Mga Ideya sa Family Home Evening

Kini nga isyu naglangkob og mga artikulo ug mga kalihokan nga mahimong magamit alang sa family home evening. Ang mosunod mao ang pipila ka mga ehemplo.

“Madaginuton nga Pagpuyo Makaandam Kanato sa Umaabut,” pahina 12: Basaha ang unom ka bahin nga gihisgutan sa artikulo diin kita mahimong mapaningkamuton sa kaugalingon. Unsa ang pipila ka mga emerhensya o mga problema nga mahimong malikayan pinaagi sa pagpalambo sa pagpaningkamot sa kaugalingon niini nga mga bahin? Dapita ang mga sakop sa pamilya nga mainampoong maghunahuna kon hain sa mga bahin ang kinahanglan nilang palamboon ug maghimo og mga tumong sa pagpalambo sa ilang pagpaningkamot sa kaugalingon niadto nga mga bahin.

“Kaputli sa Mahugaw nga Kalibutan,” pahina 42: Hisguti uban sa mga sakop sa pamilya ang mga pangutana diha sa artikulo. Ikonsiderar ang pagpakigbahin sa mga baruganan ug mga kasinatian nga nakapalig-on sa inyong pagpamatuod kabahin sa kaputli. Hisguti ang mga paagi sa paggamit sa tambag gikan sa artikulo.

“Pagmaalamon ug Pagmahimong usa ka Higala,” pahina 48: Sugdi pinaagi sa pagbasa sa timailhan ni Elder Hales alang sa pagtino og maayong mga higala. Ikonsiderar ang paghisgut sa kaimportante sa pagkamaayong higala. Dapita ang matag sakop sa pamilya sa paghunahuna og tulo ka mga paagi nga siya mahimong mas maayong higala.

“Dear Amiga,” pahina 60, ug “Pagsugat sa Bag-ong Panahon sa Kinabuhi,” pahina 61: Basaha ang mahitungod niining mga bata sa Primary ug kon giunsa nila pagpangandam sa pagsulod sa Young Women ug Young Men. Isip usa ka pamilya, ikonsiderar ang paghisgut unsa ang gihimo niini nga mga bata aron sa pagpangandam. Dapita ang mga sakop sa pamilya sa pagbasa sa mga booklet sa Personal nga Kauswagan o Katungdanan ngadto sa Dios ug pangita og pipila ka mga kalihokan nga ganahan nilang kompletohon sa umaabut.

Usa ka Family Home Evening, Duha ka mga Leksyon

Usa ka gabii ang akong mga ginikanan ug ginikanan sa akong inahan mibisita alang sa family home evening. Matag usa sa tulo nako ka mga anak ganahan nga moapil, ug niining gabhiona ang akong siete anyos nga anak nga lalaki ang mohatag sa leksyon. Nag-andam kami og gamayng display, nagbutang og mga hulagway kabahin sa Paglalang, ug nagtuon ug nagribyu unsa ang iyang itudlo. Ang akong anak nga lalaki andam na ug naghinam-hinam.

Atol sa leksyon, kaming tanan naminaw og maayo sa unsay gipasabut sa akong anak nga lalaki. Sa dihang nahuman na siya, si Samuel, nga mag-tres anyos, nakahukom nga mohatag usab siya og leksyon. Busa gikuha niya ang mga hulagway ug gipahimutang kini og balik sa lamesa.

Sa iyang hinay nga tingog ug usahay sa dili kaayo niya malitok nga mga pulong, si Samuel mihatag kanamo og usa ka leksyon sa family home evening. Ug bisan tuod wala siya mangandam, siya naminaw. Mipasabut siya kanamo giunsa paglalang ang yuta ug misulti kanamo sa gugma ni Jesukristo alang sa matag usa kanamo.

Nahingangha kami nga makita kon unsa ka sayon niya gitudlo ang leksyon—nagsunod gayud sa gihimo sa iyang igsoon. Ang akong mga ginikanan ug mga apohan nasurprisa ug nalipay. Mabati namong tanan ang gugma niining gagmayng mga bata alang sa ebanghelyo—ug ang gugma ni Jesukristo alang kanila.

Lizbeth Sánchez Fajardo, Mexico