Tutupu Fakataha Hake ko ha Ongo Tīkoni

Neongo ʻa e fōtunga kehekehe ʻa e ongo talavou ko ʻení, ka ʻoku lahi ʻa e ngaahi meʻa ʻokú na faitatau aí.

Faitā ʻa Mindy Raye Friedman

ʻOku fute ʻe ono (1.8 m) ʻa e māʻolunga ʻo Taila W.ʻoku lanu kulokula hono louʻulú, pea ʻokú ne tui ʻa e sū fika 13. ʻOku fute ʻe fā ʻinisi ʻe 8 (1.4 m) ʻa e māʻolunga ʻo Kēliti V. pea ʻoku lanu kelo hono louʻulú, pea ʻokú ne tui ʻa e sū fika 2 1/2. Neongo hona faikehekehe fakasinó, ka ʻoku ui kinaua ʻe hona ongo fāmilí ko e “ongo māhanga” koeʻuhí ko e ongo kaumeʻa lelei ʻa kinaua pea ʻoku lahi ʻa e ngaahi meʻa ʻokú na faitatau ai.

ʻOku taʻu 12 ʻa Kēliti mo Taila pea ʻokú na kau ki he kōlomu tatau ʻa e kau tīkoní. ʻOkú na manako fakatouʻosi ʻi he sipotí, mo e feohi mo hona fāmilí, mo e ako ki ha ngaahi meʻa foʻoú. ʻOkú na maʻu foki mo ha fakamoʻoni ki he ongoongoleleí peá na feinga ke na fakaʻapaʻapaʻi ʻa e Lakanga Taulaʻeiki Faka-ʻEloné. ʻOku pehē ʻe Kēliti, “ʻOku fie maʻu ke ma fakahoko homa ngaahi fatongia fakataulaʻeikí koeʻuhí ke ma ako ai.”

ʻOkú na fiefia fakatouʻosi ʻi hono fakahoko hona ngaahi fatongia ko iá, ʻi heʻena tufa ʻa e sākalamēnití mo e tānaki ʻo e ngaahi foaki ʻaukaí.

ʻOkú na toe tokoni foki ʻi he fakafeohi ki he kau tīkoni kehe ʻi honau uōtí, ʻi heʻena fakaafeʻi kinautolu ke nau haʻu kia Kalaisi. ʻOku pehē ʻe Kēliti, “Kapau ʻoku ʻikai haʻu ha taha ʻo kinautolu,ʻoku faitohi leva ha taha ʻiate kimaua kiate ia ʻo fakamatalaʻi ki ai ʻa e ngaahi meʻa kotoa naʻá ma ako ʻi he lotú. Hili ia peá ma ʻalu leva ʻo ʻave ki ai ʻa e tohí, mo pehē ange, ‘Fakamolemole ʻo haʻu ki he lotú.’”

ʻOku kau foki ʻa Kēliti mo Taila ki he polokalama Fatongia ki he ʻOtuá. Kuó na ʻosi palani fakatouʻosi ke lahi ange ʻena lau ʻa e folofolá. ʻOku pehē ʻe Taila, “ʻE tokoni moʻoni ia ki hoʻo tuí mo fakamālohia hoʻo fakamoʻoní.”

Ko e ongo tīkoni ʻa e ongo talavou ko ʻení ʻo hangē pē ko koé pe ko ha niʻihi ʻokú ke ʻiloʻi. ʻOku ʻi ai ha ngaahi meʻa ʻokú ne ngaohi kinaua ke na kehekehe, mo ha ngaahi meʻa ʻokú ne ngaohi kinaua ke na faitatau. Ka ko e meʻa ʻoku mahuʻinga tahá, ko e fānau kinaua ʻa e ʻOtuá, peaʻokú na feinga ke na tauhi kiate Ia, pea ʻokú na taha ʻi heʻena kōlomu ʻo e lakanga fakataulaʻeikí.