ʻI he Ongoongó
Fokotuʻu e ʻUluaki Siteiki ʻi Keipi Vētí
Naʻe fokotuʻu ʻe ʻEletā ʻĒliki W. Kopisikei ʻa ia ne hoko ko e Palesiteni ʻo e ʻĒlia ʻIulopé he taimi ko iá, ʻi he ʻaho Sāpate ko hono 29 ʻo ʻEpeleli 2012, ʻa e ʻuluaki siteiki ʻi Keipi Vētí (ʻoku ʻiloa foki ko Kapo Vētí) ʻi he kolomuʻa ko Palaiá, ʻa ia ne kau atu ki ai ha Kāingalotu ʻe toko 1,000 tupu.
Naʻe ui pea vaheʻi ʻa Losiveti Tekisila ko e palesiteni ke ne tokangaʻi ʻa e Siteiki Palaia Keipi Veeti foʻoú, tokoni ʻuluaki ʻa ʻAtilisoni Moniteilo pea tokoni ua ʻa Hōsea Pilasi.
ʻOatu ʻe Hono Toe Fakatapui ʻo e Falelotu ʻi Lonitoní ʻa e Ongoongoleleí ki he Tokolahi
Naʻe toe fakaleleiʻi pea toe fakatapui ʻa e Falelotu fakahisitōlia ko Haiti Paʻake ʻi Lonitoni, ʻi ʻIngilaní, ko ha falelotu ke fakahoko ai e lotú pea mo ha senitā maʻá e kau ʻaʻahí ʻi he ʻaho 1 ʻo Siulai 2012 kimuʻa siʻi pea fai e ʻOlimipiki ʻo e 2012.
Naʻe toe fakatapui e falelotú ʻe ʻEletā ʻĒliki W. Kopisikei ʻo e Kau Fitungofulú ʻa ia ne hoko ko e Palesiteni ʻo e ʻĒlia ʻIulopé he taimi ko iá. Naʻá ne pehē, “ʻOku ou ʻamanaki pē ʻe haʻu ha kakai ʻe toko laumano he ngaahi taʻu ka hoko maí ki he falelotú ke ako ki he ongoongolelei ʻa Sīsū Kalaisí.”
Fakafiefiaʻi ʻe Niu Kaletōnia e Tupu ʻa e Siasí
Naʻe fokotuʻutuʻu ʻe ʻEletā Sēmisi J. Hamula ʻo e Kau Fitungofulú, Palesiteni ʻo e ʻĒlia Pasifikí, ʻi he ʻaho 27 ʻo Mē 2012, ʻa e ʻuluaki siteiki ʻi Niu Kaletōniá kae mamata ha kāingalotu ʻe toko 800 ʻo e Siasí.
Naʻe pehē ʻe Palesiteni Hamula, “ʻE monūʻia e Kāingalotu ʻo e Siasí mo Niu Kaletōnia kotoa ʻi ha tokolahi ange ʻa e kakai ʻe akoʻi kiate kinautolu pea nau tali e ongoongolelei ʻa Sīsū Kalaisí.”
ʻOku kau ki he siteiki foʻoú, ʻa e Siteiki Noumea Niu Kaletōniá, ha kāingalotu ʻe toko 2,000 mo ha falelotu ʻe valu.
Naʻe pehē ʻe Siaosi Kuiti ʻa ia naʻe uiuiʻi ke hoko ko e ʻuluaki palesiteni ʻo e siteikí, “Ko hotau misiona mahuʻinga tahá ko hono malangaʻi ʻo e ongoongoleleí mo e kotoa ʻo hono ngaahi tefitoʻi moʻoní ki he kakai ʻo Niu Kaletōniá, ʻa ia te ne ʻomi ʻa e fiefiá kiate kinautolu, honau fāmilí, ngaahi ngāueʻangá mo e tukuikoló.” Naʻe ui ʻa Maʻake Moselini mo Tieli Kolotei ko hono ongo tokoni.
ʻUluaki Falelotu ʻo e Siasí ʻi ʻItiopeá
Kuo ʻosi mamata e kāingalotu ʻi ʻItiopeá ki he ngaahi tāpuaki ʻoku maʻu mei he ʻuluaki falelotu ʻo e fonuá. ʻOku tuʻu e falelotú ʻi he hala lahi he vahaʻa ʻo e kolo ko ʻAtisi ʻApapaá mo ʻAtamaá, ʻoku fungavaka tolu pea kau ai ʻa e tauʻanga meʻalele ʻi he konga ki lalofonuá.
Kae mahuʻinga ange ʻi he ngaahi tafaʻaki fakatekinikale ʻo e falelotú, ʻa e founga ʻoku hoko ai ko ha fakaʻilonga ʻo e tuí ki he kāingalotu ʻo e koló, ʻa ia ne nau faʻa fakataha pē ʻi ha ʻapi nofoʻanga naʻe ʻikai mamaʻo mei he falelotu foʻoú.
Naʻe pehē ʻe ʻIfalemi ʻAmelo Mekoneni, ko e palesiteni ʻo e Kolo Tepalei Sití, “Ko e taimi kotoa pē ʻoku ou fou atu ai ʻi he falelotu foʻoú, ʻokú ne fakamanatu mai ʻetau ngaahi fuakavá. ʻOku fakamālohia au ʻo hangē ko e taimi naʻe hiki hake ai ʻe he ʻEikitau ko Molonaí ʻa e fuka ʻo e tauʻatāiná.”
Ko e kau mēmipa ʻo e kau palesitenisī ʻo e Siteiki Palaia Keipi Vētí (mei toʻohema ki toʻomataʻu): ʻAtilisoni Moniteilo, tokoni ʻuluaki; Loseveti Tekisila, palesiteni; mo Hōsea Pilasi, tokoni ua.
Faitā ʻa ʻEletā José A. Teixeira