Nalig-on pinaagi sa Pulong

Gilitratohan NILA NI Josué A. Pena ug GLORIA HIATT

Ang mga batan-on nagpamatuod sa mga panahon dihang natudloan sila sa mga kasulatan, nahupay tungod niini, ug nagiyahan niini.

Among gihangyo ang mga batan-on sa pagsugilon kanamo mahitungod sa panahon nga ang namemorya nila nga kasulatan nakatabang kanila, sama sa gipamulong ni Elder Richard G. Scott sa Korum sa Napulog Duha ka mga Apostoles mahitungod sa Oktubre 2011 nga kinatibuk-ang komperensya (tan-awa sa sidebar). Ania ang pipila sa ilang mga tubag.

Kalinaw sa Akong Kalag

“Akong anak, kalinaw nganha sa imong kalag; ug ang imong kalisdanan ug ang imong mga kasakitan sulod lamang sa mubo nga higayon” (D&P 121:7).

Ang kasulatan nga naghatag kanako og mas dakong kahupayan sulod sa katuigan mao ang Doktrina ug mga Pakigsaad 121:7, dihang si Propeta Joseph Smith didto sa Liberty Jail nangayo og panabang sa Langitnong Amahan. Akong namemorya kini nga bersikulo diha sa seminary ug mahinumdom niini kon nagkinahanglan ko og kahupayan. Nagpahinumdom kini kanako nga ang akong Amahan sa Langit nahigugma kanako ug nahibalo sa akong mga pagsulay. Gigamit ko kini nga bersikulo aron mahatagan ako sa kalinaw panahon sa kasagmuyo ug kahuyang.

Kini nga mga bersikulo nakatabang kanako samtang naa ko sa party nga usa ka dapit diin dili unta angay nga maanaa ko. Mabination nakong gibalibaran ang akong mga higala dihang gihangyo ko nila sa pag-inom o pagsigarilyo. Kini nga bersikulo naghatag kanako og kalig-on nga akong gikinahanglan sa pagbarug sa akong mga gituohan.

Kini nga bersikulo nakatabang sab nako sa paghimo og lisud nga paghukom. Ang akong higala ug ako wala gayud magkalagyo sulod sa lima ka tuig. Magdula kami og sport, magbiyahe, ug maglulinghayaw sa katapusan sa semana. Apan nagsugod siya sa pakigbarkada sa mas magulang nga mga higala kinsa dili nako ganahang ikauban. Sa katapusan iya kong gipapili kon magpabilin ba ming higala o magpadayon ko sa akong mga gituohan kabahin sa Pulong sa Kaalam ug sa balaod sa kaputli. Nakalitan kaayo ko. Wala gayud ko masayud nga ang pagbarug alang sa akong gituohan ingon ana kalisud. Apan akong gipili ang paghimo og bag-ong mga higala, naghunahuna kanunay sa saad sa Langitnong Amahan ngadto kang Joseph Smith nga ang tanan mamaayo ra.

Walay butang nga ikahulip sa pagkaamong sa akong mga gituohan, ug akong nasinati ang tinuod ug malungtarong kalipay kon mopili ko sa matarung. Kini nga kasulatan milig-on sa akong pagpamatuod ug nakahatag og tabang dihang kini akong gikinahanglan.

Lauren J. edad 16, Arkansas, USA

Ang Huyang nga mga Butang Nahimo nga Lig-on

Mga bulan sa wala pa ang entrance exam alang sa high school, wala ko mobati nga andam. Nakasiguro ko nga imposible nga makahimo ko og maayo niini. Mao nga nag-ampo ko sa Langitnong Amahan. Samtang nag-ampo ko, kini nga mga pulong misantop sa akong hunahuna: “Ako mohatag ngadto sa mga tawo og kahuyang nga sila mahimo nga magpaubos; ug ang akong grasya igo alang sa tanan nga mga tawo nga magpaubos sa ilang mga kaugalingon sa akong atubangan, kay kon sila magpaubos sa ilang mga kaugalingon sa akong atubangan, ug magbaton og hugot nga pagtuo ngari kanako, niana Ako mohimo sa mahuyang nga mga butang nga mahimo nga malig-on ngadto kanila.” (Ether 12:27).

Akong naamguhan nga kon mag-ampo ko sa Langitnong Amahan og kalig-on sa pag-atubang sa mga hagit ug pagsulay, mopanalangin Siya kanako ug motabang sa pagbuntog sa akong mga kahuyang. Ang pagpresentar ngadto sa Ginoo sa akong kabalaka mao ang pinakamaayong desisyon nga akong mahimo. Siya ang pinakamaayo nga magtutudlo, ug nahibalo ko nga Siya mitabang kanako.

Irvin O. edad 16, El Salvador

Mag-ampo Kanunay

“Pag-ampo kanunay, aron ikaw mahimo nga magmadaugon; oo, nga ikaw makabuntog ni Satanas ug nga ikaw makalingkawas sa mga kamot sa mga sulugoon ni Satanas nga nagpatunhay sa iyang buhat” (D&P 10:5).

Kini nga bersikulo nakatabang nga akong masagubang ang mga tintasyon. Kon magbuhat na unta ko og butang nga sayop, kini nga bersikulo ug ang mensahe niini mosantop sa akong hunahuna. Matag higayon ako mag-ampo human nako madawat kana nga pag-aghat, akong madawat ang tabang nga akong gikinahanglan sa pagbuntog sa mga tintasyon nga akong giatubang.

Jesse F. edad 17, Utah, USA

Ako Magauban Kanimo

“Pagpailub sa mga kasakit, kay ikaw makabaton og daghan; apan lahutay kanila, kay, tan-awa, Ako anaa uban kanimo, gani ngadto sa katapusan sa imong mga adlaw” (D&P 24:8).

Ang pagmemorya niini nga kasulatan usa ka panalangin, ilabi na dihang nahadlok ko sa akong pag-inusara. Sa matag higayon nga kini akong mahinumduman, makaangkon ko og kaisug ug mas maayong pagbati. Isip batan-ong mga lalaki ug mga babaye, nagkinahanglan kita og giya ug suporta, ilabi na sa pagsagubang sa malisud nga mga pagsulay ug mga hagit. Bisan og usahay ang umaabut ingon og walay siguro o makawala sa paglaum, nahibalo ko nga makasalig ako sa Ginoo ug makadawat sa Iyang mainit nga paggakos.

Sa gamay pa ko, natudloan ko diha sa panimalay ug sa Primary nga ang Ginoo kanunay nakong kauban kon mobuhat ko sa akong bahin. Tungod niana nga mga pagtulun-an ug niini sab nga kasulatan, nahibalo ko nga kanunay kong makasalig Kaniya.

Sofia I. edad 15, Uruguay

Ang mga Kasulatan Makatabang sa Panahon sa Panginahanglan

“Ang mga kasulatan susama sa gagmayng kahayag nga modan-ag sa atong hunahuna ug mohatag og giya ug inspirasyon gikan sa kahitas-an. … Talagsaong gahum moabut gikan sa pagmemorya og mga kasulatan. Ang pagmemorya og kasulatan mao ang paghulma og bag-ong pakighigala. Sama sa pagdiskobre og bag-ong tawo nga makatabang panahon sa panginahanglan, makahatag og inspirasyon ug kahupayan, ug mahimong tinubdan sa kadasig sa gikinahanglan nga kausaban.”

Elder Richard G. Scott sa Korum sa Napulog Duha ka mga Apostoles, “Ang Gahum sa Kasulatan,” Liahona, Nob. 2011, 6.

Paghimo og Tumong

Ikonsiderar ang paghimo og tumong sa pagmemorya og pipila ka mga kasulatan. Makamemorya kamo og mga bersikulo sa scripture mastery sa seminary o isip kabahin sa Katungdanan ngadto sa Dios o sa Personal nga Kauswagan.

Gilitratohan NILA NI Welden C. Andersen ug Christian Ibanez