Pagbakante sa mga Petsa sa Among Kalendaryo alang sa Komperensya
Tungod kay dili puno ang among panahon og sobrang mga kalihokan, mas nabati namo ang Espiritu samtang kami naminaw sa kinatibuk-ang komperensya.
Daghang katuigan ang milabay, sa dihang ang unom namo ka anak mga bata pa, mihukom kami nga himoon namong mas makahuluganon ang kinatibuk-ang komperensya. Among gihisgutan kon unsa kaimportante nga motan-aw sa komperensya nga may klarong panghunahuna ug piskay nga mga lawas. Ang komperensya usa ka importanting panahon sa pagdawat og instruksyon gikan sa atong mga propeta karon. Busa naghimo kami og tumong nga dili magplano og daghan kaayong buluhaton kon duol na ang komperensya o atol sa komperensya. Gibakantehan namo kadtong mga adlawa sa among kalendaryo, ug ang matag usa kanamo mipasalig nga dili maghimo og sobrang mga kalihokan niadtong mga adlawa.
Kon kamo mopili sa pagsunod niini nga paagi, kini talagsaon sa inyong pamilya ug sa inyong sitwasyon, apan ang among pamilya nagkasabut nga ang “sobrang mga kalihokan” nagpasabut sa pagtambong og mga kalihokan sa eskwelahan, pagdapit sa mga anak sa silingan ngari sa among balay, paghimo sa mga butang uban ang mga higala nga layo sa balay, pakig-party o panihapon uban sa mga higala o mga paryente, paghimo og mga proyekto o buluhaton sa yard tunga-tunga o atol sa mga sesyon sa komperensya, paghimo sa mga proyekto sa eskwelahan, ug pagdawat og sobra nga mga buluhaton sa trabahoan.
Kon semana na sa wala pa ang kinatibuk-ang komperensya, lisud usahay sa pagbalibad niining mga kalihokan, apan kasagaran ang among pamilya malipayong nakahimo sa eksaktong mga pagpili sa pagkab-ut sa among tumong. Among nasayran nga ang mga manghod ganahang maapil sa kinatibuk-ang komperensya. Tingali tungod kay sige namo og hisgut ang kaimportante sa komperensya sa semana sa wala pa ang komperensya.
Malipayon kong mosulti nga ang paghimo sa among eskedyul nga simple sa mga adlaw sa wala pa ug atol sa kinatibuk-ang komperensya hingpit nga nakausab sa kasinatian sa among pamilya. Ang among kasingkasing ug hunahuna andam para sa komperensya. Ang panahon wala mapuno sa sobrang mga kalihokan, aron among mabati ang Espiritu samtang kami naglingkod ug naminaw sa mga tambag sa atong mga lider.
Among gipadayon ang among tumong matag komperensya tungod kay kini nakahatag og kalinaw sa among panimalay. Bisan tuod pipila sa among mga anak wala na magpuyo sa balay, giawhag namo sila nga padayunong bakantehan ang mga petsa sa kalendaryo sulod sa pipila ka adlaw sa wala pa ug atol sa komperensya, sama sa among gibuhat sa balay. Gi-eskedyul usab namo nga manan-aw og sesyon sa komperensya kauban ang tibuok pamilya. Nanghinaut ko nga kon ang among mga anak magminyo ug makabaton og mga anak, ilang padayunon nga hatagan og taas nga importansya sa pagpadayon sa ilang kasinatian sa komperensya pinaagi sa pagbakante sa mga petsa sa ilang kalendaryo.
Gilitratohan ni Sarah Jenson