Fesoasoani i le Autalavou ia Maua ni Aafiaga Faaleagaga

Saunia e Melissa Merrill

Mekasini a le Ekalesia

E leai se tasi e mafai ona faamalosia le autalavou ina ia maua ni aafiaga faaleagaga, peitai ua iloa e nei matua ma taitai, e tele mau auala e tausia ai ni aafiaga lea e mafai ona taitaiina atu ai i le liua.

Ina ua amata ona sailiili ia Vyacheslav ma Zoya Gulko o Iukureini i le Ekalesia, e lei fiafia le la tama teine e 13 tausaga o, Kira. Sa musu o ia e auai i lesona a faifeautalai, ma pe a ia iloa o loo o atu ia faifeautalai i lo latou fale, na te “tapunia lelei le faitotoa o lona potu,” na manatua ai e lona tina.

Na masalosalo ia Brother ma Sister Gulko, o e na filifili e auai i le Ekalesia, afai e mafai ona la tuuina atu se avanoa ia Kira ia lagona ai le Agaga, atonu o le a ootia lona loto. Aua na amatalia foi le molimau a Sister Gulko ina ua ia auai i le papatisoga o se isi tagata, sa ia fai atu ia Kira e sau i lona papatisoga—ina ia fesoasoani ia te ia e sui i ona ofu magao pe a uma. Sa te’i Sister Gulko, aua sa ioe Kira.

“Na tupu!” Na manatua e Sister Gulko. “Sa galue le Tama Faalelagi i se auala faavavega.” Na lagona moni lava e Kira le Agaga, ma i se vaiaso ina ua uma le papatisoga a ona matua, sa malie o ia e feiloai i faifeautalai. Sa amata ona ia faitaua le Tusi a Mamona. O nai vaiaso mulimuli ane, sa iloa ai e Sister Gulko se fasi pepa o tautau mai luga o le kesi a Kira; sa tusia ai ni upu mai le 2 Nifae 2:25. O le lua ma le afa masina talu ona mavae lo laua lava papatisoga, sa auai ai loa le au Gukos i le papatisoga a le la tama teine. O le taimi nei, ua 20 tausaga ua mavae, ua faaipoipo ia Kira. Ua uma ona faamauina i laua ma lona toalua o Dave i le malumalu, ma o loo la tausia le la fanau tama e toalua i le talalelei. Sa ia galue ma le faamaoni i ni tofiga ma o loo toaga i le Ekalesia.

O lena aafiaga, fai mai Zoya ua ia aoaoina se lesona taua e faatatau i matua ua leva ona avea ma tagata o le Ekalesia mai o latou olaga atoa ma e faapea foi mo ia ma lona toalua o ni tagata fou o le ekalesia: e le mafai e matua ma taitai ona faamalosia a latou fanau i le talalelei, peitai e mafai ona latou valaauliaina i latou i nofoaga ma amatalia ni aafiaga lea e mafai ai e le autalavou ona maua ni aafiaga faaleagaga mo i latou lava. E mafai e na aafiaga ona oo atu ai ina liua.

Peitai o fea tonu lava le auala sili e amatalia ai nei ituaiga aafiaga? Ua faasoa mai e matua ma taitai mai le salafa o le lalolagi mea na aoga mo i latou.

Avatu i le Autalavou ia ni Avanoa e Auauna Atu Ai

O le Uarota a Granja Viana o le Siteki a São Paulo Pasila Cotia e maualuga lava le tulaga o gaoioiga a alii talavou. Peitai na iloa e o latou taitai o nisi o i latou o loo feagai ma ni luitau patino ma o loo i ai ni faafitauli i le faataunuuina o o latou tiute faaleperisitua.

Ina ua mavae ni fonotaga tuufaatasi a le au epikopo ma taitai o Alii Talavou, sa latou fuafua loa e taulai atili atu a latou gaoioiga i auaunaga ae faaitiitia ia mea faafiafia po o mea e talie ai. Na aofia ai i i le asia o tagata o le korama ua le o toe toaaga mai, auai i talaiga faatasi ma faifeautalai faamisiona, ma le tufatufaina atu o le faamanatuga i tagata o le uarota o loo faataotolia i totonu o aiga. O nei gaoioiga na tuuina atu ai se avanoa i alii talavou e galulue ai i ni mataupu faavae sa latou aoaoina i le seminare ma Aso Sa (tagai i le 2 Nifae 2:26).

I le aluga o taimi, “sa faia e nei gaoioiga faaleagaga se eseesega tele,” o le lipoti mai lea a se tasi o taitai perisitua.

“Sa matou tetei i se Aso Sa anapogi faapitoa, na molimau uma ai lava a matou alii talavou,” o lana tala lea. “Ma latou faia, o le toatele o i latou na toe manatuaina ma loimata le agaga lelei sa latou lagonaina i lena taimi. Sa faasoa mai e se tasi alii talavou se lagona ina ua avatu le faamanatuga i se tagata matua o le uarota o lē ua tolu tausaga o faataotolia i le moega. O lona toalua, o se tamaitai faamaoni, sa taliaina o matou alii talavou i le fiafia ma le faamoemoe. Ina ua uma le sauniga, sa ia faasoaina atu ia i latou le lagona fiafia sa ia maua i lona olaga ona o le talalelei e ui i faafitauli ma luitau tetele sa feagai ma ia. Sa latou faalogoina le Agaga ma iloa ai le eseesega e faia e le talalelei i olaga o tagata. Sa matuai malosi lava lenei aafiaga o le a latou manatuaina pea mo nisi tausaga a sau—pe atonu o o latou olaga atoa.”

Sa ia iloa e na te lei vaaia muamua lava i sea ituaiga tali mai mai soo se “taaloga lakapi po o po malie o le Mutuale.” Nai lo lena, sa ia fai mai, sa aoaoina o ia e lenei aafiaga i le taua o le uunaia o ituaiga aafiaga ia e mafai ai e le autalavou ona lagonaina le Agaga.

“E taua ia gaoioiga faamasani,” sa ia faaauau mai ai. “Peitai o aafiaga faaleagaga e taua tele e fesoasoani ai i le autalavou e atiina ae ai a latou lava molimau.”

O Aso Sa taitasi i le Uarota a Rennes, Siteki a Angers France, e saunia ai e Sister Delphine Letort, o le peresitene o Tamaitai Talavou, se kata mo tamaitai talavou taitasi o loo auai ma fai atu ia te ia e filifili se uo e le o auai i le lotu e tusi i ai. Sa tusia e tamaitai talavou e uiga i le lesona o lena vaiaso—mea sa latou aoaoina po o mea sa musuiaina i latou—faapea foi ma se tamai tusi faamasani ma patino. Ona auina atu lea e Sister Letort po o se tasi o ona fesoasoani o kata i le meli ia i latou e lei auai mai i le lotu.

Sa faigofie le gaoioiga ae sa aoga, o lana tala lea, e le gata sa avea ma se auala mo i latou e lei auai mai ina ia latou iloa ai sa manatuaina i latou ae o se auala foi mo i latou sa tusia ia tusi ina ia mafaufau atili le tasi i le isi.

“O mea laiti ma faatauvaa e faataunuu ai mea tetele,” o lana tala lea (tagai i le Alema 37:6). “Ua tatou vaai i ai o faaalia mai. Sa faamalosiauina ia tamaitai talavou, ma o lenei aafiaga sa saofaga atu i le faateleina o a latou molimau.”

Faafesootai le Autalavou ma le Afioga a le Atua

Sa aoao atu Alema faapea sa i ai i le talai atu o le afioga a le Atua se uiga malosi (tagai i le Alema 31:5). Sa iloa e David Elmer, o se taitai o Alii Talavou mai Texas, ISA, lenei mea ma sa manao e tuu atu i alii talavou sa ia taitaiina i se malaga faa-Sikauti e tumu i gaoioiga se aafiaga aoga e mafai ona fesoasoani e saunia i latou mo le lumanai.

Sa mafaufau ma le agaga tatalo ia Brother Elmer po o a mea e mafai ona ia faasoa atu ma lagonaina e faatatau i se lauga a Elder Neil L. Andersen o le Korama a Aposetolo e Toasefululua. I le malaga, sa aoao atu Brother Elmer mai lena savali, e aofia ai le tala na faamatala e Elder Andersen ia Sidney Going, o se tama taalo iloga o le lakapi a Niu Sila lea sa tuu lana matata o le taaloga ae auauna atu i se misiona. “O a outou misiona o le a avea ma se avanoa paia e aumai ai isi ia Keriso ma fesoasoani ai e saunia mo le Afio Mai Faalua o le Faaola,” o le saunoaga lea a Elder Andersen.¹

Sa mamana lenei aafiaga, o le tala lea a Brother Elmer, aua sa ia aoao mai upu a se perofeta soifua. I le faaiuga o le faigalotu, sa tofu saini uma igoa o alii talavou ma taitai i polo lakapi e avea ma se folafolaga e auauna atu faafaifeautalai faamisiona ma sa avea foi ma se faamanatu mautu i mea na latou aoaoina ma lagonaina. O le toatele o tama ma taitai e lei momoe i lena po sa latou talatalanoa ma alii talavou e uiga i auala na aafia ai o latou olaga i a latou misiona.

“O lo tatou Atua e patino; Na te silafia Lana autalavou,” o le tala lea a Brother Elmer. “Na te silafia o tatou olaga ma luitau ma mea o loo tutupu i nei tamaiti. E te leiloaina lava pe o faapefea ona Ia galue i o latou olaga. O lea, o i tatou o taitai o loo saunia ma tuuina atu se siosiomaga mo i latou e lagona ai le Agaga. E mafai ona outou faia lena mea e ala atu i tusitusiga paia ma e ala atu i upu a perofeta, ae o le Alii, e le o i tatou, o loo galue i totonu o o latou loto.”

Ia Faifai Pea

Fai mai Brother Elver e manao o ia ia manatua e alii talavou se isi foi mea e uiga i le malaga: ia faifai pea a latou suesuega faaletalalelei.

“Sa ou lagona o lena vaega o lou tiutetauave o le tuuina atu lea ia i latou o ni aafiaga e lagona ai le Agaga, ma afai ou te manao ia tupu, e tatau ona faia lau vaega e fuafua i ai,” na ia fai mai ai. Elder David A. Sa aoao mai Bednar e uiga i le fatuina o ni mamanu faaleagaga i o tatou olaga, mamanu e pei o le suesue i tusitusiga paia ma le tatalo ma afiafi faaleaiga.² Ma ao matou o ese i lena vaiaso, sa faatumauina a matou mamanu faaleagaga. Sa faia a matou tatalo o se vaega. Sa matou tofia ni alii talavou e faia faigalotu e 10 minute i le taeao, ae saunia e o latou taitai ma tamā ia faigalotu mo le afiafi.

“O le manatu sa i ai e ui lava sa matou o ese mai o matou aiga ma sa ese le matou gaoioiga mai isi gaoioiga masani, ae sa lei motusia lava a matou mamanu faaleagaga. Atonu o loo manatua pe e le o manatua foi e alii talavou ni lesona faapitoa, peitai ou te faamoemoe o le a latou manatuaina le mamanu sa matou faatumauina i le faia o faigalotu ma tatalo ma suesuega o tusitusiga paia.”

E iloa foi e Myra Bocobo Garcia mai Filipaina le taua o le faifai pea, ma na te iloa o le aoao atu e amata i le aiga. O Sister Garcia ma lona toalua o, Edwin, e toatolu le la fanau tama ae toaono ia teine e amata mai le 8 e oo i le 22 tausaga, ma e faaaofia uma lava i latou taitasi i gaoioiga lelei eseese. E ui o le uiga o lena mea e tofu lava le tagata ma lona auala e ui ai, ae o loo galulue malosi lava le aiga ina ia aai faatasi pea i le aiga o le afiafi.

“O le kukaina ma saunia fiafia ma aai faatasi o se tasi lea o auala sili ma te faapotopotoina ai le ma fanau,” o le tala lea a Sister Garcia. Na te iloa o le taimi o meaai o se taimi lea e toe faafou ai, fesootai ai le tasi i le isi, ma faafetai atu ai i faamanuiaga a le Alii.

Soso Atu i Avanoa o I Ai ina ia Aoao Atu ma Faalogo

O Jocelyn Fielden mai Nova Scotia, Kanata, na fai mai o lesona sili ona taua sa ia aoaoina mai le tausiaina o se fanau e toaono, lea e faasolo mai le 20 e oo i le 30 tausaga, na mafua mai ona sa le gata ina aoao sao atu ae sa “fausiaina (foi) se siosiomaga lea e mafai ai e le fanau ona latou aoaoina i latou lava e uiga i upumoni.”

“Aua e te vave faia ni a latou filifiliga pe tali uma foi a latou fesili,” o lana tali mai lea. Nai lo lena, sa ia fautua mai le taialaina o le fanau “i tusitusiga paia po o fautuaga mai o tatou perofeta mo le taitaiga ma tali.” Sa ia faaopoopo mai, “Ma ia sauni e talanoa i mea sa latou mauaina.” O se faaopoopoga, pe a ia maua ni fesili mai lana fanau, e na te taliina i nisi taimi e ala i le fesili atu o sana lava fesili: “O le a se mea e te manatu e tatau ona e faia?”

“Ia maua le faatuatuaga o le a latou faia ni filifiliga sao,” o lana tali lea. “Afai tatou te fesoasoani ia tatou fanau ina ia aoao ia iloa le Agaga i o latou olaga i le aluga o le tele o aoaoga faapitoa lea tatou te faia ma i latou i aso uma, ma pe a latou iloa pe faapei le lagona o le Agaga, o le a avea lea ma se auala latou te saili ai mo nisi aafiaga faaleagaga, ma o le a faamalolosia ai a latou molimau e uiga i le tulaga moni o lo tatou Tama Faalelagi ma Lona Alo o, Iesu Keriso. O le a tulai mai ai se taunuuga galugalu: o le faatele ona latou lagonaina o le malamalama ma le mafanafana o loo aumaia e le Agaga, o le faatele foi lea ona latou moomoo ma tauivi ina ia faia ni mea o le a atili faateleina ai le Agaga i o latou olaga.”

E vave lona faasino maia faapea o mataupu faavae sa aoga i le olaga faaleaiga mo ia o mea na o loo aoao soo atu e taitai o le Ekalesia. Mo se faataitaiga, fai mai a ia e ui o nisi o aoaoga e mafai ona tupu i le taimi o talatalanoaga aloaia e pei o mea ia o loo tutupu i afiafi faaleaiga, suesuega o tusitusiga paia faaleaiga, ma le tatalo faaleaiga, o le a mafai e matua ona taialaina le Agaga ina ia vaavaai mo ni taimi faapitoa e aoao atu ai.³

“O le o e savalivali, aveina o se taavale i gaoioiga, togiina o nai mama [taaalo pasiketipolo], faia o ni ‘aiga faaleaiga, galulue faatasi, pepese, ma feauaunaai le tasi i le isi, o nisi nei o nai gaoioiga lea o loo aoaoina atu ai le talalelei i totonu o o tatou aiga,” sa ia fai mai ai. “O le talatalanoa e uiga i mataupu o le talalelei e tele lava ina tupu i se auala masani pe a tatou taulai atu i isi gaoioiga.”

Galulue Faatasi agai atu i se Sini Laugatasia

I se taimi puupuu lava ina ua uma ona faauu mai le Iunivesite o Polika Iaga–Hawaii, sa toe foi ai KaYan Danise Mok i lona aiga i Hong Kong ma maua ai se valaauga e avea ma peresitene o Tamaitai Talavou. Ao tatou toe faamasani i le i ai i le aiga, amatalia o se matata faigaluega, ma faaauau ai pea ia isi aoaoga, sa ia tatalo ai ma le naunautai mo se uunaiga e fesoasoani ai i tamaitai talavou o loo latou galulue faatasi ina ia atiina ae ni molimau e saunia ai i latou mo le lumanai.

I se tasi Aso Sa ao ia aoao atu e uiga i se vaaiga faavavau, sa musuia ai Sister Mok e faitau le Tusi a Mamona ma se tamaitai talavou faapitoa, lea sa na o ia lava sa i ai i le lotu i lena aso.

“Sa vave ona matou tali atu ma ou fesoasoani e ala i le faatutuina o ni sini e faamaea ai le Tusi a Mamona faatasi o se au ma le tamaitai talavou,” o le tala lea a Sister Mok. “Sa ia taliaina le lui e aunoa ma se faatali talu ai ona o le a matou tauva uma faatasi i le sini.”

Talu mai lena taimi, sa faatuina e Sister Mok, ona fesoasoani, ma lenei tamaitai se “polokalama faauo” i luga o le Facebook ma e auala atu i feau feaveai i telefoni e faamanatu ai i le tasi le faitauina ma le fefaasoaai ma isi o mea sa latou aoaoina.

Fai mai Sister Mok sa ia vaaia se faamaoniga o le suiga ofoofogia i le olaga o lenei tamaitai talavou e mafua mai ana suesuega i tusitusiga paia. Ma ao faitauina e Sister Mok ia tusitusiga paia i ana malaga o aso uma i le nofoaafi, sa ia mauaina ai foi ni faamanuiaga mo ia lava. “Sa ou lagonaina foi le Agaga ma maua tali o au tatalo ao faaauau pea ona ou agai atu i luma i le olaga,” sa ia fai mai ai.

“I lo’u aafiaga, sa popole ma lagona le le mautonu e nisi o le autalavou pe mata latou te mauaina se molimau ma maua se aafiaga faaleagaga e pei ona maua e isi,” sa ia fai mai ai. “E ala i le galulue faatasi, ua matou faamautinoa atu ai i latou i a matou faatinoga e aoga lenei mea ma o loo matou i ai iina e lagolagoina i latou i laasaga uma.”