Nag-ampo Ko alang sa Kaisug

Fy Tianarivelo, Madagascar

Ang akong mga ginikanan mga miyembro sa Simbahan, apan dili sila kaayo aktibo. Kini usahay mahimong panagsumpaki tungod kay sila nagtuo nga ang panahon sa pamilya kinahanglang mag-una kaysa bisan unsa pang butang—sa dili pa mosimba, mo-magnify sa mga calling sa Simbahan, ug mobuhat sa uban pang mga kalihokan.

Tungod kay lider ko sa Primary ug sakop sa ward choir, ang akong mga miting sa Simbahan usahay magkadungan sa mga buluhaton sa pamilya. Usa ka adlaw samtang nangandam ko nga motambong sa usa ka sibya sa kinatibuk-ang komperensya sa among meetinghouse sa Antananarivo, gipahinumduman ko sa akong mga ginikanan nga kami adunay mga bisita sa among balay.

“Kinahanglan kang mamili tali sa imong pamilya ug sa Simbahan,” miingon ang akong inahan. “Magpabilin ka ba dinhi uban namo ug dili motambong sa komperensya, o moadto ka sa komperensya ug atubangon ang silot.”

Mihukom ko nga dili makiglalis sa akong inahan. Hinoon, migahin ko og panahon sa pagpangamuyo sa Langitnong Amahan sa paghatag nako og kaisug ug kalig-on. Nangamuyo usab ko Niya sa pagtabang kanako sa pagkahibalo unsa ang angay buhaton. Magpabilin ko sa balay uban sa akong pamilya o mosimba ug maminaw sa tingog sa propeta?

Sa dihang nahuman nako sa pag-ampo, mibati ko sa Espiritu Santo. Mibati ko sa Espiritu nga miawhag kanako sa pagsulti sa akong inahan kon unsa ka importante alang kanako nga moadto sa simbahan ug maminaw sa propeta. Mibati ko nga kinahanglan nako siyang sultihan nga makadawat ko og maalamong tambag nga dili lang magamit sa akong kinabuhi karon apan sa ako usab nga umaabut.

Ang Dios makahimo og milagro, ug Iyang humukon ang kasingkasing sa akong mga ginikanan aron ila kong tugutan sa pagtambong sa kinatibuk-ang komperensya nga dili silutan. Kini usa ka talagsaon nga kasinatian sa akong kinabuhi. Kini nagpamatuod sa kamatuoran nga mabasa diha sa kasulatan, “Pinaagi sa gahum sa Espiritu Santo kamo mahimo nga masayud sa kamatuoran sa tanan nga mga butang” (Moroni 10:5).

Nasayud ko nga kon atong basihan ang atong mga lihok sumala sa mga baruganan sa ebanghelyo ug maminaw sa Espiritu, kita sa kanunay magmalipayon sa atong mga pagpili. Kini nga kasinatian nakalig-on sa akong pagpamatuod nga ang Dios anaa kanunay para kanato ug ang Espiritu Santo motabang kanato.

Sa dihang nahuman nako sa pag-ampo, mibati ko sa Espiritu Santo nga nag-awhag kanako sa pagsulti sa akong inahan kon unsa ka importante alang kanako nga moadto sa simbahan ug maminaw sa propeta.