Ngaahi Fakakaukau Maʻá e Efiafi Fakafāmili ʻi ʻApí
ʻOku maʻu ʻi he pulusinga ko ʻení ha ngaahi fakamatala mo e ʻekitivitī ʻe malava ke ngāue ʻaki ki he efiafi fakafāmili ʻi ʻapí. Ko e niʻihi ʻeni ʻo e ngaahi sīpingá.
“Ko e Tukufakaholo ʻo e Māmá mo e Fakamoʻoní,” peesi 10: Fakanounouʻi e fakamatalá pea fakakaukau ke fakaafeʻi homou fāmilí ke faʻu ha nāunau tokoni ki he sió ke fakaʻaliʻali ʻaki e taumuʻa ʻo e faʻu sitepú (scaffold). Aleaʻi e founga ʻoku ʻoatu ai ʻe he Siasí ʻa e “faʻu sitepú” ke mou toe māʻolunga hake ai ke langa hake homou fāmilí mo e ngaahi tafaʻaki kehe pē ʻo hoʻomou moʻuí.
“Kau Palōfitá ʻi he Taimi Kilisimasí,” peesi 20: Hili hano lau ha ngaahi talanoa lahi mei he moʻui ʻa e kau palōfitá, fakakaukau ke vahevahe ha niʻihi ʻo e ngaahi meʻa kuó ke aʻusia ʻo hoko ai ha meʻa makehe ki hoʻo moʻuí pe moʻui ʻa ha niʻihi kehe lolotonga ha Kilisimasi he kuohilí. ʻE ala fie maʻu ke mou aleaʻi e ngaahi founga ke mou muimui ai ʻi he ngaahi sīpinga ʻa ʻetau kau palōfitá lolotonga e faʻahitaʻu ko ʻení.
“Ko e Maluʻi mo e Melino ʻoku Maʻu ʻi Hono Tauhi ʻo e Ngaahi Fekaú,” peesi 32: Ko kinautolu ʻoku ʻi ai ʻenau fānau īkí, te mou lava ʻo ʻai ke nau tā ha ngaahi fakatātā ʻo ha kakai ʻoku nau fai ha ngaahi meʻa māʻoniʻoni ʻi ha hala ʻoku fakatau ki ha temipale. ʻE ala fakakaukau ha ngaahi fāmili kehe ia ke nau lau e fakamatalá kotoa pea nau aleaʻi, ʻo fakamamafaʻi “ʻoku kamata ʻaki ʻa e hala ki he fiefiá … ʻa e talangofua ki he ngaahi fekaú.”
“Ko e Anga Hono Foaki ʻo e Ngaahi Meʻaʻofa kia Kalaisi,” peesi 48: Lau fakataha e fakamatala meia Palesiteni Henelī B. ʻAealingí. Mahalo ʻe lava ke tohi ʻe hoʻomou fānaú ʻa e meʻa te nau fie foaki ki he Fakamoʻuí ʻi he Kilisimasí pea kofukofuʻi ʻenau ngaahi tukupaá ko ha meʻaʻofa Kilisimasi. Fakakaukau ke mou aleaʻi e kakai ʻoku nau ʻiloʻi ʻe ʻaonga kiate kinautolu ha tokoni fakatuʻasino pe fakalaumālie pe fakatouʻosi.
“Ko Hono Tali ʻo ha Lotu ʻi he Kilisimasí,” peesi 68: Lau mo homou fāmilí e talanoa kia Peki Schonken. Mahalo te mou fie vahevahe ha ngaahi taimi naʻá ke maʻu ai ha tali ki hoʻo ngaahi lotú peá ke poupouʻi hoʻo fānaú ke nau fai ʻa e meʻa tatau. Fakakaukau ke hiki kotoa e tali naʻe maʻu ʻe homou fāmilí ki he ngaahi lotu ʻoku fai lolotonga e faʻahitaʻu faka-Kilisimasí.
Fakamoʻoni ʻoku ʻikai Lea ʻAki
ʻOku maʻu ʻe hoku foha ko Teulekí ʻa e mahaki ko e global apraxia, ʻo faingataʻa ai ke lea. ʻOku saiʻia ʻa Teuleki ʻi he efiafi fakafāmili ʻi ʻapí pea ʻokú ne fakamoleki ha ngaahi māhina lahi ʻi hono teuteu ʻo ha ngaahi lēsoni ke vahevahe mo e fāmilí.
Ko e taha ʻo ʻene ngaahi lēsoni fakangalongataʻa tahá ko e “Misi ʻa Līhaí.” Naʻá ne tau takai ha maea ʻi fale pea ʻi tuʻa foki. Naʻa mau kamata ʻaki e lēsoní ʻemau fanongo ki ha foʻi CD ʻo e himi “ʻOku Ou Tui kia Kalaisí” mo mau sio ki ha fakatātā ʻo e misi ʻa Līhaí naʻe fakaʻaliʻali he funga tēpilé. Naʻe ʻave tahataha leva kimautolu ʻe Teuleki ʻi he maeá.
ʻI heʻemau lue atú, naʻe ʻi ai ha ngaahi fakatātā ʻo Kalaisi ʻi he tafaʻaki ʻe taha mo e ngaahi meʻa ʻoku nau ʻave ʻetau tokangá (hangē ko e letiō, TV, mo e ʻū keimi) ʻi he tafaʻaki ʻe tahá. Naʻa mau ʻiloʻi kuo mau aʻu ki he ngataʻangá ʻi heʻemau fanongo ki he foʻi fasi—ko e foʻi hiva ia naʻe saiʻia taha ai ʻa Teulekí, “ʻOku Moʻui Hoku Huhuʻí.”
ʻI he aʻu ʻa e tokotaha kotoa, naʻe fakamoʻui ʻe Teuleki e foʻi DVD ko e The Testaments pea ʻai ke mau sio ʻi hono fakaʻosí, ʻa e hā ʻa Sīsū Kalaisi ki he kakai ʻo e ongo ʻAmeliká. Naʻe fuʻu mālohi fau ʻa e Laumālié ʻi hono fakahoko mai ʻe heʻeku tama tangatá ʻa ʻene fakamoʻoni ki he Fakamoʻuí ʻo ʻikai ke ne fakaʻaongaʻi ha lea.
Uenitī Tomusoni, USA