Pagpasidungog sa Atong mga Pakigsaad

Tun-i kini nga materyal sa mainampoon nga paagi ug, kon angay, hisguti kini uban sa mga sister nga inyong bisitahan. Gamita ang mga pangutana sa pagtabang kaninyo sa paglig-on sa inyong mga sister ug sa paghimo sa Relief Society isip aktibong bahin sa inyong kaugalingon nga kinabuhi.

Hugot nga Pagtuo, Pamilya, Kahupayan

Ang visiting teaching usa ka pagpakita sa atong pagkadisipulo ug paagi sa pagpasidungog sa atong mga pakigsaad samtang kita nagserbisyo ug naglig-on sa usag usa. Ang pakigsaad usa ka sagrado ug mahangturon nga saad tali sa Dios ug sa Iyang mga anak. “Kon kita makaamgo nga kita mga anak sa pakigsaad, makaila kita kon kinsa kita ug unsa ang gipaabut sa Dios nato,” miingon si Elder Russell M. Nelson sa Korum sa Napulog Duha ka mga Apostoles. “Ang Iyang balaod nahisulat diha sa atong mga kasingkasing. Siya mao ang atong Dios ug kita Iyang katawhan.”¹

Isip mga visiting teacher atong mapalig-on ang atong gibisitahan sa ilang mga paningkamot sa pagtuman sa ilang sagradong mga pakigsaad. Sa pagbuhat niini, kita makatabang nga sila maandam sa mga panalangin sa kinabuhing dayon. “Ang matag sister niini nga Simbahan kinsa nakahimo og mga pakigsaad uban sa Ginoo adunay balaan nga sugo sa pagtabang sa pagluwas og mga kalag, sa paggiya sa mga babaye sa kalibutan, sa paglig-on sa mga panimalay sa Zion, ug sa pagtukod sa gingharian sa Dios,”² miingon si Elder M. Russell Ballard sa Korum sa Napulog Duha ka mga Apostoles.

Samtang kita naghimo ug nagtuman sa sagradong mga pakigsaad, kita mahimong mga instrumento diha sa mga kamot sa Dios. Kita makapahayag sa atong mga pagtuo ug makalig-on sa pagtuo sa uban ngadto sa Langitnong Amahan ug ni Jesukristo.

Gikan sa mga Kasulatan

1 Nephi 14:14; Mosiah 5:5–7; 18:8–13; Doktrina ug mga Pakigsaad 42:78; 84:106

Gikan sa Atong Kasaysayan

Ang templo “usa ka dapit sa pagpasalamat alang sa tanan nga mga santos,” gipadayag sa Ginoo ngadto kang Propeta Joseph Smith niadtong 1833. Kini “usa ka dapit alang sa pagpanudlo niadtong tanan kinsa gitawag ngadto sa buluhaton sa pangalagad diha sa ilang tanang daghan nga mga balaan nga tawag ug mga katungdanan; aron sila mahimo nga hingpit diha sa pagpasabut sa ilang pagpangalagad, sa teoriya, sa baruganan, ug sa doktrina, sa tanan nga mga butang mahitungod sa gingharian sa Dios sa yuta” (D&P 97:13–14).

Ang mga sister sa Relief Society sa Nauvoo, Illinois, sa sayo sa mga 1840 nagtinabangay sa pagpangandam alang sa mga ordinansa sa templo. Sa mga ordinansa sa mas taas nga priesthood nga nadawat sa mga Santos didto sa Templo sa Nauvoo, “ang gahum sa pagkadiosnon [na]pakita” (D&P 84:20). “Samtang gihuptan sa mga Santos ang ilang mga pakigsaad, kini nga gahum mipalig-on ug misuporta kanila lahus sa ilang mga pagsulay sa mga adlaw ug katuigan nga moabut.”³

Sa Simbahan karon, ang matinud-anong mga babaye ug mga lalaki sa tibuok kalibutan nagserbisyo sa templo ug nagpadayon sa pagkakaplag og kalig-on sa mga panalangin nga madawat lamang pinaagi sa mga pakigsaad sa templo.

Templo sa Nauvoo Illinois, ni Scott Goodwin