masuko, nan kamo mismo maglikay nga masuko dayon; kon gusto ninyo nga ang inyong anak magpuyo nga mahiyason, may kontrol sa kaugalingon, maayo og dungog, nan pakita og maayong ehemplo niining mga butanga.”¹ Ang pagbuhat niining mga pagtulun-an mas makapaikag sa inyong mga anak; ug sila, nakadawat niining paggiya gikan sa mga ginikanan, makapalig-on sa ilang kaugalingon batok sa mga tintasyon ni Satanas, kansang tumong mao ang pagguba sa ilang kinabuhi kon sila moabut na sa edad sa pagkamay-tulubagon. Ang mga ginikanan adunay katungdanan nga ang ilang mga anak mamahimong may pagtahud, sinseridad, dili daling masuko, ug kaisug sa pagbuhat kanunay sa eksakto. Ang ehemplo hilabing kaepektibo kaysa hunahunaon lang.

Ang matag adlaw nga kinabuhi sa panimalay kinahanglang nahiuyon sa mga baruganan ug mga sumbanan sa Simbahan. Ang atong mga pakigsabut sa negosyo kinahanglang nahiuyon sa atong relihiyon. Ang mga bata daling makamatikod kon dili kinasingkasing. Si John Milton miingon nga ang pagpakaaron-ingnon mao lamang ang sala nga dili mamatikdan gawas lang sa Dios. Ang mga anak, hinoon, sensitibo sa mga butang nga sayop, ug sila dili ganahan kon dili kinasingkasing ug kon nagpakaaron-ingnon. Kita nasayud nga ang mga bata mas maimpluwensya sa mga wali nga atong gibuhat kaysa sa mga wali nga atong gisangyaw. Ang mga ginikanan kinahanglang matinuoron sa ilang mga anak, sa pagtuman sa mga saad ngadto kanila ug kanunayng mosulti sa tinuod. Ang pagkamakanunayon sa ginikanan nga makaangkon sa pagsalig sa iyang anak. Kon ang bata mobati nga inyong gipasidunggan ang iyang pagsalig ug suklian kini, dili siya mosupak niini, ni mopakaulaw sa inyong pangalan. …

Ang mga ginikanan dili gayud mag-away atubangan sa ilang mga anak. Usahay ang pag-away mahitabo tungod sa pagsulay sa pagkorihir o pagdisiplina sa bata. Ang usa kanila mobadlong; ang lain dili mouyon. Ug ang nahiusang impluwensya diha sa panimalay, kutob nga may kalabutan ang bata, mawala. Ang mga ginikanan kinahanglang magkahiusa kon unsaon nila pagpadako sa ilang anak; kay kon dili, ang bata mahimong maglakaw sa sayop nga dalan sa kalibog. Si Richard L. Evans miingon: “Ang walay panaghiusa sa mga ginikanan nagpasabut nga dili patas ug makalibog ug makapahuyang sa mga pundasyon sa pamilya. Kadtong lantawon sa bata nga naggiya kanila kinahanglang magkahiusa sa ilang paggiya.”² Kita nasayud nga ang mga bata sensitibo sa modo ug pagbati sa mga pamilya; sila makabati og tensyon ug panaglahi nga dili nila kanunay masabtan o mahulagway. …

Ang bata adunay katungod nga mobati nga sa iyang panimalay may dapit nga kadangpan, usa ka dapit sa proteksyon sa mga kakuyaw ug kadaut sa gawas sa kalibutan. Ang panaghiusa ug integridad sa pamilya mahinungdanon sa pagtubag niining kinahanglanon. Walay laing dapit gawas sa panimalay diin ang tinuod ug mahangturong kalipay makaplagan niining kinabuhia. Posible nga mahimong gamay nga langit ang panimalay; sa tinuod, gilantaw nako ang langit nga sumpay sa ideyal nga kinabuhi dinhi sa yuta.³ …

Ang ebanghelyo nga atong gitudlo tinuod. Si Kristo buhi, ang Dios buhi, ug ang mahimayaong mga mansyon giandam sa kahitas-an para sa tanan Niyang matinud-anon ug mapahinungurong mga anak. Planoha karon ang matang sa panimalay ug pamilya nga inyong gitinguha ug unsaon ninyo sa pagtubag sa mga panginahanglan sa inyong mga anak aron sila magpabilin sa matarung nga dalan nga mogiya sa pamilya ngadto sa kinabuhing dayon sa celestial nga panimalay. Ang Dios mopanalangin kaninyo, akong mga kaigsoonan. Sa akong hunahuna kamo makasabut nga kadaghanan sa gipamulong kabahin kaninyo. Ug ang pag-organisar ug pagdumala sa inyong panimalay sa sagradong paagi mahinungdanon kaayo sa mga batan-on nga natawo aron sa pagpanalangin kaninyo.