Ko Hono Tali ʻo ha Lotu ʻi he Kilisimasí
“`Pea ʻe manatuʻi foki ʻe he ʻEikí ʻa e ngaahi lotu ʻa e māʻoniʻoní, ʻa ia kuo fai kiate iá” (Molomona 5:21).
Naʻe ʻā hake ʻa Peki ʻi he pongipongi Kilisimasí. Naʻá ne ʻamanaki fiefia ki haʻane maʻu ha kiʻi meʻavaʻinga fakafiefia foʻou pea kai ha meʻatokoni faka-Kilisimasi lahi. Ka naʻá ne fakasio takai, pea naʻá ne iloʻi ʻe kehe ʻa e taʻú ni ia. Neongo naʻe ngāue mālohi ʻene tamaí, ka naʻe ʻikai ke ʻi ai ha paʻanga ʻa hono fāmilí.
Naʻe ʻikai ke ʻi ai ha faʻahinga fakaʻilonga ia ʻe fai ha maʻu meʻatokoni faka-Kilisimasi lahi. Naʻe ʻikai ke ʻi ai ha meʻa ʻi he laulau vesitapoló pea naʻe ʻikai ke ʻi ai ha meʻakai ʻi he ʻaisí.
Naʻe ʻalu atu ʻa Peki mo hono tuongaʻane ko Malekamú ki he matapā ʻo e loki ʻo ʻena ongo mātuʻá, ʻo na sio atu ki heʻena tūʻulutui ʻi hona veʻe mohengá. Naʻá na fanongo fakalongolongo atu ki he lotu ʻena faʻeé mo ʻena tamaí ki he Tamai Hēvaní ke tokoni mai ki he fāmilí ke nau maʻu ha meʻakai.
Naʻe pehē ange ʻe Peki kia Malekamu, “Haʻu ke ta ʻalu ki tuʻa.”
Naʻe ʻalu leva ʻa Peki mo Malekamu ki tuʻa ʻo na tānaki mai ʻa e hulufe naʻe tupu ʻi he veʻe ngoué. Mahalo ʻe ʻikai ke ʻi ai ha ngaahi meʻavaʻinga ʻi he taʻú ni, ka te na kei lava pē ʻo ngaohi honau ʻapí ke hangē pē ʻoku Kilisimasí.
Naʻá na ongoʻi fiemalie ange ʻi he hili ʻena teuteuʻi honau falé ʻaki ʻa e hulufe lanu matá, ka naʻe ʻikai pe ke ʻi ai ha fakaʻilonga ʻoku ʻi ai ha meʻakai.
Naʻe pehē ange ʻe he fineʻeikí, “ʻE foaki mai ʻe he Eikí. Tau teuteuʻi ʻa e tēpilé.”
Naʻe ʻomi ʻe he tangataʻeikí ʻa e ʻū peletí ki he tēpilé, kae ʻomi ʻe he fineʻeikí ʻa e huhú mo e sēpuní.
Naʻe fesiofaki ʻa e ongo tamaikí pea hā mei hona matá ʻena puputuʻú. Naʻe maau ʻa e tēpilé, ka naʻe teʻeki pē ke ʻi ai ha meʻakai. Naʻe ʻosi atu ʻa e taimi kai pongipongí pea ofi ki he taimi kai hoʻataá. Naʻe kamata ke ongoʻi ʻe Peki ʻoku fiekaia. Naʻá ne fifili ai pe ʻe angafēfē ha maʻu ʻe he fāmilí ha meʻakai.
Naʻe aʻu hake ʻa e uasí ki he 12:00, pea aʻu ki he 12:30, pea 12:45. Naʻe ʻikai pē ke ʻi ai ha meʻa. Naʻe fanongo atu ʻa Peki ki ha tukituki ʻi he matapaá.
Naʻe lele atu ʻa Peki ʻo fakaava mai ʻa e matapaá, peá ne ʻohovale lahi ʻi heʻene sio atu ki he fāmili Keekí ʻoku nau tuʻu mai. Naʻa nau toʻotoʻo mai ha hami, mā, moa, mo e sālati, mo e lole. Naʻe ʻikai faʻa tui ʻa Peki ki he meʻa naʻá ne sio ki aí.
Naʻe pehē mai ʻe Misa Keeki, “Ko e kamata ʻeni ke mau tangutu hifo ke maʻu ʻemau meʻatokoni Kilisimasí, mo ʻemau fakakaukau mai kiate kimoutolu. ʻOku mau ʻamanaki pē te mou fie fakaʻaongaʻi ʻa e meʻakai ko ʻení.”
Naʻe lulululu ʻeku tamaí mo Misa Keeki, pea kamata fokotuʻutuʻu ʻe he fineʻeikí ʻa e meʻakaí ki he tēpilé. Naʻe kei ʻohovale pē ʻa Peki. Naʻá ne sio atu ki heʻene tamaí mo ʻene faʻeé, ka naʻe hangē ia naʻá na ʻamanaki pē ʻe hoko ʻa e meʻa ko ʻení.
Naʻe ʻiloʻi ʻe Peki naʻe tonu ʻa e ongo naʻá ne maʻu ʻi he pongipongi ko iá. Naʻe kehe ʻa e Kilisimasi ko ʻení. Ko e Kilisimasi ʻeni naʻá ne ʻiloʻi ai ʻoku fanongo mo tali mai ʻe he Tamai Hēvaní ʻa e ngaahi lotú. Pea ko e meʻaʻofa lelei taha ia te ne lava ʻo maʻú.
Ngaahi tā fakatātā ʻa Brad Teare