Ko ʻEku Meʻaʻofa kia Sīsuú
“ʻOku haʻu ʻa e fānau kotoa ʻa e ʻOtua ke mātaʻia, ʻomi ʻa e ngaahi meʻaʻofa ʻo e ʻofa” (“Ko e Hiva ʻa e Tauhisipí,” Tohi Hiva ʻa e Fānaú, 142).
Naʻe ui mai ʻa e tangataʻeikí “Taimi ki he efiafi fakafāmili ʻi ʻapí.”
Naʻá ku fakatoʻotoʻo atu ki he loki talanoá. Naʻa mau fai maʻu pē ha ngaahi meʻa fakafiefia ʻi heʻemau ʻuluaki efiafi fakafāmili ʻi Tīsemá.
Naʻe lele muʻomuʻa atu hoku kiʻi tokoua siʻi ko Miselí, ʻo puna ki he funga sea lanu pulū moluú.
Naʻá ku pehē ange, “ʻOku ʻikai totonu ia. Naʻá ke tangutu ai he uike kuo ʻosí. Ko e taimi ʻeni ʻoʻoku.”
Naʻá ne fakakikihi mai ʻo pehē, “Ko au naʻe ʻuluaki aʻu maí, ko ia ko au ʻoku totonu ke u tangutu hení. Te ke lava ʻo tangutu ʻi he sea molū lōloá.”
Naʻá ku pehē ange leva,ʻ“Oku ʻikai te u fie tangutu ʻi he sea molū lōloá.”
Naʻá ku ʻalu atu leva ki he sea luelué ʻo fulihi ia ke ʻoua te u sio kia Miseli. Naʻá ne faʻa fakaʻitaʻi lahi au he taimi ʻe niʻihi! Naʻá ne pehē ʻe lava ke ne maʻu ha meʻa pē te ne fie maʻú. Ko ʻeku lāunga pē pea talamai ʻe heʻeku faʻeé ʻoku fie maʻu ke ʻoua te u siokita.
Naʻe pehē mai ʻe he tangataʻeikí ʻi he hili pē ʻemau hivá mo e lotú, “Ko e taimi fakafiefia ʻa e Kilisimasí, pea ʻoku fie maʻu ke tau manatuʻi hono ʻuhinga totonu ʻo e ʻaho mālōloó. Te tau kamata he poó ni ʻaki ʻetau meʻaʻofa kia Sīsuú.”
Ko ʻetau meʻaʻofa kia Sīsuú. Ne ngalo ia ʻiate au!
Naʻe hoko atu e fakamatala ʻa e tangataʻeikí, “ʻOku tau fakamanatu ʻa e Kilisimasí, koeʻuhi ko hono ʻaloʻi ʻo Sīsuú. Naʻá Ne fakafaingamālieʻi ke tau lava ʻo maʻu ʻa e meʻaʻofa mahuʻinga tahá—ʻa ia ko e moʻui fakataha mo e Tamai Hēvaní.”
Naʻe fehuʻi mai ʻe he fineʻeikí, “Pea ko e hā ha meʻa ʻokú Ne kole mai ke tau fai koeʻuhi ko ia?”
Naʻe pehē ange ʻe hoku tuongaʻané, “Ke tau muimui kiate Ia mo tauhi ʻEne ngaahi fekaú.”
Naʻe tufa mai leva ʻe he fineʻeikí kiate kimautolu takitaha ha kaati mo ha peni. Naʻe fie maʻu ke mau hiki ai ʻa e founga te mau lava ai ʻo fakahā kia Sīsū ʻoku mau ʻofa iate Ia. Ko ʻemau meʻaʻofá ia—ke mau fili ha faʻahinga meʻa te mau fie fai ke mau hangē ai ko Sīsuú.
Ne u ʻiloʻi he taimi pē ko iá ʻeku meʻaʻofa ʻe foaki. Ne akonekina kitautolu ʻe Sīsū ke tau ʻofa ki he niʻihi kehé neongo te nau fakaʻitaʻi kitautolu. Ne u ʻiloʻi naʻe fie maʻu ʻe Sīsū ke u ʻofa ʻi hoku tokouá. Ne u tohi ʻeni, “Te u angalelei kia Mīseli.”
Naʻa mau faʻo leva ʻemau kātí ʻi ha puha, pea kofukofuʻi ʻaki ia ʻa e pepa lanu koula. Naʻa mau tuku leva ʻa e puhá ʻi he lalo fuʻu ʻakau Kilisimasí. Naʻe totonu ke mau manatuʻi ʻa e meʻaʻofa ʻa e Fakamoʻuí kiate kimautolú mo ʻemau meʻaʻofa kiate Iá, ʻi he taimi kotoa pē te mau sio ai ki he puhá.
Naʻá ku sio kia Miseli ʻi he ʻosi ha ngaahi ʻaho siʻi mei ai,ʻokú ne tui ha tahaʻo hoku ngaahi sote ʻoku ou manako taha aí, ka naʻe ʻikai ke ne kole mai kiate au. Naʻá ku fie kaikaila ki ai. Naʻá ku sio ki he puha lanu koulá peá u manatuʻi hono lahi ʻo ʻeku ʻofa ʻia Sīsuú. Te u lava ʻo fakahā ʻeku ʻofa kiate Iá ʻi heʻeku ʻofa ki hoku tokouá. Naʻá ku pehē ange, “ʻE Miseli ʻokú ke hā fakaʻofoʻofa moʻoni he ahó ni.”
Naʻá ne malimali mai. “Fakamolemole ʻi he ʻikai te u kole atu ke u tui ho soté. Naʻe ʻikai te ke ʻi ai ʻi heʻeku teuteú, pea naʻá ku loto ke u hā fakaʻofoʻofa makehe ʻi heʻemau paati Kilisimasi fakakalasi he ʻaho ní.”
Naʻá ku ongoʻi ʻoku mafana hoku lotó. Naʻá ku fiefia ʻi heʻeku fili ke u angalelei kia Miseli kae ʻikai te u ʻita kiate iá.
Naʻá ku feinga ke u manatuʻi ʻi he toenga ʻo e māhiná ʻa e ongo fakafiefia ko iá mo ʻeku taumuʻa ke u hangē ko Sīsuú. Naʻe fakaʻau ke lelei ange ʻeku kātakí mo ʻeku ʻofá.
Naʻe lau mai ʻe he tangataʻeikí ʻi he Efiafi kimuʻa ʻi he Kilisimasí ʻa e talanoa ʻo e ʻaloʻí, pea mau fakafaivaʻi ia ʻe kimautolu. Naʻá ku fili ke u hoko ko e ʻāngeló, ke ʻoua te u fakakikihi mo Miseli pe ko hai ʻe hoko ko Melé.
Naʻe hoko leva ʻemau fakaava ʻa e puha koulá pea mau lau leʻo lahi ʻemau meʻaʻofa kia Sīsuú. Naʻe pehē mai ʻa e fineʻeikí ʻi heʻeku lau ange ʻeku meʻaʻofá, ʻNe u fakatokangaʻi hoʻo feinga ke ke angalelei makehe kia Miselí. ʻOku ou laukau ʻaki koe.”
Naʻá ku ongoʻi laukau foki mo au. Naʻe teʻeki te u fakaava haʻaku meʻaʻofa, ka kuó u ʻosi maʻu ʻe au ia ha meʻa makehe; ko ha ongo mei he Laumālie Māʻoniʻoní ʻo fakahā mai kiate au kuó u fai ʻa e meʻa totonú.
Tā fakatātaaʻi ʻe Laura Andros