Ngaahi Teuteu Faka-Kilisimasi, Ngaahi Kaumeʻa Anga Faka-Kalaisi

Fai ʻe Mary N. Cook

Tokoni ʻUluaki ʻi he Kau Palesitenisī Lahi ʻo e Kau Finemuí

Naʻá ku teuteu ke teuteuʻi homau fuʻu ʻakau Kilisimasí, ko ia ne u toʻo ai ʻa e ngaahi teuteu mei ha puha naʻe faʻo ai, ʻa ia naʻe ʻikai te u toe sio ki ai pe fakaʻaongaʻi ʻi ha ngaahi taʻu lahi. ʻI heʻeku kumi ʻi he ngaahi maama mo e ngaahi tupenu teuteu faka-Kilisimasí, ne u fakatokangaʻi ai ha kiʻi puha ne teuteuʻi ʻa ia ne fonu ʻi ha ngaahi meʻa teuteu faka-Kilisimasi naʻá ku tānaki ʻi he teʻeki ke u malí mo faiako ʻi he ʻapi akoʻangá. Ne u maʻu hake ai ha meʻa teuteu ne tuitui ki ai ʻa e fakalea ko e, “ʻOupenihausi Faka-Kilisimasi—1984.” Naʻe foki ʻeku fakakaukaú ki he taʻu ko iá. Naʻe teʻeki te u mali pea naʻá ku hiki loto tailiili atu ai mei he uooti ʻo e kau tāutaha kei talavou ki ha uooti ʻo e ngaahi fāmilí.

ʻOku ou ʻofa ʻi he faʻahitaʻu Kilisimasí, ka naʻe lahi e ngaahi Kilisimasi ne u ongoʻi taʻelata ai. Naʻá ku ʻi hoku taʻu 30 tupú, teʻeki mali, pea ʻikai haʻaku fānau, pea naʻá ku ongoʻi he taimi ʻe niʻihi ʻo hangē ne liʻekina aú. Naʻe faingofua pē kiate au ke u ongoʻi fakaʻofaʻia ʻiate au pē, ʻo u foki maʻu pē ki he meʻa naʻá ku ui ko ʻeku “fakaʻofaʻia pē ʻiate au.” ʻOku ou manatu ki he taʻu 1984 ʻi heʻeku fakakauku ke u ikunaʻi ʻa e fakakaukau ko iá, ke ʻoua ʻe ngata pē ʻiate au ʻeku sió, ka ke u sio ki he meʻa te u lava ʻo fai ke u ngaohi ai ke fakafiefia ʻa e Kilisimasí ki ha niʻihi kehe.

Naʻá ku foʻou ʻaupito ki he uōtí, pea naʻá ku pehē, kapau te u fakaava hoku kiʻi loki nofototongi masivá ki he kau mēmipa ʻo e Fineʻofá, ʻe tokoni ia ki heʻeku fakafiefiaʻi ʻa e ngaahi ʻaho mālōloó peá u maheni lelei ange ai mo hoku ngaahi tokouá.

ʻI heʻeku fakakaukau atu ki he ʻoupeni-hausi ko iá, naʻá ku manatuʻi ʻa e kiʻi fuʻu ʻakau Kilisimasi naʻe teuteuʻi ʻaki ʻeku puha meʻa teuteú, ko e nanamu ʻo e pisikete naʻe tokoni mai hoku ngaahi kaumeʻa tāutahá ʻi hono taʻó, mo e ifo ʻo e “inu faka-Kilisimasi” naʻe ngaohi pē ʻe heʻeku faʻeé peá u ʻoatu ki he kau fakaafé.

Naʻá ku ongoʻi ʻi heʻeku vakai ki he ngaahi meʻa teuteu kehekehé, ha ʻofa mo e fakamālō fiefia naʻá ne fakafonu hoku lotó ʻi heʻeku fakakaukau ki he ngaahi kaumeʻa anga faka-Kalaisi talavou mo toulekeleka tokolahi naʻa nau ʻofaʻi mo akoʻi au ʻi he ngaahi taimi faingataʻá.

Naʻá ku toʻo hake ha leisi sinou feleiki naʻe lalanga ʻe ha fineʻeiki maʻaku, pea naʻá ku manatu ai ki heʻene ngaahi founga ʻofá. Naʻá ku fakakaukau ki he kau fineʻeiki kehe ʻi he ngaahi uooti lahi naʻá ku nofo ai, ʻa ia naʻa nau vahevahe mai ʻenau ʻiló kiate au. Naʻá ku ako ki he lālangá, nití, tuituí mo e ngaohi leisí mei he kau fefine fakaʻofoʻofa ko ʻeni naʻa nau fie fakamoleki honau taimí, kae tautautefito ki heʻenau faʻa kātakí koeʻuhí ke u lave monū ai ʻi he ngaahi meʻa naʻa nau fiefia aí.

Naʻá ku fakakaukau ʻi heʻeku pukepuke e kiʻi meʻaifi hoane palasá, ki he fakaafe naʻe fai mai ʻe ha talēkita mohu talēniti fakamūsika ʻo ha kuaea ke u kau ange ki ha ako hiva pongipongi ki ha polokalama fakamūsika makehe ʻi heʻeku kei finemuí. Naʻe hanga ʻe heʻene loto falalá ʻo ueʻi hake ʻi hoku lotó ha ʻofa ʻi he mūsika fakaʻeiʻeiki ʻo e kuohilí, mo e fakapapau ke u kau ki ha ngaahi kuaeá ʻi he toenga ʻo ʻeku moʻuí.

Naʻá ku malimali ʻi heʻeku toʻo hake ʻa e meʻa teuteu ʻo Miki Mausí, peá u fakamālō koeʻuhi ko e ongomātuʻá naʻá na ʻomi ha faingamālie ke u feohi mo ʻena fānau īkí. Naʻe hangē pē ʻena fānaú kiate au ko haʻaku fānaú. Naʻá ku huki kinautolu ʻi he lotú, peá u lau tohi kiate kinautolu, vaʻinga mo kinautolu, peá u ʻofaʻi ʻa kinautolu, pea naʻe tokoni ia ki hano fakafiemālieʻi ʻa e ongo fakamamahi ʻo e fakakakato meʻa naʻe ʻikai ke u aʻusiá.

Naʻe akoʻi kitautolu ʻe he Fakamoʻuí ʻi he Mātiu 10:39, “Ko ia ʻoku kalofaki ʻene moʻuí, ʻe mole ia ʻiate ia; ka ko ia ʻoku mole ʻene moʻuí koeʻuhi ko aú, ʻe maʻu ʻe ia ia.”

Naʻe hoko ʻeku fili ko ia ʻi he 1984 ke “mole ʻeku moʻuí” i heʻeku tokoni ki he niʻihi kehé ko ha kamataʻanga moʻoni ʻo ʻeku “ʻiloʻi” aú. Naʻá ku fakatokangaʻi ʻi heʻeku fakalaulauloto ki he kuohilí, kuo tokolahi ha kakai kuo nau muimui ai ki he folofola ʻa hotau Fakamoʻuí pea mole ʻenau moʻuí koeʻuhi ko au. Kuo hoko ʻa e ngaahi teuteu faka Kilisimasí ko ha fakamanatu fakafiefia ia ʻo ha ngaahi kaumeʻa anga faka Kalaisi.