Sinina ug Panagway

Sa kalibutan karon, daghan ang wala makasabut o motahud sa sagradong matang sa atong mga lawas, nalahi ang mga Santos sa Ulahing mga Adlaw pinaagi sa pagsinina nga kita nasayud unsa ka bililhon ang atong mga lawas (tan-awa sa Alang sa Kalig-on sa mga Kabatan-onan [booklet, 2011], 6–8). Sa pahina 52 niini nga isyu, si Mary N. Cook, unang magtatambag sa kinatibuk-ang kapangulohan sa Young Women, naghisgut niini nga sumbanan:

“Sama sa pagtukod sa templo, tumang pagkamabinantayon ang himoon aron sa pagsiguro nga kini giprotektahan ug maayong pagkaadorno, sa sulod ug gawas. Ang mahinungdanon kaayo sa pagplano sa mga templo mao ang pagsabut nga ang templo nagrepresentar sa balay sa Ginoo—kini Iyang balay. Kita nagtahud sa mga templo isip sagradong mga edipisyo diin kadtong angay lang ang makasulod. Kita naghatag og balaan nga pagtahud sa mga templo tungod sa sagradong mga ordinansa ug mga pakigsaad nga atong gipahigayon nga makapahimo kanato sa pagbalik ngadto sa atong Langitnong Amahan.

“Ang inyong lawas mas bililhon kaysa pinakanindot nga templo dinhi sa yuta. Kamo hinigugmang mga anak nga lalaki o babaye sa Dios! Kining sama nga baruganan sa—pagpresentar, pagtahud, ug paghatag og balaan nga pagtahud—mas himoon pa ninyo sa inyong lawas aron sa pag-amping ug pagprotekta niini.”

Ang mosunod nga mga sugyot makatabang kaninyo sa pagtudlo sa inyong mga anak sa eksaktong mga baruganan kabahin sa sinina ug panagway. Hinumdumi usab nga ang inyong ehemplo sa tarung nga sininaan makatudlo sa inyong mga anak kon unsa kaimportante ang husto nga sinina.

Mga Sugyot sa Pagtudlo sa mga Batan-on

Pagbasa uban sa inyong batan-on ang seksyon sa kabubut-on ug pagkamay-tulubagon sa Alang sa Kalig-on sa mga Kabatan-onan. Ang pagbuhat niini makahatag ninyo og oportunidad sa paghisgut sa mga doktrina, panalangin, ug pasidaan niini nga sumbanan ug sa pagtubag sa bisan unsang mga pangutana sa inyong anak.
Pagkonsiderar nga mag-family home evening sa kaimportante sa sinina ug panagway. Makapangutana kamo sa inyong pamilya, Kon ang Ginoo anaa sa simbahan uban kaninyo, unsaon ninyo sa pagsinina? Unsaon ninyo pagpresentar sa inyong kaugalingon ngadto Kaniya? Unsay inyong bation kon kamo tarung nga nagsinina? Makahisgut usab kamo kon sa unsang paagi nga magtarung og sinina sa ubang mga okasyon, sama sa eskwelahan, trabaho, o sosyal nga mga kalihokan.

Mga Sugyot sa Pagtudlo sa mga Bata

Ang atong sinina nagrepresentar kon unsa ang importante ngari kanato. Sa paghulagway niini nga baruganan, ikonsiderar nga mag-family home evening diin ang tanan magsinina sama sa mga misyonaryo o magsul-ob og Sunday best.
Bisan bata pa, ang mga anak makasugod sa pagsinina og tarung. Ribyuha uban sa inyong mga anak ang mga giya sa pahina 7 sa Alang sa Kalig-on sa mga Kabatan-onan ug pag-andam og mga sinina nga nahiuyon niadtong mga giya.

Paghulagway pinaagi ni SCOTT GREER