Talagsaong mga Kinabuhi Gihinumduman
Dan Jones (1810–62)
Kapin sa usa ka milyon ka mga misyonaryo ang natawag sukad sa pag-organisar sa Simbahan, apan si Dan Jones mas labaw pa kay sa usa diha sa usa ka milyon. Mahitungod sa mga misyonaryo nga Welsh, si Presidente Gordon B. Hinckley (1910–2008) miingon, “Kon hisgutan ang gidaghanon sa mga nakabig, si Dan Jones angay nga ilakip sa mga tunga sa dosena sa pinaka-mabungahon nga mga misyonaryo sa kasaysayan sa Simbahan.”1
Sa dili pa siya misyonaryo, si Dan milangyaw gikan sa Wales ngadto sa Estados Unidos ug nagtrabaho sa Mississippi River isip kapitan sa usa ka steamboat nga gitawag og Maid of Iowa, nga midala sa daghang Santos sa Ulahing mga Adlaw ngadto sa Nauvoo, Illinois. Mipasakop siya sa Simbahan niadtong 1843 ug nahimong suod nga higala ni Propeta Joseph Smith.
Ang mga misyon ni Dan mao ang katumanan sa katapusang narekord nga panagna ni Joseph Smith. Sa gabii sa wala pa mapatay si Propeta Joseph Smith, nakadungog siya og mga buto-buto sa pistola gawas sa bintana sa Bilanggoan sa Carthage, mao nga gipili niyang matulog sa salog. Duol kaniya mao si Dan Jones. Ang Propeta nangutana kang Dan kon nahadlok ba siyang mamatay. Siya mitubag, “Miabut na ba kana nga panahon, sa imong hunahuna? Nalakip sa ingon nga kawsa wala ako magtuo nga ang kamatayon ingon niana ka makahahadlok.” Dayon nanagna si Joseph, “Imo pang makita ang Wales, ug makatuman sa misyon nga gisangon kanimo sa dili ka pa mamatay.”2
Ang saad sa Propeta natuman niadtong 1845, dihang si Dan ug ang iyang asawa, si Jane, gitawag nga moserbisyo sa Wales. Gigamit ni Dan ang iyang talento sa kamaayong mamulong sa pagtudlo sa ebanghelyo uban ang talagsaong kombiksyon. Maayo siyang mamulong og Welsh ug Iningles, ug ang mga saksi nagrekord nga mamulong siya nga hilabihan ka madanihon nga ang mga tigpaminaw mamati gayud og dugay kaniya bisan unsang pinulongan ang iyang gamiton.
Samtang didto sa Wales, nagmantala si Dan og mga mantalaan sa mga Santos sa Ulahing mga Adlaw, mga dinahon nga sinulat, ug mga basahon sa Welsh. Ubos sa direksyon ni Dan Jones, ang misyonaryo sa Wales miestablisar og 29 ka branch ug mibunyag og hapit 1,000 ka mga tawo matag tuig sa una niyang misyon. Gitawag siya sa ikaduha niyang misyon ngadto sa Wales niadtong 1852, ug bisan pa sa nagkagrabe nga pangpanglutos sa Simbahan mga 2,000 ka tawo ang nabunyagan sulod sa upat ka tuig.
Sa iyang pagpauli sa Utah, mitabang si Dan sa pagdala og daghang kinabig nga Welsh didto sa Utah. Sa dihang namatay siya sa edad nga 51, nakatabang siya sa gibana-bana nga 5,000 ka mga tawo sa kasadpan sa Estados Unidos.
Gikan sa wala: Litrato ni Dan Jones ang misyonaryo sa Welsh. Usa ka steamboat, sama sa gitrabahoan niya isip kapitan, padulong nang modunggo sa Nauvoo, Illinois. Si Dan Jones mitabang sa mga nanglangyaw nga mga Welsh.