ʻOku Lahi Hake ʻi he Lea Fakafonua ʻe 100 ʻOku ʻOmi he Ngaahi Peesi Lea Fakafonuá ʻi he Ngaahi Nāunau ʻa e Siasí
Maʻá e kaingalotu ʻi māmani katoa ʻoku ʻikai ke nau ngāue ʻaki ha taha ʻo e ngaahi lea lalahi ʻe 10—faka-Siaina, Pilitānia, Falanisē, Siamane, ʻĪtali, Siapani, Kōlea, Potukali, Lūsia mo faka-Sipeiní —ʻe kiʻi faingataʻa hono kumi ʻo e ngaahi nāunau ʻa e Siasí ʻi heʻenau lea fakafonua. Ka kiate kinautolu ʻoku nau ʻiloʻi e ngaahi peesi lea fakafonua ʻo e LDS.org, ko hono lomiʻi pē he komipiutá ʻi he ngaahi nāunau ʻa e Siasí.
ʻI he tafaʻaki toʻomataʻu ki ʻolungá pe toʻohema ʻi lalo ʻo e peesi ʻuluaki ʻo e LDS.org, lomiʻi he fakatātā ʻo māmaní ke maʻu e ngaahi fehokotakiʻanga ki he ngaahi peesi kotoa ʻoku maʻu ai ʻa e lea fakafonuá ʻi he LDS.org. ʻI he fakaʻosinga ʻo e 2012, ʻoku ʻamanaki e timi ʻa e LDS.org ke maʻu ha ngaahi peesi lea fakafonua ʻe 108, kau ai ʻa e lea faka-Havasikí [faka-Koloesiā], faka-Malakasí (ʻoku lea ʻaki ʻi Matakasikaá), mo e lea faka-Tuai (ʻoku lea ʻaki ʻi Kaná).
ʻOku kehekehe pē ʻa e ngaahi fakamatala ʻi he peesi lea fakafonua takitaha, ka ʻoku lava ke paaki mo download ʻa e fakamatala takitaha.
Naʻe ʻomi e fakamatala fakamuimuitaha ki he ngaahi peesi lea fakafonua he taʻu ní mo ha ngaahi meʻa foʻou, kau ai e ngaahi PDF ʻo e ngaahi peesi fakalotofonua ʻo e Liahoná ʻi ha ngaahi lea fakafonua ‘e 40 tupu mo ha fakamatala PDF faingofua ʻo e konifelenisi lahi ʻo ʻEpeleli ʻo e 2012 ʻi ha ngaahi lea fakafonua ʻe 90 tupu. ʻOku fakalahi atu ʻaki ʻe he ngaahi PDF ʻo e Tohi ʻa Molomoná ʻi he lea fakafonua ʻe 99 ki he ngaahi lea fakafonua ko ia ʻe 24 ʻoku ʻosi maʻu pē ʻi he LDS.org.
ʻOku hā e ngaahi meʻa kuo liliú ʻo fakatatau ki he palani fakaemāmanilahi ʻa e Siasí ki hono fakafeʻiloaki ʻo e ngaahi nāunaú ʻi ha ngaahi lea fakafonua pau.
ʻI he palani ko ʻeni ki hono liliu ʻo ha ngaahi nāunaú—, ʻe muʻomuʻa hono liliu ʻa e ngaahi tefitoʻi nāunaú—hangē ko e lotu tāpuakiʻi ʻo e sākalamēnití, ko e Ngaahi Tefito ʻo e Tuí, tohi lēsoni ko e Ngaahi Tefito ʻo e Ongoongoleleí, ngaahi lea ʻo e konifelenisi lahí kuo filifili, pea mo e kiʻi tohi tufa ko e Fakamoʻoni ʻa e Palōfita ko Siosefa Sāmitá.
ʻOku ʻomai mo ha ngaahi nāunau kehe kuo liliu hangē ko e folofolá, mūsiká, “Ko e Fāmilí: Ko ha Fanongonongo ki Māmani,” mo e Ngaahi Pōpoaki ʻa e Kau Palesitenisī ʻUluakí mo e Faiako ʻAʻahí ʻi he taimi ʻoku toe tokolahi ange ai e kāingalotu ʻo e Siasí ʻoku nau fakaʻaongaʻi e lea fakafonua ko iá.
ʻOku liliu pea ʻoatu e ngaahi nāunaú hili hano fakangofua mei he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá. ʻE lava foki ke kole ʻa e Kau Palesitenisī Fakaʻēliá ke maʻu ha ngaahi nāunau pau ʻi ha faʻahinga lea fakafonua kapau te nau fakatokangaʻi ʻoku fie maʻu.
Naʻe pehē ʻe Meti Lōpinisoni, ko e pule lahi ʻo e ngāue ki hono pulusi fakatisitolo (digital) ʻo e ngaahi nāunau ʻa e Siasí, “ʻOku lava ke maʻu ʻe he kāingalotu kotoa pē e ngaahi peesi ko ʻení ke nau fakaʻaongaʻi fakatāutaha pea ke fakaʻaongaʻi ʻi he ʻaho Sāpaté. ʻE lava ke fakaʻaongaʻi ʻe he kau taki fakalotofonuá e maʻuʻanga tokoni ko ʻení ki heʻenau ako fakatāutahá pea pehē ki hono fakahinohino e kāingalotú ke fakaʻaongaʻi ia ʻi honau ngaahi uiuiʻí mo e fāmilí
ʻOku lipooti mai ʻe Sākesi ʻEvaseni, ko e tokoni ua ʻi he kau palesitenisī ʻo e Vahefonua ʻEleveni ʻAmēniá, ʻa e fiefia ʻa e kāingalotu ʻAmēniá ʻi hono ngāue ʻaki e peesi lea faka-ʻAmēniá ke paaki e ngaahi nāunau ʻoku tokoni kiate kinautolu ʻi hono fua honau ngaahi fatongiá. ʻOku nau fakaʻaongaʻi foki ia ke maʻu mai mo lau e fakamatala kau ki he Siasí pea mo kumi e ngaahi lea ʻo e konifelenisi lahí ʻi heʻenau lea fakafonuá.
Kuo toe tānaki atu pea ʻe kei hokohoko atu hono tānaki atu ʻo ha ngaahi nāunau foʻou ʻe hongofulu tupu lahi ʻe lava ke paaki mo download ki he ngaahi peesi lea fakafonua ʻoku laka hake ʻi he lea fakafonua ʻe 100 ʻi he LDS.org.