Pagtabang nga ang mga Batan-on Makabaton og Espirituhanong mga Kasinatian

Ni Melissa Merrill

Mga Magasin sa Simbahan

Walay makapugos sa mga batan-on nga makabaton og espirituhanong mga kasinatian, pero kon makadiskobre ang mga ginikanan ug mga lider, adunay daghang mga paagi sa pagpalambo sa mga kasinatian paingon sa pagkakabig.

Sa dihang sila si Vyacheslav ug Zoya Gulko sa Ukraine nagsugod sa pag-investigate sa Simbahan, ang ilang 13 anyos nga anak nga babaye, si Kira, walay kahinam. Dili siya moapil sa mga leksyon sa misyonaryo, ug kon siya masayud nga ang mga elder moanha sa ilang balay, iyang “ipakita nga isirado ang pultahan sa iyang kwarto,” nahinumdom ang iyang inahan.

Sila si Brother ug Sister Gulko, mihukom nga magpamiyembro sa Simbahan, naghunahuna nga kon sila makahatag og oportunidad ni Kira nga mobati sa Espiritu, ang iyang kasingkasing matandog. Tungod ang pagpamatuod ni Sister Gulko nagsugod sa dihang siya mitambong sa bunyag sa laing tawo, iyang gihangyo si Kira nga motambong sa iyang bunyag—para lang sa pagtabang kaniya nga mag-ilis og sinina human sa bunyag. Sa katingala ni Sister Gulko, misugot si Kira.

“Nahitabo gayud!” Si Sister Gulko mihinumdom. “Ang Langitnong Amahan mobuhat sa milagroso kaayo nga paagi.” Nabati ni Kira ang Espiritu, ug human sa usa ka semana human nabunyagan ang iyang mga ginikanan, siya miuyon nga makigkita sa mga misyonaryo. Nagsugod siya sa pagbasa sa Basahon ni Mormon. Mga pipila ka semana ang milabay, si Sister Gulko nakabantay og piraso sa papel nga nagbitay ibabaw sa lamesa ni Kira; nakasulat niini mao ang mga pulong sa 2 Nephi 2:25. Duha ug tunga ka bulan ang milabay human sa ilang bunyag, ang mga Gulko mitambong sa bunyag sa ilang anak nga babaye. Karon, 20 na ka tuig ang milabay, si Kira naminyo. Siya ug ang iyang bana, si Dave na-sealed sa templo ug nag-amuma sa ilang duha ka anak nga lalaki diha sa ebanghelyo. Siya matinud-anong nagserbisyo sa daghang mga calling ug nagpabiling aktibo sa Simbahan.

Pinaagi niadto nga kasintian, si Zoya miingon nga siya nakakat-on og mahinungdanon kaayo nga leksyon nga magamit sa mga ginikanan kinsa dugay nang mga miyembro sa Simbahan ug sama kaniya ug sa iyang bana nga bag-ong mga miyembro: ang mga ginikanan ug mga lider dili makapugos sa ilang mga anak sa ebanghelyo, apan sila mahimong modapit kanila sa mga lugar ug momugna og mga kasinatian diin ang mga batan-on mismo makabaton og espirituhanong mga kasinatian. Kadto nga mga kasinatian modangat ngadto sa pagkakabig.

Apan unsa ang labing maayo nga paagi sa pagmugma niining matang nga mga kasinatian? Ang mga ginikanan ug mga lider sa tibuok kalibutan mipakigbahin unsa ang epektibo ngadto kanila.

Paghatag sa mga Batan-on og mga Oportunidad sa Pagserbisyo

Ang Granja Viana Ward sa São Paulo Brazil Cotia Stake adunay daghang aktibo nga mga batan-ong lalaki. Apan ang ilang mga lider nakabantay nga pipila kanila nag-atubang og personal nga mga hagit ug naglisud sa pagtuman sa ilang mga buluhaton sa priesthood.

Human ang bishopric ug ang mga lider sa Young Men nagtinambagay sa usag usa, sila mihukom nga mas i-focus nila ang ilang mga kalihokan sa pagserbisyo ug dili kaayo sa paglingaw-lingaw. Kini naglakip sa pagbisita sa dili kaayo aktibo nga mga miyembro sa korum, pag-apil sa pag-proselyte uban sa full-time nga mga misyonaryo, ug pagpangalagad sa sakrament ngadto sa mga miyembro nga dili gayud makahimo sa pagtambong. Kini nga mga kalihokan mihatag sa mga batan-ong lalaki og oportunidad sa pagbuhat sa mga baruganan nga ilang nakat-unan sa seminary ug ma-Dominggo (tan-awa sa 2 Nephi 2:26).

Sa kadugayan, “kining espirituhanong mga kalainan nakahimo sa tanang kalainan,” mireport ang usa ka lider sa priesthood.

“Kami natingala sa dihang usa ka partikular nga Dominggo sa pagpuasa, ang tanan namong mga batan-ong lalaki nagpamatuod,” siya miingon. “Sa dihang ila kining gibuhat, daghan kanila ang naghilak nga nahinumdom sa maayong diwa nga ilang nabati niadtong higayona. Usa ka batan-ong lalaki mipakigbahin sa kasinatian sa pagpangalagad sa sakrament ngadto sa usa ka tigulang nga miyembro sa among ward, kinsa naglubog na sa higdaanan sulod sa tulo ka tuig. Ang iyang asawa, matinud-anon nga sister, midawat sa atong mga batan-ong lalaki nga may kalipay ug paglaum. Human sa ordinansa, siya mipakigbahin kanila sa kalipay nga iyang nabati sa iyang kinabuhi tungod sa ebanghelyo bisan pa sa dagkong mga problema ug hagit nga iyang giatubang. Ilang nabati ang Espiritu ug nakaamgo sa kalainan nga nahimo sa ebanghelyo sa kinabuhi sa mga tawo. Kini nga kasinatian gamhanan kaayo nga kini ilang hinumduman sa mga tuig nga moabut—tingali sa ilang tibuok kinabuhi.”

Iyang gipasabut pag-ayo nga wala siya makakita og ingon ana nga matang sa tubag bisan asa nga “dula sa football o makalingaw nga Mutual night.” Apan, siya miingon, ang kasinatian mitudlo kaniya sa kaimportante sa pagpasiugda sa matang sa mga kasinatian diin ang mga batan-on makabati sa Espiritu.

“Ang sosyal nga mga kalihokan importante,” siya nagpadayon. “Apan ang espiritwal nga mga kasinatian mahinungdanon kaayo sa pagtabang sa mga batan-on sa pagpalambo sa ilang kaugalingong pagpamatuod.”

Matag Dominggo sa Rennes Ward, Angers France Stake, si Sister Delphine Letort, isip presidente sa Young Women, naghatag og kard sa kada batan-ong babaye nga misimba ug mihangyo kaniya sa pagpili og kaedad kinsa wala mosimba ug magsulat para kaniya. Ang batan-ong mga babaye mosulat sa leksyon niana nga semana—unsa ang ilang nakat-unan o unsa ang nakapadasig kanila—ingon man sa pagkamahigalaon, personal nga mubong sulat. Dayon si Sister Letort o usa sa iyang magtatambag mopadala sa mga kard niadtong wala makasimba.

Ang kalihokan yano apan epektibo, siya miingon, dili lang niadtong wala mosimba aron masayud nga sila gihinumduman apan niadto usab nga nagsulat nga sila mas manggihunahunaon sa usag usa.

“Pinaagi sa gagmay nga mga butang talagsaong mga milagro mahitabo,” miingon siya (tan-awa sa Alma 37:6). “Atong nakita nga kini nahitabo. Ang batan-ong mga babaye giawhag, ug kini nga kasinatian nakadugang sa pagpalambo sa ilang mga pagpamatuod.”

Paghimong Makahuluganon ang Pulong sa Dios ngadto sa mga Batan-on

Si Alma mitudlo nga ang pagsangyaw sa pulong sa Dios adunay gamhanan nga epekto (tan-awa sa Alma 31:5). Si David Elmer, usa ka lider sa Young Men sa Texas, USA, nasayud niini ug gusto niya nga makasinati niini ang batan-ong mga lalaki siya nagpasiugda og high-adventure Scouting trip nga may makahuluganong kasinatian nga makatabang kanila sa pagpangandam sa umaabut.

Si Brother Elmer mainampoong mikonsiderar unsa ang iyang ipakigbahin ug mibati nga gigiyahan ngadto sa pakigpulong ni Elder Neil L. Andersen sa Korum sa Napulog Duha ka mga Apostoles. Sa biyahe, si Brother Elmer mitudlo niini nga mensahe, lakip sa gipakigbahin ni Elder Andersen nga istorya ni Sidney Going, usa ka rugby star sa New Zealand kinsa mihunong una sa iyang sports career aron magserbisyo og misyon. “Ang inyong misyon mahimong usa ka sagrado nga oportunidad sa pagdala sa uban ngadto ni Kristo ug sa pagtabang sa pag-andam alang sa Ikaduhang Pag-anhi sa Manluluwas,” miingon si Elder Andersen.¹

Ang kasinatian hilabihan ka gamhanan, miingon si Brother Elmer, tungod kay nagtudlo siya gikan sa mga pulong sa buhi nga propeta. Sa katapusan sa debosyonal, tanang mga batan-ong lalaki ug mga lider mipirma sa bola sa rugby isip saad nga magserbisyo og misyon ug isip mahikap nga pahinumdom sa ilang nakat-unan ug nabati. Daghang mga amahan ug lider nagpabilin nianang gabhiuna nakig-istorya sa mga batan-ong lalaki kon sa unsang paagi ang misyon nakaapekto sa ilang kinabuhi.

“Ang amoa usa ka personal nga Dios; Siya nakaila sa Iyang mga batan-on,” miingon si Brother Elmer. “Siya nakahibalo sa ilang mga kinabuhi ug hagit ug unsa ang nahitabo niining mga bataa. Wala lang ta masayud kon giunsa Niya pagdasig ang ilang mga kinabuhi. Busa kami isip mga lider nag-andam ug naghatag og kahimtang alang kanila nga mabati ang Espiritu. Inyo kanang mabuhat pinaagi sa mga kasulatan ug sa pulong sa mga propeta, apan ang Ginoo, dili kita, ang nagdasig sa ilang kasingkasing.”

Pagmakanunayon

Si Brother Elmer miingon nga gusto niya nga ang batan-ong mga lalaki aduna pay laing mahinumduman kabahin sa biyahe: ang ilang pagtuon sa ebanghelyo kinahanglang makanunayon.

“Mibati ko nga kabahin sa akong responsibilidad, ako mohatag kanila og mga kasinatian aron mabati ang Espiritu, ug kon gusto ko nga mahitabo kini, kinahanglan nga buhaton nako ang akong bahin sa pagplano niini,” siya miingon. “Si Elder David A. Bednar mitudlo sa pagmugna og mga espirituhanong sumbanan sa atong kinabuhi, sumbanan sama sa pagtuon sa kasulatan ug pag-ampo ug family home evening.² Sa tibuok semana, kanunay namong gibuhat ang among mga espirituhanong sumbanan. Kami nag-ampo isip grupo. Among gi-assign ang batan-ong mga lalaki sa pagpakigbahin og 10 ka minutos nga debosyonal sa buntag, ug ang ilang mga lider ug amahan mangandam og debosyonal sa gabii.

“Ang punto kay bisan tuod kami layo sa panimalay ug ang among mga kalihokan lahi kaysa sagad, ang among espirituhanong sumbanan dili maputol. Ang batan-ong mga lalaki mahimong makahinumdom o makalimot og partikular nga mga leksyon, apan nanghinaut ko nga sila makahinumdom sa sumbanan nga among gipadayon sa paghimo og mga debosyonal ug pag-ampo ug pagtuon sa kasulatan.”

Si Myra Bocobo Garcia sa Pilipinas nasayud usab sa bili sa pagkamakanunayon, ug siya nasayud nga ang pagtudlo niini magsugod sa balay. Si Sister Garcia ug ang iyang bana, si Edwin, adunay tulo ka anak nga lalaki ug unom ka anak nga babaye nga nag-edad og 8 hangtud 22 anyos, ang kada usa nalakip sa lain-laing mga maayong kalihokan. Samtang nagpasabut kana nga daghang mga tawo naghimo og lain-laing mga buluhaton, ang pamilya nagkugi nga kanunayng magdungan og panihapon.

“Ang pagluto ug malipayong pag-andam og pagkaon ug dungan nga pagpangaon mao ang usa sa labing maayong paagi nga among mapundok ang among mga anak,” miingon si Sister Garcia. Iyang gihatagan og gibug-aton nga ang tingkaon mao ang panahon sa pagbag-o [refresh], pag-istoryahanay sa usag usa, ug pag-ila sa mga panalangin sa Ginoo.

Pagpahimulos sa mga Oportunidad sa Pagtudlo ug Pagpaminaw

Si Jocelyn Fielden sa Nova Scotia, Canada, miingon nga kasagaran sa labing mahinungdanon nga mga leksyon nga iyang nakat-unan gikan sa pag-amuma sa unom ka anak, nga karon nag-edad og 20 ngadto sa 30, may kalabutan lang sa direktang pagtudlo ug sa “pagmugna og palibut diin ang mga bata mismo makakat-on sa kamatuoran nga sila lang.”

“Ayaw pagdali-dali nga ikaw ang mopili para kanila o motubag sa tanan nilang mga pangutana,” miingon siya. Hinoon, siya mirekomendar nga i-direkta ang mga bata “sa kasulatan o sa tambag gikan sa atong propeta alang sa giya ug mga tubag.” Siya midugang, “ug pag-andam sa paghisgut sa ilang mga nahibaloan.” Dugang pa, kon siya pangutan-on sa iyang mga anak, usahay tubagon niya sila pinaagi sa paghatag og laing pangutana: “Sa inyong hunahuna unsay angay ninyong buhaton?”

“Pagmasaligon nga sila mohimo og eksakto nga mga pagpili,” siya miingon. “Kon atong tabangan ang atong mga anak nga makat-on nga maila ang Espiritu sa ilang kinabuhi atol sa daghang mga oportunidad sa pagtudlo matag adlaw uban kanila ug kon ilang maila unsa ang pagbati kon anaa ang Espiritu, kini mahinungdanon alang kanila sa pagtinguha og mas espirituhanon nga mga kasinatian, mao na ang naglig-on sa ilang mga pagpamatuod sa reyalidad sa Langitnong Amahan ug Iyang Anak, si Jesukristo. Kini adunay makapatakod nga epekto: kon mas mabati nila ang kahayag ug kahupayan nga mahatag sa Espiritu, mas tinguhaon nila kini ug maningkamot sa pagbuhat sa mga butang nga makapaduol pag-ayo sa Espiritu sa ilang kinabuhi.”

Siya daling makaila nga ang mga baruganan nga nahimong epektibo sa ilang pamilya alang kaniya mao ang gibalik-balik og gitudlo sa mga lider sa Simbahan. Sama pananglit, siya moingon nga ang pipila sa mga pagtudlo mahitabo atol sa pormal nga mga diskusyon sama sa mahitabo atol sa family home evening, pagtuon sa kasulatan sa pamilya, ug pag-ampo sa pamilya, ang mga ginikanan magiyahan sa Espiritu nga magmatngon sa mga higayon sa pagtudlo.³

“Maglakaw-lakaw, magdrayb padulong sa mga kalihokan, mag-shoot shoot og bola [magdula og basketball], mangaon kauban ang pamilya, magdungan og trabaho, manganta, ug magserbisyo sa uban mao ang pipila ka mga kalihokan diin ang pagtudlo sa ebanghelyo mahitabo sa atong pamilya,” miingon siya. “Ang paghisgut kabahin sa mga hilisgutan sa ebanghelyo sa kanunay natural nga mahitabo kon kita maanaa sa ubang mga kalihokan.”

Pagtinabangay alang sa Komon nga Tumong

Sa wala madugay human og gradwar sa Brigham Young University–Hawaii, si KaYan Danise Mok miuli sa Hong Kong ug nakadawat og calling isip presidente sa Young Women. Samtang nag-adjust siya nga anaa ra sa panimalay, pagsugod og trabaho [career], ug padayon sa graduating studies, siya matinuorong nag-ampo alang sa inspirasyon sa pagtabang sa batan-ong mga babaye uban sa pagpalambo sa mga pagpamatuod sa pag-andam kanila sa umaabut.

Usa ka Dominggo samtang siya nagtudlo kabahin sa mahangturong panglantaw, si Sister Mok nadasig sa pagbasa sa Basahon ni Mormon ngadto sa partikular nga batan-ong babaye, kinsa nag-inusara nianang adlaw sa simbahan.

“Ang akong magtatambag ug ako nadasig usab dayon pinaagi sa paghimo og mga tumong sa pagkompleto sa Basahon ni Mormon isip usa ka team kauban ang batan-ong mga babaye,” miingon si Sister Mok. “Iyang gidawat ang hagit sa walay pagduha-duha tungod kay dungan namong kompletohon ang tumong.”

Sukad niadtong higayona, si Sister Mok, iyang magtatambag, ug kining batan-ong babaye naghimo og “buddy system” sa Facebook ug sa pag-text aron sa paghinumdom sa usag usa sa pagbasa ug sa pagpakigbahin sa usag usa sa ilang nakat-unan.

Si Sister Mok miingon nga siya nakakita og talagsaong kausaban sa kinabuhi niining batan-ong babaye gumikan sa iyang pagtuon sa kasulatan. Ug samtang si Sister Mok nagbasa sa mga kasulatan samtang magsakay sa tren kada adlaw, siya mismo nakakaplag og mga panalangin. “Nabati usab nako ang Espiritu ug nakadawat og mga tubag sa akong pag-ampo samtang nagpadayon ko sa kinabuhi,” miingon siya.

“Sa akong kasinatian, pipila sa mga batan-on nabalaka ug mibati nga dili sigurado kon sila makadawat ba og pagpamatuod ug espiritwal nga mga kasinatian sama sa uban,” nagpadayon siya. “Pinaagi sa pagtinabangay, among gisigurado kanila pinaagi sa among mga aksyon nga kini epektibo ug anaa kami sa pagsuporta kanila sa tanang bahin.”