Pagmaalamon ug Pagmahimong usa ka Higala
Pagkat-on ug angkuna ang kahibalo ug kaalam sa inyong kabatan-on. Ug ibayaw ug lig-ona ang anaa sa inyong palibut.
Kon kamo gusto gayud nga makabaton og maayong kinabuhi, inyong sundon ang tambag nga naa sa mga kasulatan: “Pagkat-on diha sa imong kabatan-on sa paghupot sa mga sugo sa Dios” (Alma 37:35). Ang proseso sa pagkat-on ma-summarize sa mosunod nga paagi:
Tanan kita nagsugod sa sukaranan nga kahibalo. Gidugangan nato kana nga kahibalo pinaagi sa pagkat-on nga naangkon gikan sa klasrom ug sa pagbasa. Gidugangan nato og mga kasinatian sa kinabuhi. Ug dayon miabut kita sa ikaupat nga lakang: kaalam. Diha ra kutob ang kalibutan. Apan kita adunay butang nga wala sa kalibutan. Atol sa pagbunyag ug pagkumpirma, gihatagan kita sa gasa sa Espiritu Santo. Pinasikad sa atong kamatinud-anon sa mga balaod, ordinansa, ug pakigsaad nga atong gihimo atol sa bunyag, sa kanunay nga mga pagpasalig sa sakrament miting, ug sa mga pakigsaad sa priesthood ug sa templo, kanunay kitang makabaton sa gasa sa Espiritu Santo sa pagtudlo ug paggiya kanato. Ang Espiritu naggiya sa atong lihok ug buhaton. Tanan kita dunay espirituhanong mga gasa ug mga talento (tan-awa sa D&P 46).
Ang kaalam dugangan sa espirituhanong mga gasa mohatag og panabut diha sa kasingkasing. “Ang kaalam maoy labaw nga butang; busa batuni ang kaalam: uban sa tanan mo nga pagatinguhaon batuni ang pagsabut” (Mga Proverbio 4:7). Importante ang pag-ugmad og kaalam ug panabut sa inyong kabatan-on.
Ang usa ka kasinatian sa akong kabatan-on nagtudlo kanako mahitungod sa kaalam. Usa ako ka batang nagtubo sa siyudad, mao nga gipatrabaho ko sa akong papa sa ranso sa akong tiyo sa western Utah. Didto, wala gyud ko kasabut nganong ang baka, uban sa liboan ka ektarya nga kapilian, mopasok gyud sa ilang ulo sa barbed wire (gikoral nga mahait nga alambre) aron mosibsib sa sagbut sa pikas nga koral. Nakahunahuna na ba kamo kon unsa kita ka sama niana? Kanunay kitang dalhon sa paglili sa gihimo nga mga limit, ilabi na sa atong kabatan-on. Isip mga tawhanong binuhat—nga kinaiyanhon nga tawo—lagmit mopasok kita sa barbed wire (koral nga mahait nga alambre) ug ipiit ang atong mga ulo niini. Nganong himoon man nato kana?
Makabaton kita og tumang kalipay sa kinabuhi nga walay paglapas sa mga limit. Hinumdumi, “Ang kaalam mao ang labaw nga butang,” ug niana nga kaalam, “Ayaw pagsulod sa alagianan sa dautan, ug ayaw paglakat sa dalan sa mga tawong dautan. Likayi kini, ayaw pag-agi haduol niini, Tumipas ka gikan niini, ug padayon” (Mga Proverbio 4:14–15). Ayaw pagpaduol. Ayaw ipasok ang inyong ulo sa barbed wire nga koral.
Kamo Ba Adunay Maayong mga Higala?
Mamatikdan ninyo nga, subay niini nga mga pagtulun-an sa kaalam, ang basahon sa Mga Proverbio nagtudlo usab mahitungod sa pagpili og maayong mga higala: “Ayaw pagsulod sa alagianan sa dautan, ug ayaw paglakat sa dalan sa mga tawong dautan” (Mga Proverbio 4:14). “Anak ko, ayaw paglakat sa dalan uban kanila; ilikay ang imong mga tiil gikan sa ilang mga alagianan: kay ang ilang mga tiil nanagdalagan ngadto sa kadautan” (Mga Proverbio 1:15–16).
Mga paghulagway pinaagi ni Keith Larson
Unsaon ninyo sa pagkahibalo nga duna kamoy maayong mga higala? Hatagan ko kamo og duha ka timailhan. Kon gamiton ninyo kini nga mga timailhan, dili gayud kamo masubay sa lahi nga agianan ug mawala sa “higpit ug pig-ot nga dalan nga mopadulong sa kinabuhi nga dayon” (2 Nephi 31:18).
-
Ang maayong mga higala dali ra nga makasunod sa mga sugo kon kauban ninyo sila. Ang tinuod nga higala molig-on kaninyo ug motabang kaninyo sa pagsunod sa mga baruganan sa ebanghelyo nga makatabang kaninyo sa paglahutay.
-
Ang tinuod nga higala dili mopapili kaninyo tali sa iyang mga paagi ug sa pamaagi sa Ginoo, aron kamo malayo sa higpit og pig-ot nga dalan. Ang kaaway naglibut niini nga kalibutan ug gusto gayud nga kitang tanan malaglag. Kon gidala kamo sa inyong mga higala sa mga dalan sa kadautan, palayo kanila karon. Pilia sa maalamong paagi ang inyong ikahigala.
Unsang Klase Kamo nga Higala?
Karon mangutana ko og lisud nga pangutana: unsang klase kamo nga higala?
Anaay daghan sa kinabuhi kay sa pagluwas sa atong kaugalingon. Gisangunan kita sa pagbayaw ug paglig-on sa tanang naglibut kanato. Gusto sa Ginoo nga makabalik kitang tanan Kaniya.
Kamo ang parola [lighthouse], ug walay laing mas peligro kay sa nalaglag nga parola. Hinumdumi kon si kinsa kamo: Kamo ang kahayag sa kalibutan, sa inyong mga higala, sa inyong mga kaigsoonan. Kamo ang gihimo nilang sumbanan.
Ang Mga Proverbio 4 nagpadayon:
“Apan ang alagianan sa matarung ingon sa banagbanag sa kahayag, nga makasanag sa kahayag ngadto sa pagkahingpit sa adlaw.
“Ang dalan sa tawong dautan ingon sa kangitngit: sila dili manghibalo kon unsa ang ilang napangdulan” (mga bersikulo 18–19).
Wala gayud sila masayud nganong nagkapangdol-pangdol sila. Wala silay kahayag, walay direksyon.
Nahibalo ba kamo kon unsay mahitabo kon magsalig kamo sa parola kon kini walay suga? Kangitngit ang mahitabo, ug kita mawala.
Kon ang piloto mawad-an sa elektrisidad, wala siyay mga timailhan gawas sa mga butang nga molihok bisan walay elektrisidad. Hingpit siyang walay mahimo kon naa siya sa usa ray masakay (single-seater) nga fighter nga eroplano nga naa sa 40,000 ka pye (12,200 m) ibabaw sa kahanginan nga gilibutan sa mga panganod. Wala na siyay direksyon. Nakasinati na ko og ingon niana, ug nalipay ko nga nia pa ko. Kasinatian kadto nga dili gayud nako hikalimtan. Kamo sab ugma damlag makasugat og ingon niana. Walay laing mas peligro kay sa nalaglag nga parola, ilabi na kon nagsalig kamo niana nga kahayag.
Duna bay nagsalig sa inyong kahayag nga mogiya kaniya? Pagmahimong maayo nga ehemplo. Pagmahimong kahayag sa kalibutan ug pangulohi ug giyahi ang naglibut kaninyo sa mga dalan sa katarung. Nag-agad sila kaninyo isip matinud-anon nga parola. Tua kamo kon sila nagkinahanglan kaninyo.
Ang Espiritu mao ang giya nga kahayag nga magdala og kamaya ug kalipay. Unta dili kita mahikawan sa Espiritu nga makig-uban kanato tungod sa atong kinaiya. Nag-ampo gayud ako nga dili kita mag-inusara ug magsubo niining “mangitngit ug awaaw” nga kalibutan (1 Nephi 8:4).
Unta ang mga panalangin sa Ginoo maanaa kaninyo samtang naningkamot kamo sa pagkat-on ug pag-angkon og kahibalo ug kaalam sa inyong kabatan-on. Unta makaangkon kamo og kaalam ug panabut sa inyong mga kasingkasing sa mga kamatuoran sa ebanghelyo pinaagi sa pagkamasulundon ug usab pinaagi sa kahayag sa Espiritu, ang Espiritu Santo. Pagmahimo nga maayong higala. Ibayaw ug lig-ona ang nagpalibut kaninyo. Himoa nga mas maayong dapit ang kalibutan tungod kay nia kamo dinhi. Tabangi ang inyong mga higala nga magpabilin sa higpit ug pig-ot nga dalan, lahutay hangtud sa katapusan, ug mobalik Kaniya uban sa dungog.
Pagmahimo nga usa ka kahayag sa kalibutan ug pangulohi ug giyahi ang nanaglibut kaninyo sa mga dalan sa katarung. Nag-agad sila kaninyo isip matinud-anon nga parola.