Fakaafeʻi e Kāingalotú ke Vahevahe Atu e Ongoongoleleí ʻi Haʻanau Totongi ha Makasini maʻá e Niʻihi Kehé
ʻI he hoko ko ia ʻa Kaniuani Uongafape ko e supavaisa ʻo e tafaʻaki ʻoku nau tokangaʻi e ngaahi nāunau ʻa e Siasí (Materials Management) ʻi Tailení, ʻokú ne faʻa ngāue ai ki ha ngaahi kole mei he kāingalotu ʻo e Siasí ʻo fekauʻaki mo e meʻangāue mo e nāunau ʻa e Siasí hangē ko e vala tapú pea mo e ngaahi tohi ʻa e Siasí kuo pākí.
Ka naʻá ne ʻohovale he ʻaho ʻe taha ʻi ha ʻaʻahi ange ha fefine ki hono ʻōfisí ke fakafoʻou ʻene totongi makasini faka-Siasí. ʻI he feituʻu ko iá ʻo e māmaní, ʻoku angamaheni ʻaki hono fakafoʻou pē ʻe he kaingalotú ʻenau totongi makasiní ʻo fakafou ʻi he fakafofonga makasini honau uōtí. Ka naʻe fakamatala ʻe he fefiné naʻe ʻikai ha fakafofonga honau uōtí. Naʻe kau ia ki he lotu faka-Putá pea naʻá ne ʻilo kau ki he ngaahi makasini ʻa e Siasí he naʻe meʻaʻofa ange ʻaki ʻe hano kaungāmeʻa Siasi kiate ia ʻaki ʻene totongi haʻane makasini fakataʻu.
Naʻe tohi ʻe Sisitā Uongafape ʻo pehē, “Naʻe kamata ke ne fakamatala mai ha ngaahi meʻa fakaʻofoʻofa fekauʻaki mo e ngaahi makasini ʻa e Siasí pea mo ʻene mahuʻinga ki heʻene fānaú. ʻI he foki mai ʻene fānaú mei he akó ʻo sio ki he makasiní, ne nau fiefia pea ne vave pē ʻenau lau ia ʻo ʻosí.”
Naʻe fakahīkihikiʻi ʻe he fefiné ʻa e makasiní ko ha meʻa “mahuʻinga fau” ki hono akoʻi ki heʻene fānaú ʻa e ngaahi ʻulungaanga mo e lea ʻoku leleí. Naʻá ne mahuʻingaʻia ai ko ia naʻá ne haʻu ke totongi pē hono fakafoʻou fakataʻu ʻene makasiní mo ne foaki ha meʻaʻofa ki hono kaungāngāué ʻaki ʻene totongi fakataʻu ʻenau makasiní ke lavemonū foki ai siʻenau fānaú.
Naʻe pehē ʻe Sisitā Uongafape, “ʻE lava foki ʻe he kāingalotú ʻo ongoʻi mo mamata ki he mahuʻinga [ʻo e ngaahi makasiní] pea [te nau] fie vahevahe atu ia ki he niʻihi kehé.”
Kuo toutou poupouʻi mai e kāingalotú ʻe he kau taki ʻo e Siasí ke nau lau e ngaahi makasini ʻa e Siasí pea vahevahe kinautolu ki he niʻihi kehé.
Kuo fakaʻilongaʻi mai ʻe ʻEletā L. Tomu Peuli ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi lelei lahi ʻe maʻu mei he makasiní. Naʻá ne pehē, “ʻE hanga ʻe he laumālie lelei ʻoku maʻu ʻi he ngaahi makasini ko ʻení ʻo fakafonu homou ʻapí ʻaki ʻa e loto māfana, mo e ʻofa, pea mo e ivi ʻo e ongoongoleleí.” (“Ko Hono Mahuʻinga ʻo e Fāmilí,” Liahona, Mē 2003, 42).
ʻOku hoko ʻa ʻEletā Keleki A. Kātoni ʻo e Kau Fitungofulú ko e Tokoni Talēkita Pule ʻi he Vaʻa ʻo e Lakanga Fakataulaʻeikí mo e ʻĒtita ʻo e ngaahi makasini ʻa e Siasí, pea ʻokú ne vakai ki honau mahuʻinga ki he tokotaha fakafoʻituitui kotoa pē.
Naʻá ne pehē, “ʻOku hoko e ngaahi makasini ʻa e Siasí ko ha konga mahuʻinga ʻo e leʻo ʻo e Siasí kuo fakamafaiʻí ʻa ia ʻoku fakafou mai ai e faleʻi fakaepalōfita mei he ʻEikí ki hono kotoa ʻo e fānau ʻa ʻetau Tamaí ʻi he toʻu kotoa pē fekauʻaki mo e ngaahi meʻa ʻoku kau ki he māmani ʻo e ʻaho ní. ʻOku ʻomi he māhina takitaha ha ngaahi fakamatala mālie mo fakamānako ʻo kau ki he ngaahi tūkunga ʻoku faitatau ai ʻa e kakai kotoa pē ʻi māmani, ʻo tatau ai pē pe ʻoku nau kau ki he Siasí pe ʻikai. ʻOku ʻaonga lahi ʻaupito kiate kinautolu kotoa pē ʻoku fekumi fakamātoato ki he moʻoní ʻa e ngaahi akonaki fakalaumālie mo e fakahinohino ʻoku ʻi aí.”
Kapau ʻe foaki ʻe he tokotaha maʻu makasini kotoa pē ʻo e Siasí ha meʻaʻofa ki ha taha ʻoku ʻikai ke Siasí pe ko hano kāinga ʻi hano totongi haʻane makasini, ʻe ofi pē ʻi he kau maʻu makasini foʻou ʻe toko 1.7 miliona ʻe ʻomi ke fetuʻutaki fakamāhina mo e Siasí ʻi ha founga ʻo e anga fakakaungāmeʻa.
ʻE lava ke vave mo faingofua hono totongi ʻe he kakai fakafoʻituituí ʻi he Falekoloa ʻa e Siasí he ʻInitanetí—store.lds.org—ha makasini ʻe taha pe lahi ange pe totongi ko ha meʻaʻofa ʻo ha ngaahi makasini maʻa ha mēmipa ʻo e fāmilí pe kaungāmeʻa. ʻOku maʻu ʻa e Friend, ko e New Era, pea mo e Ensign ʻi he lea faka-Pilitāniá pē, ka ʻoku maʻu e Liahoná, ʻa ia ʻoku ʻi ai e ngaahi fakamatala ʻoku paaki he taimi tatau ʻi he ngaahi makasini ʻe tolu ʻi he faka-Pilitāniá peé, ʻi ha ngaahi lea fakafonua lahi.
Naʻe ʻiloʻi ʻe ha pīsope ʻe taha ʻi he Siteiki ʻAlesona Peioliá ko ha founga lelei ʻa hono totongi taʻu ʻe taha ʻo e Friend ki he fānau ʻi hono uōtí ke tokoni ke nau maʻu he taimi kotoa pē e ngaahi lea ʻa e kau palōfita mo e kau ʻaposetolo moʻuí.
Naʻe totongi ʻe Penelope B. Utiuooti ʻo Tekisisi ʻi he USA ʻa e Liahona ko ha meʻaʻofa ki ha taha ʻokú ne tokoua ʻaki pea pehē ki hono kaumeʻa ko ha faiako ʻi ha fonua ia ʻe taha.
Naʻá ne tohi ʻo pehē, “ʻOku ou fakatauange ʻe tokoni [ki he tokotaha ko ʻeni ʻoku ou tokoua ʻakí] ke ne ʻiloʻi ʻa e mahuʻinga ʻo hono fai pea tauhi ʻo e ngaahi fuakavá.” Naʻe hoko atu ki heʻene pehē ko hono meʻaʻofa ʻaki ʻo hono totongi ʻo e makasiní ko ha meʻaʻofá ko ha founga ia ʻo “hono teuteuʻi e founga ki [hoku kaungāmeʻá] ke ne fanongo ai pea tali ʻi ha ʻaho ʻa e ongoongolelei kuo toe fakafoki maí.”
Ke ʻota pe totongi ha meʻaʻofa makasini, hū ki he store.lds.org. ʻOku ʻi he tafaʻaki toʻohema ʻo e pēsí ʻa e fakamatala ki hono fai ʻo e ʻotá. ʻOku tokoni e founga ʻota ʻo e makasiní ʻi he ʻInitanetí ki he niʻihi fakafoʻituituí ʻi hono fakafoʻou, totongi foʻou ʻo ha ngaahi makasini, mo e totongi ʻo ha ngaahi makasini ko ha meʻaʻofá.
ʻOku maʻu e Store.lds.org ʻi he lea faka-Siainá, Pilitānia, Falanisē, Siamane, ʻĪtali, Siapani, Kōlea, Potukali, Lūsia, mo e faka-Sipeini. Ko kinautolu ʻoku ʻikai ke nau ngāue ʻaki e ngaahi lea fakafonua ko ʻení pe ʻikai ke nau maʻu e ʻInitanetí, ʻe lava ke nau ʻota pe totongi e ngaahi meʻaʻofa makasiní ʻaki ʻenau fetuʻutaki pe ʻaʻahi ki he ngaahi senitā tufakiʻanga nāunau ʻa e Siasí, ʻa ia ʻoku ʻi ha ngaahi fonua lahi.
ʻOku poupouʻi atu e kāingalotú ke vahevahe ʻa e ongoongoleleí mo honau ngaahi kaungāmeʻa mo e fāmili ʻo e toʻu, tui fakalotu, mo e ngaahi puipuituʻa kotoa pē ʻoku ʻikai ke nau kau ki he Siasí, ʻi hano totongi ʻo e ngaahi meʻaʻofa makasini ʻa e Siasí maʻanautolu.
Faitaaʻi ‘e Rick Wallace