Unang Stake sa India Gi-organisar
Makita ang gibating kahinam ug pasalamat sa dihang sobra sa 1,500 ka mga miyembro ug mga higala nagpundok sa Novotel Convention Center sa Hyderabad, India, alang sa pagmugna sa Stake sa Hyderabad India, ang unang stake sa nasud, niadtong Mayo 27, 2012. Si Elder Dallin H. Oaks sa Korum sa Napulog Duha ka mga Apostoles ang midumala ug gikuyogan nila ni Elder Donald L. Hallstrom sa Kapangulohan sa Seventy ug Elder Anthony D. Perkins sa Seventy, nga nagserbisyo isip Presidente sa Asia Area. Matag lider gikuyogan sa ilang asawa atol sa komperensya.
Si John Gutty gipaluyohan isip presidente sa stake uban nila ni Suresh Natarajan isip unang magtatambag ug Rajaratnam Bushi isip ikaduhang magtatambag. Ang unang patriarch sa India mao ang kanhi presidente sa district, si Prasad Rao Gudey.
Namulong sa kinadaghanang pundok sa mga Santos sa India sukad, si Randy D. Funk, presidente sa India Bangalore Mission, miingon, “Nindot kaayo kining tan-awon niining makasaysayanong adlaw, ang adlaw nga kanunay natong hinumduman. Kanunay natong hinumduman nga usa ka Apostol sa Ginoo mianhi.”
Si Elder Perkins mipahayag sa gugma gikan sa Kapangulohan sa Asia Area ngadto sa mga miyembro sa India ug miingon, “Nakita nato ang sinugdanan sa talagsaong buhat dinhi niini nga yuta. Ang paglambo sa Simbahan ug pagmugna sa stake gihimo sumala sa mahangturong mga baruganan sa ebanghelyo ug na-establisar nga mga sumbanan sa priesthood.”
Mipahibalo nga siya ang ikaduhang saksi sa pagtawag sa bag-ong kapangulohan sa stake, si Elder Hallstrom mipasabut sa proseso sa pagpadayag sa papili og bag-ong lider sa stake. Isip sakop sa Seventy, siya gi-assign ug miabut nga walay gidapigan, siya miingon. Siya misunod sa pamaagi sa Ginoo, nagsalig sa Iyang Espiritu sa pagdawat sa pagpadayag. “Ang kabubut-on sa Ginoo mao nga si Presidente Gutty ang mahimong presidente sa stake,” miingon si Elder Hallstrom.
Si Kristen Oaks, nga mikuyog sa iyang bana, namulong kabahin sa pagtudlo sa mga anak aron sila motuo “kay ang ilang mga inahan nasayud niini” (tan-awa sa Alma 56:48).
Isip katapusang mamumulong sa miting, si Elder Oaks mipahayag og pasalamat sa nasud sa India, usa ka nasud nga adunay kagawasan sa relihiyon nga nagtugot sa mga miyembro sa Simbahan “nga magtigum ug maghisgut sa mga baruganan sa atong tinuohan.”
Si Elder Oaks mipamatuod sa pagsaksi sa Espiritu nga ang Ginoo miandam ug mipili sa mga lider nga gitawag. Si Elder Oaks naghisgut usab kabahin sa bag-ong mga responsibilidad sa stake.
Sa Daang Tugon si propeta Isaias mipahisama sa Israel ngadto sa usa ka tolda nga gipasilungan sa mga anak sa Israel, siya miingon. “Ang Simbahan karon mao ang tolda. Kitang tanan nasayud nga ang usa ka tolda kinahanglan nga suportahan og mga stake. Karon nga ang Hyderabad usa ka stake sa Zion, kamo gilauman nga mopadayon ug mohatag og mas dakong suporta pinaagi sa ikapulo ug sa mga misyonaryo.”
Isip resulta sa pagkamugna sa stake, ang mga miyembro sa Hyderabad makadawat og patriyarkal nga mga panalangin. Si Elder Oaks mipasabut kon unsay sulod sa patriyarkal nga panalangin, nagpasabut sa mga panalangin isip “pribado nga mga kasulatan.”
“Ang patriyarkal nga panalangin namahayag sa inyong kagikan sa mga tribo sa Israel diin madawat ang dagkong mga panalangin,” miingon si Elder Oaks. “Ang patriyarkal nga panalangin namahayag usab sa mga panalangin ug mga saad nga atong maangkon kon kita magmatinud-anon.”
“Sa paglambo sa Simbahan sa India, moabut ang panahon nga ang propeta madasig sa pagtukod og templo sa India,” siya mipadayon. “Matag stake nga namugna mopadako sa purohan nga adunay itukod nga templo. Kon ang mga tawo mopakita og katakus ug pasalig, mosunod ang templo.”
Sa pagtapos si Elder Oaks mihatag og panalangin: “Niining unang stake sa bantugan nga nasud sa India, ako mopanalangin kaninyo sa paghinumdom sa mga pagtulun-an niining taknaa. Ako mopanalangin kaninyo sa paghinumdom sa mga pakigsaad nga inyong gihimo sa dihang kamo gibunyagan. Ako mopanalangin kaninyo og panumduman ug determinasyon sa pagsunod sa mga sugo sa Dios nga unta inyong matagamtaman ang Iyang mga panalangin.”
Ang kapangulohan sa stake sa bag-ong na-establisar nga Stake sa Hyderabad India (wala ngadto sa tuo): Suresh Natarajan, unang magtatambag; John Gutty, presidente; Rajaratnam Bushi, ikaduhang magtatambag.
Dul-an sa 600 ka mga young single adult gikan sa India, Nepal, ug Sri Lanka ang nagpundok alang sa komperensya sa wala pa ang pagmugna sa unang stake sa India.
Kredito
Samtang mibisita sa Hyderabad, India, si Elder Oaks ug ubang mga lider sa Simbahan nakighimamat sa gatusan ka mga miyembro gikan sa India, Nepal, ug Sri Lanka.
Kredito
Mga litrato pinaagi ni James Dalrymple