Vakasama ni Lotu Vakamatavuvale

Na ilavelave oqo era umani tu kina na itukutuku kei na itaviqaravi e rawa ni ra vakayagataki ena lotu vakamatavuvale. Oqo eso na kena ivakaraitaki.

“Na Bula Vakavakarau ena Vakarautaki keda Ki na Veisiga ni Mataka,” tabana e 12: Wilika na ono na tikina e vakamacalataki tiko ena itukutuku meda rawa ni bula-rawati keda kina. Na cava eso na oga tubu koso se leqaleqa ena rawa ni tarovi ena kena tarai cake na bula-rawati koya ena gauna vakaoqo? Sureti ira na lewe ni matavuvale mera vakasamataka ena masumasu na veitikina eso mera na vakatorocaketaka ka lavaka na inaki eso me vakatorocaketaki kina na bula-rawati koya ena veika vakaoqo.

“Bula Savasava tiko ena Vuravura Tawa Savasava,” tabana e 42: Dou veivosaki vakamatavuvale me baleta na taro e tiko ena itukutuku. Sa rawa mo wasea na ivakavuvuli kei na veika eso o sa sotava ka ra sa vaqaqacotaka na nomu ivakadinadina me baleta na tiko savasava. Me veivosakitaki na sala me bulataki rawa kina na ivakasala oqo mai na itukutuku.

“Mo Yalomatua ka Mo iTokani,” tabana e 48: Tekivu ena nomu wilika na taro nei Elder Hales mera kilai kina o ira na itokani vinaka. Sa rawa me veivosakitaki na kena bibi mo itokani vinaka. Sureti ira yadua na lewe ni matavuvale mera vakasamataka mada e tolu na sala e rawa ni itokani vinaka kina o koya.

“Kivei Amiga,” tabana e 60, kei na “Kidavaka e dua na Gauna Vou ni Bula,” tabana e 61: Wilika na kedra italanoa na Lalai oqo kei na sala era sa vakavakarau lewena tiko kina na Goneyalewa kei na Cauravou. Vakamatavuvale, sa rawa mo dou veivosakitaka na veika era sa cakava na gonelalai oqo mera vakavakarau kina. Sureti ira na lewe ni matavuvale mera wilika na Toro Cake Yadudua se na ivolalailai iTavi Vua na Kalou mo raica kina eso na itaviqaravi e ratou taleitaka me ratou vakayacora ena veisiga ni mataka.

Dua na Lotu Vakamatavuvale, Rua na Lesoni

Ena dua na bogi ratou a veisiko mai na noqu itubutubu kei rau na itubutubu i tinaqu me keitou lotu vakamatavuvale. E ratou dau taleitaka yadua na luvequ e tolu na vakaitavi, ia na bogi oqo sa gauna me na soli lesoni kina o luvequ tagane yabaki vitu. Keitou sa vakarautaka rawa toka e dua na ivakaraitaki lailai, biu cake sara na veiyaloyalo ni kena Buli na Vuravura, ka vakadikeva ka raicalesu na veika mena veivakatavulici kina o koya. Sa vakavakarau ka maqusa toka o luvequ.

Ena gauna ni lesoni, keimami a vakarorogo matua sara ki na veika a vakamacalataka tiko o luvequ. Ni sa oti o koya, sa gadreva talega o Samuel, yabaki tolu, me solia talega e dua na lesoni. A taura cake na iyaloyalo kei na ivakaraitaki ka tuva tale ena teveli.

Mai na voqa malumu ni domona ka vaka me mama na nona vosa ena so na gauna, a tuberi keitou o Samuel ena lesoni ni lotu vakamatavuvale. Ka dina ga ni a sega ni vakavakarau kina, a vakarorogo matua toka. A vakamacalataka vei keitou na kena buli ko vuravura ka tukuna na nona lomani keda yadudua o Jisu Karisito.

Keitou a kurabui ena rawarawa ni nona vakatavulica na lesoni—me vaka ga a vakayacora o tuakana. E ratou a kurabui ka marau o noqu itubutubu kei rau o tukaqu kei buqu. Keitou raica rawa kina na nodra taleitaka dina na gonelalai vakaoqo na kosipeli—kei na nona lomani ira tiko o Jisu Karisito.

Lizbeth Sánchez Fajardo, Mexico