Ko Sīsū Kalaisi ʻa e ʻAlo ʻo e ʻOtuá

ʻE lava ke ke fakaʻaongaʻi ʻa e lēsoni mo e ʻekitivitī ko ʻení ke ako lahi ange ai ki he kaveinga ʻa e Palaimelí ki he māhina ní.

Fakakaukau ʻokú ke fononga atu ʻi he toafá. ʻOku mamaʻo ʻa e fonongá, pea ʻoku faingataʻa hoʻo heka kāmelí, pea ʻoku ʻikai te ke muimui koe ki ha mape! Ka ʻokú ke muimui ki ha fetuʻu. Ko e hā haʻo ongo ki ai? Te ke kei maʻu nai ha tui ke hoko atu hoʻo fonongá?

Naʻe fai ʻe he kau Tangata Potó ʻa e meʻa tatau ʻi he taʻu ʻe ua afe kuo hilí. Naʻa nau mamata ki ha fetuʻu ngingila ʻi he hahaké pea nau fononga ki Pētelihema ke fai ha fakalāngilangi ki he pēpē ko Kalaisí ʻaki ha ngaahi meʻaʻofa fakaʻofoʻofa. Pea naʻe ʻikai ko e kau Tangata Potó pē naʻa nau mamata ki he fetuʻú. Naʻe mamata ʻa e kau Nīfaí ʻi he tafaʻaki e taha ʻo e ʻōsení ki he fetuʻú pea nau ʻiloʻi kuo ʻaloʻi mai ʻa Sīsū Kalaisi ko e ʻAlo ʻo e ʻOtua.

ʻOku fakamanatuʻi mai kiate kitautolu ʻa e Fakamoʻuí ʻi heʻetau fakakaukau ʻi heʻahó ni ki he fetuʻu ko iá. Naʻe ulo mai ia ʻi he fakapoʻulí ʻo fakahā ʻa e halá ki he kau Tangata Potó, ʻo hangē pē ko e fakahā mai ʻe Sīsū kiate kitautolu ʻa e founga ke tau moʻui aí. Naʻe ʻikai feliliuaki foki ʻa e fetuʻú, ʻo hangē pē ko e ʻofa ʻa Sīsū kiate kitautolú. Manatuʻi ʻi haʻo toe sio ki he ngaahi fetuʻú, ko Sīsū Kalaisi ʻa e ʻAlo ʻo e ʻOtuá pea mo e Maama ʻo Māmaní!

Toʻohemá: ngaahi tā fakatātā ʻa Adam Koford; toʻomataʻú: ngaahi tā fakatātā ʻa Thomas S. Child, iStockphoto.com, mo e iStockphoto.com/Adyna