Ngaahi Liliu Toputapu
Kuo fakahoko ʻe he Temipale Seni Salavatoa ʻEle Salavatoá ha ngaahi liliu lahi ange, mei hono liliu pē ʻo e funga fonuá; kuo hanga ʻe hono ivi takiekiná ʻo liliu ʻa e ngaahi loto, ngaahi fāmili, mo ha puleʻanga kakato.
Liliu ʻo ha Moʻunga
ʻOku fakafuofua ko ha Kāingalotu ʻe toko 600 nai naʻa nau fakataha mai he ʻaho 20 ʻo Sepitema, 2008 ki ha kiʻi moʻunga ʻi he kolo ko Seni Salavatoá, ʻi ʻEle Salavatoa ʻi ha ʻaho naʻe ʻuha lahi. Naʻa nau tuʻu ai ʻi ha kelekele naʻe hoko ko ha ngoueʻanga ʻi ha ngaahi taʻu lahi. Naʻa nau lotu fakataha ai mo fevahevaheʻaki ʻenau fakamoʻoní ʻo fakatatau ki he fakahinohino tuʻutuʻuni ʻa e Kau Palesitenisī Fakaʻēlia ʻo ʻAmelika Lotolotó. Naʻe ai honau niʻihi naʻa nau hunuki ʻenau ngaahi sāvolo foʻoú ʻi he kelekele motuʻa ko iá, mo e ʻamanaki ke hoko mai ha liliu ki he kelekele ne fili ko iá.
Naʻe feʻiloaki fiefia ha Kāinglotu lotoʻapasia mo fiefia ʻe lau afe naʻa nau fakataha mai ʻi he ʻaho 21 ʻo ʻAokosi, 2011, ʻi he kiʻi moʻunga tatau pē. Naʻe ʻikai ke toe hoko ia ko ha ngoueʻanga, ka kuo liliu ia ʻo hoko ko e potu toputapu taha ʻi ʻEle Salavatoá. Naʻe fakataha mai ai ʻa e Kāingalotú ki ha temipale. Naʻa nau tatali fiefia ai ki ha aʻu mai ha palōfita, ko Palesiteni Henelī B. ʻAealingi ʻo e Kau Palesitenisī ʻUluakí, ʻa ia te ne fakatapui ʻa e temipale ko iá ki he ʻEikí. Naʻe lea ai ha mēmipa fuoloa ʻo e Siasí ʻo hangē ka fanafana pē ʻo pehē, hangē ʻoku fakamavaheʻi ʻa e feituʻu ko ʻení mei he toenga ʻo hono ngaahi ʻātakaí—“ko ha kiʻi konga ʻo hēvani ʻi māmani.”
Liliu ʻo ha Fāmili
Naʻe hohaʻa ʻa ʻEvelini Visilei ʻi ʻEpeleli 2010, naʻa ʻoku fakaʻau ke mole ʻa e tui ʻa hono husepāniti ko ʻAmató. Ko e taʻu ʻeni ʻe 11 ʻo e ʻikai te ne toe maʻu lotú, pea kuo aʻu ʻeni ki he tuʻunga ʻokú ne pehē ai ʻoku ʻikai ke ʻi ai ha Siasi moʻoni ia. Lolotonga iá, ne ʻikai pē tuku ʻa e tui ʻOtua ia ʻa ʻEveliní, pea naʻá ne ʻalu mei he siasi ki he siasi, ʻi heʻene holi ke fanongo ki Heʻene folofolá, ka naʻe ʻikai pē te ne fiemālie ʻi he ngaahi meʻa kuó ne fanongo aí. ʻOkú ne ʻā hake ʻi he ngaahi pongipongi ʻe niʻihi ʻokú ne tangi. Naʻá ne lotu tautapa ki heʻene Tamai Hēvaní ʻi he ngaahi ʻaho peheé ke ne maʻu ha fakahinohino. Naʻá ne fehuʻi kiate Ia pe ko e hā ʻa e ʻuhinga ʻoku ʻikai te ne ongoʻi fiemālie ai ʻi he ngaahi siasi kuó ne ʻalu ki aí, neongo ʻene holi fakamātoato ke ako kiate Iá. Naʻá ne toe lotua foki ke ʻi ai ha ʻaho ʻe fakataha ai hono fāmilí ki ha siasi pē ʻe taha.
ʻI he aʻu mai ki he 23 ʻo ʻAokosi 2011, kuo hoko kia ʻAmato mo ʻEvelini Visilei ha liliu naʻe ʻikai ke faikehekehe mo e liliu naʻe hoko ʻi he kiʻi moʻunga ko ia ʻi honau kolomuʻá. Naʻá na teunga hina kakato ʻi heʻena hū atu ki he loki silá mo hona ʻofefine taʻu hiva, ko Miseli, mo hona foha taʻu tolu ko Kalisitiané. Ko kinautolu ʻa e ʻuluaki fāmili naʻe silaʻi ki he moʻuí ni mo e taʻengatá ʻi he Temipale Seni Salavatoa ʻEle Salavatoá. Naʻa nau hangē pē ko e temipale naʻa nau hū atu ki aí, ʻo toki fakatapui foʻou ʻa kinautolu ki he ngāue ʻa e ʻEikí, pea naʻa nau taha ʻi honau fakatapui ko iá.
Ko e Talanoa ʻo e Fāmili Visileí
Naʻe pehē ʻe ʻAmato, “Naʻe kamata ʻa e talanoa ki homa uluí ʻi heʻema ʻiloʻi ha ongo faifekau(ʻeletā)—kae mahalo, ko kinaua naʻá na ʻiloʻi kimauá. Naʻá ma foki mai mei he ʻapi ʻo e ongomātuʻa ʻa ʻEveliní, pea naʻá ma toʻo mai ha ngaahi kato fakatau. Naʻá ma fakatokangaʻi ʻa e sio mai ʻa e ongo faifekaú kiate kimaua peá na kolosi mai ʻi he halá kiate kimaua. Naʻe ʻeke mai ʻe ha taha ʻo kinaua ʻi he fofonga ʻofa, pe te na lava ʻo tokoni mai.
“Naʻá na toe kole mai foki pe te ma lava ʻo fakangofua ange ke na ʻaʻahi mai kiate kimaua. Naʻá ku talaange ʻio, ko e tupu pē mei heʻeku fie ʻilo. Naʻe aʻu mai ki he taimi ko iá, ʻoku teʻeki ke u ʻilo lahi ʻo kau ki he Siasí—ka ko e ngaahi fakamatala pē kuó u fanongo ai mei ha niʻihi kehe.
“Naʻá ku pehē ange ki hoku uaifí, ʻi he hili ʻeku fakangofua ʻa e ongo faifekaú ke na ʻaʻahi ange ki homau ʻapí, ʻʻOua te ke hohaʻa ki ai. ʻOua te ke fakakaukau te u kau ki ha siasi. Ko ʻeku fie ʻilo pē pe ko e hā ha fakamatala te na fai maí.”
“Naʻe kamata ke ʻaʻahi mai ʻa e ongo faifekaú kiate kimaua. Naʻá ku ʻosi mateuteu pē ke u fakahā ange kiate kinaua ʻi ha founga lelei ke na ʻalu kapau te na fakamatala ki ha meʻa ʻoku ʻikai ngali totonu kiate au. Ka naʻá na fuʻu angaʻofa ʻaupito, pea naʻá ku fiemālie ʻi he ʻikai te na lea ʻaki ha meʻa ʻoku kovi ʻo kau ki he ngaahi siasi kehé. Naʻá na akoʻaki ʻa e ʻofa mo e lotomoʻoni pea naʻá na kātakiʻi au ʻi he ngaahi fehuʻi lahi naʻá ku fai angé. Naʻe vave ʻaupito ʻema ʻofa mo ʻema fiefia ʻiate kinauá.
Naʻe kamata māmālie ʻa e teuteuʻi ʻe ʻAmato mo ʻEvelini ʻa kinaua ke na papitaiso pea hilifakinima ke na hoko ko e ongo mēmipa ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Ko e palopalema lahi taha ʻa ʻEveliní ko e Lea ʻo e Potó. Naʻá ne loto mamahi ʻi heʻene ʻiloʻi kuo pau ke taʻofi ʻene holi ke inu kofí. Naʻe ʻikai ke ʻi ai ha ʻulungāanga kovi ia ʻe fie maʻu ke tuku ʻe ʻAmato; ko e meʻa pē naʻá ne fie maʻu ke ne ʻiloʻi pea puke maʻu ʻa e moʻoní Naʻá ne tui ki he ngaahi meʻa naʻe akoʻi ange ʻe he ongo faifekaú, pea naʻe aʻu ki heʻene ʻiloʻi ha ngaahi tokāteline mo e ngaahi ngāue lahi naʻá ne ongoʻi mo hono uaifí ʻoku ʻikai maʻu ʻe he ngaahi siasi kehé, hangē ko e fāmili taʻengatá, papitaiso maʻá e kakai pekia, mo e feohi pe mo hono fokotuʻu ʻo e Siasí. Ka naʻá ne holomui ʻo ʻikai te ne fie tukupā ke ne papitaiso. Naʻá ne hohaʻa ki haʻane kau ki he Siasí, peá ne toki ʻilo kimui naʻe hala ʻa e fili naʻá ne faí.
Naʻe ʻikai fuoloa kuo kamata ke mole atu ʻa e ngaahi meʻa ko ia naʻá ne hohaʻa ki aí. Naʻe lotu ʻa ʻEvelini ke ne maʻu ha tokoni peá ne lava ʻo taʻofi ʻene inu kofí, ʻo ne pehē, “E ʻikai te u tuku ʻeni ke ne taʻofi haʻaku maʻu ʻa e ngaahi tāpuakí.” Naʻe ʻosi ha māhina nai ʻe ua ʻo e lotoveiveiua ʻa ʻAmato, naʻá ne tukupā leva ke ne papitaiso. Naʻe pehē ʻe ʻEvelini, naʻe faʻa pehe ange ʻe ʻAmato, “Oku fie maʻu ke ta tali ʻa e tokāteliné.”
Ngaahi Liliú mo e Ngaahi Tāpuakí
Naʻe papitaiso pea hilifakinima ʻa ʻAmato, ʻEvelini, mo Miseli ʻi he konga kimuʻa ʻo Sune 2011. ʻOku pehē ʻe ʻEvelini, “Naʻe kamata pē mei he taimi naʻa mau papitaiso aí, mo ʻeku ongoʻi ʻoku kamata ke liliu ʻa e meʻa kotoa pē. Kuo fakataha mai hoku fāmilí ki he Siasí. Kuo mau maʻu ʻa e ongoongolelei kuo toe fakafoki maí. Kuo mau fehangahangai mo e ngahi faingataʻa mo e ngaahi mahaki kimui mai, ka kuo huaʻi hifo ʻe heʻetau Tamai Hēvaní ʻa e ngaahi tāpuaki lahi kiate kimautolu.”
ʻOku pehē ʻe ʻAmato: “Ko e ʻuluaki liliu naʻá ku fakatokangaʻí ko e uouangataha ʻa homau fāmilí. ʻOku ʻikai ko ʻeku ʻuhingá naʻe ʻi ai haʻamau ngaahi palopalema mamafa kimuʻa, ka naʻe kamata ke mau fāitaha ange. Naʻe tokoniʻi kimautolu ʻe he ngaahi tokāteline ʻo e ongoongoleleí. ʻI hono akoʻi kimautolu ʻe he kau taki ʻo e Siasí ʻo kau ki he toputapu ʻo e fāmilí, naʻa mau fakakaukau lahi ange leva ki he totonu ke mau mahuʻingaʻia ʻi homau fāmilí.”
Naʻe mamata foki mo Sisa ʻOleana, ʻa ia ko e pīsope ia ʻa e fāmili Visileí, ki ha ngaahi liliu ʻi heʻenau moʻuí. Naʻe haʻu ʻa ʻAmato kia Pīsope ʻOleana hili ha kiʻi taimi siʻi mei honau papitaisó ʻo ne pehē ange kiate ia, “ʻOku mau fie totongi ʻemau vahehongofulú, ka ʻoku ʻikai te mau ʻiloʻi pe ʻoku anga fēfē hono totongí.”
Naʻe fakamatalaʻi ange ʻe Pīsope ʻOleana, ko e vahehongofulú ko e peseti ia ʻe 10 ʻo ʻenau tupú. Naʻe kiʻi hohaʻa ki ai ʻa ʻAmato. Ko ʻEvelini pē naʻe ngāue he taimi ko ʻení, ka naʻe ikai ngāue ʻa ʻAmato ia. Naʻe fakahā ange ʻe ʻAmato ki heʻene pīsopé, “ʻOku mau faʻa nounou maʻu pē, ka ʻoku mau fie totongi ʻemau vahehongofulú.”
Naʻe pehē ange leva ʻe Pīsope ʻOleana, “ʻE tokoua, kuo fai mai ʻe he ʻEikí ha ngaahi talaʻofa lahi.” Naʻá na lau fakataha leva ha ngaahi potufolofola ʻoku kau ki he ngaahi tāpuaki ʻoku maʻu ʻi hono totongi totonu ʻo e vahehongofulú, kau ai mo e folofola mai ʻa e ʻEikí ʻi he palōfita ko Malakaí: “Mou ʻomi ʻa e ngaahi vahehongofulu ʻo e ngaahi meʻá ki he tukuʻanga koloá, … pea mou ʻahiʻahiʻi ai au, ʻoku pehē ʻe [he ʻEiki] ʻo e ngaahi kau taú, pe te u fakaava ʻa e ngaahi matapā ʻo e langí pe ʻikai, peá u lilingi hifo kiate kimoutolu ha tāpuaki, ʻe ʻikai ha potu ʻe faʻa hao ia ki ai” (Malakai 3:10).
Hili ʻena lau fakataha ʻa e ngaahi potufolofola ko ʻení, naʻe sio atu ʻa Pīsope ʻOleana ki he papi ului foʻoú ʻo ne pehē ange, “Kapau ko e ʻuhinga ʻo e ʻikai te ke totongi vahehongofulú ke totongi ʻa e vaí pe ko e ʻuhilá, totongi hoʻo vahehongofulú. Kapau ko e ʻuhinga ʻo e ʻikai te ke totongi vahehongofulu ke totongi ho falé, totongi hoʻo vahehongofulú. Pea kapau ko e ʻuhinga ʻo e ʻikai te ke totongi vahehongofulú ko e ʻikai te ke maʻu ha paʻanga feʻunga ke fafanga ho fāmilí, totongi hoʻo vahehongofulú. ʻE ʻikai liʻaki koe ʻe he ʻEikí.”
Naʻe toe haʻu ʻa ʻAmato kia Pīsope ʻOleana ʻi he Sāpate hono hokó. Naʻe ʻikai ko ʻene haʻu ko ʻení ke toe fai ange ha ngaahi fehuʻi. Naʻá ne haʻu pē ʻo ʻoange ki he pīsopé ha sila mo ne pehē ange, “ʻE Pīsope, ko ʻemau vahehongofulú ʻena.”
Naʻe fakakaukau ʻa Pīsope ʻOleana ʻo kau ki he meʻa ko ʻení, peá ne pehē, “Naʻe talu mei ai mo ʻenau hoko ko e kau totongi vahehongofulu kakato.” Naʻe maʻu ʻe he fāmilí ha ngaahi tokoni mei he fale tukuʻanga koloa ʻa e pīsopé ʻi he taimi naʻa nau faingataʻaʻia fakapaʻanga aí. Ka neongo iá, naʻe tāpuakiʻi kinautolu ʻe he ʻEikí ke nau lava ʻo tokangaʻi pē ʻe kinautolu ʻa kinautolu. Naʻe maʻu ʻe ʻEvelini ha hiki ʻi hono vāhengá, pea maʻu ʻe ʻAmato haʻane ngāue lelei. Naʻe mole ʻa e ngāue ʻa ʻEveliní kimui, ka naʻa nau kei fai pē ʻenau totongi vahehongofulú pea nau maʻu ʻa e ngaahi tāpuaki fakalaumālie mo fakatuʻasino ʻi heʻenau faivelengá. Naʻe fehuʻi ange ʻe Pīsope ʻOleana kia ʻAmato ʻi ha taimi ʻe taha pe ʻoku fēfē ʻa e tuʻunga fakapaʻanga ʻo e fāmilí. Naʻe tali ange ʻe ʻAmato, “ʻOku mau faingamālie pē. ʻOku ai ʻa e taimi ʻe niʻihi ʻoku ʻikai te mau maʻu ha meʻakai lahi ke mau kai, ka ʻoku feʻunga pē ʻa e meʻa ʻoku mau maʻú. Pea ko e meʻa ʻoku mahuʻinga tahá, ʻoku mau falala pē ki he ʻEikí.”
Hili ha totongi vahehongofulu ʻa ʻEvelini mo ʻAmato ʻi ha taimi lahi, naʻá na talanoa mo Pīsope ʻOleana ʻo kau ki he ngaahi tāpuaki kuo nau maʻú. Naʻá na fakamatala ʻo fekauʻaki mo e Malakai 3:10, “Kuo mau ʻahiʻahiʻi ʻa e ʻEikí.” Pea kuo moʻoni ʻa e palōmesi ʻa Pīsope ʻOleaná, kuo ʻikai liʻaki ʻaupito kinautolu ʻe he ʻEikí.
Ko ha Mahino Foʻou
ʻOku fakamatala ʻa ʻEvelini mo ʻAmato ʻi he lotovaivai ʻo kau ki he ʻaho naʻa nau fakataha ai ʻi he loki silá. Naʻá na tokanga telia naʻa hohaʻa ʻena fānaú ʻi ha aʻu ki he taimi ʻe ʻosi ai ʻena maʻu hona ʻenitaumení peá na maau ke fakahoko ʻa e ouau ʻo e silá ʻi he ʻaho tatau pē. Naʻá na hohaʻa makehe koeʻuhi ko hona kiʻi foha taʻu tolu longomoʻui ko Kalisitiané. Ka naʻe nonga mo ʻapasia pē ʻa e ongo tamaikí ʻi heʻena hū mai ki he loki silá, ʻo fakamahinoʻi ai naʻe mahino kiate kinaua ʻa e ʻuhinga ʻo ʻena ʻi aí. Pea ʻi he aʻu ki he taimi ke kau ai ʻa e fānaú ʻi he ouau ʻo e silá, naʻe ʻikai fekauʻi pe fakakounaʻi ʻe ha taha ʻa Kalisitiane, ka naʻe tuʻu hake pē ʻo ʻalu atu ki he ʻōlitá ʻo tūʻulutui ʻi he tafaʻaki ʻo ʻene ongomātuʻá.
ʻOku manatu ʻa ʻEvelini ki heʻene sio ki he ʻata ʻo e fāmilí ʻi he ngaahi sioʻata ʻo e temipalé. ʻOku fakamatala foki mo ʻAmato ki heʻene sio ki aí, ʻo ʻikai ʻi he temipalé pē, ka ʻi heʻenau moʻui fakaʻahó foki. ʻOkú ne fakamālō koeʻuhi ko e mahino fakalangi ko ia ʻokú ne tataki ʻene moʻuí he taimi ní—ʻa ia ko ha mahino naʻe hangē ne ongoʻi ʻe Miseli mo Kalisitiane ʻi he taimi naʻá na ʻi he fale ai ʻo e ʻEikí. Naʻe talu mei ai mo e hangē ʻoku tupulekina ʻa e mahino ko iá, kae tautautefito ki hono talitali fiefia ʻe he fāmili Visileí ha ʻofefine foʻou ki honau fāmilí, ʻa ia ko—ʻEnitulia, naʻe fanauʻi ʻi he fuakavá ʻi ʻAokosi.
Ko ha Maama ʻi he Funga Moʻungá
ʻE liliu ʻo taʻengata ʻa e fāmili Visileí koeʻuhi ko e feilaulau fakalelei ʻa Sīsū Kalaisí pea mo e ivi tākiekina ʻo Hono temipalé ʻi honau fonuá. Kuo hoko ʻo toputapu ange honau ʻapí tuʻunga ʻi hono liliu ha ngoueʻanga ʻo hoko ko ha kelekele toputapu.
ʻOku ʻi ai ha ngaahi founga lahi ʻoku nau fakafofongaʻi ai ʻa e talaʻofa ki ha puleʻanga kakato. ʻOku nofo ʻi ʻEle Salavatoa ha kakai lelei mo faitotonu ʻe lauimiliona, ʻa ia ʻoku ʻahiʻahiʻi ʻe he ngaahi meʻa ʻo e māmaní ʻi he ʻaho kotoa pē. ʻOku ʻofa ʻa e Kāingalotu Salavatoá ʻi honau fonuá, pea ʻoku nau maʻu ha ʻamanaki foʻou ʻi heʻenau mamata ki he tuʻu ai ʻa e temipale ʻo e ʻEikí. ʻOku nau maʻu ha fakafiemālie pau mei he ngaahi lea ko ʻeni mei he lotu fakatapui naʻe fai ʻe Palesiteni ʻAealingí:
“ʻOku mau lotua ke lotolotoi Hoʻo ngaahi tāpuakí ʻi he fonua ko ʻeni ʻo ʻEle Salavatoá. Ueʻi hake ʻa e loto ʻo kinautolu ʻoku pulé, koeʻuhí ke tāpuekina ʻa e kakaí ʻaki ʻa e tauʻatāina mo e faingamālie. ʻOfa ke maʻumaʻuluta ʻa e melinó ʻi he fonuá.
“Tokoni ke fakaola lelei ʻa Hoʻo ngāué ʻi he fonuá ni. ʻOfa ke ueʻi hake ʻe he pōpoaki ʻo e ongoongoleleí ʻa e loto ʻo e kakaí ʻi he fonuá kotoa. ʻOfa ke nau ʻalu hifo ki he ngaahi vai ʻo e papitaisó, pea nau faivelenga mo tauhi moʻoni ki Hoʻo ʻAfió maʻu pē. …
“… ʻOku mau huufi mo fakatapui ʻi he loto fakafetaʻi ʻa e fale tapú ni mo hono ngaahi ʻātakaí ki hono fakahoko Ho finangaló pea mo hono fakakakato ʻo Hoʻo ngāue taʻengatá. ʻOku mau lotua ke ongoʻi hono mālohí ʻi he fonuá kotoa ʻo hangē ha maama ʻi he funga moʻungá.”1
ʻE ongoʻi ha konga lahi ʻo e ivi tākiekina ko ʻení tuʻunga ʻi he ngāue mo e faʻifaʻitakiʻanga lelei ʻa e kakai hangē ko e fāmili Visileí. Naʻe holoholoʻi ʻe ʻAmato Visilei hono loʻimatá mo feinga ke lea, neongo ʻa e lōmekina hono lotó ʻi heʻene fiefiá, ʻo ne fakahā ʻa ʻene ʻofa mo e fakamālō ki he ongo faifekau naʻá na fakafaingamālieʻi ia mo hono fāmilí ke nau haʻu kia Kalaisi ʻo maʻu ʻa e ngaahi tāpuaki ʻo e temipalé. Naʻá ne pehē, “ʻOkú ma ʻamanaki ʻe ʻalu ʻema fānaú ʻo ngāue fakafaifekau, koeʻuhí ke nau lava ʻo tāpuekina ha ngaahi fāmili kehe, ʻo hangē ko hono tāpuekina homau fāmilí ʻe he ongo talavou ko ʻení.”
Faitaaʻi ʻe Zach Gray, ʻoua naʻa hiki hano tatau
Ngaahi faitā ʻa Aaron L. West