“Unsay ipasabut sa pagtahud sa priesthood sa Dios?”

Ang priesthood mao ang gahum diin ang Langitnong Amahan ug si Jesukristo mohimo sa Ilang buhat. Kini ang pinakamahinungdanon nga gahum dinhi sa yuta. Pinaagi sa priesthood, gihimo ang mga ordinansa, mga panalangin gihatag, ang buhat sa templo gituman, ang ebanghelyo gisangyaw, ug mga milagro gihimo.

Ang mga naghupot sa priesthood nagrepresentar sa Manluluwas, busa gitahud nila ang priesthood pinaagi sa paghimo sa buhat sa Manluluwas kon Siya nia pa unta dinhi. Gitahud nila ang priesthood pinaagi sa pagpakabuhi nga takus niini. Gitahud nila ang priesthood pinaagi sa ilang sininaan, mga buhat, pulong, serbisyo, ug bisan sa mga hunahuna.

Ang mga batan-ong babaye makatahud usab sa priesthood pinaagi sa paghupot sa ilang mga pakigsaad sa bunyag ug sa pag-apil sa mga ordinansa sa priesthood sa balaang paagi sama sa sakrament ug buhat sa templo. Makasuporta sila sa ilang mga amahan, igsoong lalaki, ug ubang mga naghupot sa priesthood pinaagi sa pagsunod sa mga sugo ug magpakabuhi nga takus sa paghimo sa ilang mga katungdanan sa priesthood.

Tanan kita makapasidungog sa priesthood pinaagi sa matinud-anong pagserbisyo sa atong mga calling, pinaagi sa pagtahud niadtong nanaghupot sa priesthood, pinaagi sa pagtahud sa buhat nga ilang gituman, ug sa pagtahud sa mga ordinansa ug pakigsaad diin nakatabang kini nga atong madawat.

Paglihok Ingon nga usa ka Representante sa Dios

Kon masugdan nato ang pagsabut kon unsa kanindot nga gihatagan kita sa Dios niini nga gasa, sa ingon ang pagtahud sa priesthood sayon ra: molihok uban sa pasalamat ug pagtahud sa gahum nga gisalig diha kanimo. Pangutan-a ang imong kaugalingon, kon ang tanan sa akong palibut nahibalo nga naghupot ko sa gahum sa Dios, mas taas ba ang ilang paghunahuna Kaniya o mas ubos? Mao kana ang pagtahud sa priesthood—pagkahibalo kana nga kamo representante sa Dios ug paghimo sa imong pinakamaayo sa pagpakita og pagtahud sa pagsalig nga Iyang gihatag kanimo.

Mason R., edad 19, Colorado, USA

Pagmahiyason

Isip usa ka batan-ong babaye makaingon ko nga wala ko magkinahanglan sa priesthood. Apan ang tanang batan-ong mga babaye nagkinahanglan niini. Atong gitahud ang priesthood pinaagi sa pagkamahiyason. Atong gitahud ang priesthood pinaagi sa pagtabang sa batan-ong mga lalaki nga makabaton og limpyong mga hunahuna. Tarung ang among mga sininaan ug limpyo ang pinulongan. Pinaagi sa paghimo niini, gitabangan namo ang batan-ong mga lalaki sa pagtahud sa priesthood, busa kami nagtahud usab sa priesthood.

Mason R., edad 14, Arizona, USA

Pagbuhat sa Imong Katungdanan ngadto sa Dios

Ang mahinungdanong paagi sa pagtahud sa priesthood mao, sa akong opinyon, ang pagbuhat sa mga butang nga buhaton sa Ginoo Mismo kon Siya nia pa dinhi sa yuta, tungod kay nagrepresentar kita kang Jesukristo. Buot ipasabut nagtuman kita sa mga pasalig, katungdanan, ug mga saad nga atong gihimo sa Dios dihang giordinahan kita sa priesthood. Pinaagi sa pagtahud sa Iyang priesthood, atong gisunod ang Iyang sugo sa “pagtindog ug pakita, aron ang [atong] kahayag mao ang usa ka sukaranan alang sa tanan nga mga nasud” (D&P 115:5). Atong gitabangan ang uban nga mahibalo nga daghan sa awtorisadong mga sinugo sa Dios nia sa yuta.

Bismarck B., edad 18, Santo Domingo, Dominican Republic

Pagpakita og Pagtahud sa Priesthood

Sa akong hunahuna kana nga pagtahud sa priesthood mao ang pagbaton og pagtahud ug kamasaligon sa paggamit sa priesthood. Kon ikaw dunay mga sakop sa Aaronic Priesthood kinsa mitahud sa priesthood ug sa sakrament sama sa among gihimo sa among ward, niana makabaton ka og talagsaong kasinatian sa pag-apud-apod ug pag-andam sa sakrament. Tanan kita magsul-ob og puti nga polo ug mag-necktie. Nahibalo kita nga dako kini og epekto sa ward, ug miepekto kini kanako. Nahibalo ko nga ang paghupot sa priesthood mao ang kinamaayohang butang nga nahitabo kanako.

Hansen B., edad 15, Texas, USA

Paghinumdom sa Manluluwas

Ang priesthood mao lamang ang tinuod nga gahum sa Dios dinhi sa yuta ug magpakita kanato sa dalan aron makabalik Kaniya. Kon maghunahuna kita sa pagtahud sa priesthood, naghunahuna kita sa pagsunod sa mga pagtulun-an gikan ni Presidente Thomas S. Monson ug sa ubang mga Apostoles. Ang pinakamaayong paagi sa pagtahud sa priesthood mao ang pagbuhat sa mga butang nga gitudlo kanato, nga makapahinumdom kanato sa Manluluwas. Kon kita mahinumdom Kaniya, magauban kanato ang Iyang Espiritu. Ang pagbaton sa Espiritu magtugot kanato nga magpabilin sa tumong ug mamahimong ehemplo sa mga sumbanan sa ebanghelyo.

Klase sa Sunday School: Kylie E., Jaiten B., Joseph E., Alexandra R., Kaylie V., Alisha F., ug Haylee W. (wala malitratohi); Idaho, USA

Pagdili pag-among sa Imong mga Sumbanan

Ang pagtahud sa priesthood nagpasabut sa pagpalayo sa mga sitwasyon diin nahibalo ka nga maamong ang imong mga sumbanan. Dihang nagtuon kami sa Daang Tugon sa seminary, among nahibaloan sa Genesis 39 ang ehemplo ni Jose sa Ehipto nga nagtahud sa iyang priesthood pinaagi sa pagpalayo gikan sa pagpangdani sa asawa ni Potiphar.

Usa ka paagi nga ang mga batan-ong babaye makatabang nato sa pagtahud sa priesthood mao ang pagsunod sa Alang sa Kalig-on sa mga Kabatan-onan nga mga sumbanan ug tarung nga sininaan.

Joseph B., edad 16, Texas, USA

Pagsuporta sa Priesthood

Ang pagtahud sa priesthood nagpasabut alang kanako nga ang mga batan-ong lalaki motahud ug mosuporta sa gasa nga gihatag sa Ginoo kanila. Kon akong makita ang batan-ong lalaki nga nagtahud sa priesthood, mobati ko og dako kaayong kalinaw ug mas modugang ang akong pagtahud niana nga batan-on. Gisalig kaniya sa Langitnong Amahan ang priesthood, mao nga nagtuo ko nga katungdanan sa batan-ong lalaki dili lamang ang paghupot sa priesthood apan sa pagsuporta usab niini.

Melinda B., edad 16, Washington, USA