Sa Tibuok Simbahan

Apostol Mipahinungod sa Bag-ong MTC sa Pilipinas

Ang Missionary Training Center sa Pilipinas, nga gipahinungod ni Elder Russell M. Nelson sa Korum sa Napulog Duha ka mga Apostoles pagka-Mayo 20, 2012, makapahiluna og 144 ka mga misyonaryo gikan sa Pilipinas, Cambodia, Hong Kong, India, Indonesia, Mongolia, Pakistan, Sri Lanka, Taiwan, ug Thailand. Kini nga mga misyonaryo gibansay gamit ang mga pinulongan sa ilang gigikanang mga nasud.

Ang duha ka building sa bag-ong center naglangkob og auditorium, mga lawak sa paghubad, computer lab, labhanan, mga lawak sa pagtudlo nga may built-in audiovisual nga ekipo, mga lawak nga katulganan sa mga misyonaryo, mga klasehanan, ug mga opisina.

Sa paghalad sa pag-ampo aron sa pagpahinungod sa bag-ong pasilidad, si Elder Nelson mipahayag og pasalamat alang sa Pag-ula ni Jesukristo ug sa matinud-anong mga misyonaryo ug mga miyembro sa Simbahan sa tibuok kalibutan nga nahigugma ug nagserbisyo sa Ginoo. Nangamuyo siya sa pagpanalangin sa Republika sa Pilipinas nga “padayon nga abli ang pultahan sa pag-abi-abi” sa tanang mga sulugoon sa Ginoo ug nag-ampo nga ang katawhan sa nasud mapanalanginan og “kagawasan ug pagkamay-tulubagon nga motubo diha sa pagkamatarung, sa temporal ug sa espiritwal nga paagi.”

Ang Templo sa Manaus Brazil ang ika-138 sa Simbahan saTibuok Kalibutan ug Ikaunom sa Brazil

Si Presidente Dieter F. Uchtdorf, Ikaduhang Magtatambag sa Unang Kapangulohan, mipahinungod sa Templo sa Manaus Brazil—ang ika-138 sa Simbahan sa tibuok kalibutan ug ikaunom sa Brazil—pagka-Hunyo 10, 2012.

Ang hugot nga pagtuo ug pasalig sa mga Santos sa Ulahing mga Adlaw nga nagpuyo sa Brazil, diin adunay sobra sa usa ka milyon nga mga miyembro, mapahisama sa Amazon River, miingon si Presidente Uchtdorf—lawom ug lig-on nga nagdagayday.

Hapit 20 ka tuig, ang mga miyembro sa Simbahan gikan sa Manaus, usa ka siyudad nga nabulag tungod sa dagkong mga sapa ug mga lasang, mibiyahe nga dinaghan aron motambong sa templo sa São Paulo, Brazil—15 ka adlaw nga biyahe pag-adto ug pagbalik nga magsakay og barko ug bus—ug dayon sa templo sa Caracas, Venezuela—8 ka adlaw nga biyahe nga magsakay og bus.

Si Elder Claudio R. M. Costa sa Seventy ang nagserbisyo isip presidente sa Brazil Manaus Mission sa dihang giablihan kini niadtong 1990.

“Ako adunay pagsalig nga ang Templo sa Manaus mahimong busy kaayo, matag adlaw, tungod kay kini nga mga tawo nahigugma sa templo,” miingon si Elder Costa. “Nagtudlo sila sa ilang mga anak sa paghigugma sa templo. Ang templo bililhon kaayo ngadto kanila.”

Ang mga Miyembro sa Simbahan sa Samoa Nagsaulog sa ika-50 nga Anibersaryo sa Kagawasan, Unang Stake

Pagka-Biyernes, Hunyo 1, 2012, mga 350 ka mga Santos sa Ulahing mga Adlaw sa Samoa ang miapil sa laing mga Samoan sa pagmartsa sa parada sa kasaulogan sa kagawasan sa kadalanan sa Apia. Singkwenta ka tuig ang milabay, niadtong 1962, ang nasud nakabaton sa kagawasan niini gikan sa New Zealand.

Ang mga organisasyon, mga eskwelahan, lokal nga mga simbahan, ug internasyonal nga mga organisasyon miapil. Ang mga estudyante nga mga Santos sa Ulahing mga Adlaw milingaw sa napulo ka libo ka mga tumatan-aw uban sa ilang banda sa pagmartsa.

Apan ang katapusan sa semana naglakip og laing kasaulogan alang sa Samoan nga mga Santos sa Ulahing mga Adlaw; ika-50 ka tuig usab kini nga ang unang stake na-organisar sa nasud, sa Apia.

Pagka-Dominggo, Hunyo 3, si Elder James J. Hamula ug si Elder Kevin W. Pearson sa Seventy, parehong sakop sa Kapangulohan sa Pacific Area, namulong ngadto sa mga Santos sa Ulahing mga Adlaw ug mga bisita sa usa ka espesyal nga miting nga gisibya ngadto sa LDS nga mga meetinghouse sa tibuok nasud.

Naglantaw sa umaabut, ang mga Santos sa Ulahing mga Adlaw sa Samoa nagtumong nga mopadayon sa pagserbisyo ug paglig-on sa ilang mga pamilya, mga lungsod, ug nasud, miingon si Elder Hamula, kinsa nagserbisyo isip Presidente sa Area. “Talagsaon kaayo ang atong paglambo isip usa ka Simbahan dinhi, ug kita naglambo diha sa atong mga pamilya ug personal nga kinabuhi samtang nagtinguha kita sa pagsunod sa mga pagtulun-an ug ehemplo ni Jesukristo,” miingon siya.

Sa bag-ong Missionary Training Center sa Pilipinas, moabut ngadto sa 144 ka mga misyonaryo gikan sa Pilipinas, Cambodia, Hong Kong, India, Indonesia, Mongolia, Pakistan, Sri Lanka, Taiwan, ug Thailand ang gibansay gamit ang mga pinulongan sa ilang gigikanang mga nasud.

Gilitratohan ni Noel Maglaque